Da li đanđan?
So o sveštenikija ko hram ko Jerusalim ćerđe e rateja ando životinje palo odova so žrtvujinđe len ko oltari?
SVAKO berš, o sveštenikija ko purano Izrael dinđe nekobor hiljade žrtve ko oltari ko hram. Jekh judejsko istoričari ando prvo veko kova vićinđa pe Josif Flavije pisinđa so pobuter ando 250 000 bakre hine žrtvujime ki Pasha, so značini so ćhordilo but rat (Lev. 1:10, 11; Br. 28:16, 19). So o sveštenikija ćerđe odole rateja?
O arheologija hanđe o područje okolo hram kova ćerđa o Irod. On arakhlje o kanali kotar kova đelo odova rat ando hram.
Ka razmotrina duj buća kola pomožinđe o oltari te aćhol čisto.
O rupe talo oltari: Jekh purani knjiga ando judejska zakonija hem tradicije koja tani pisimi ki početka ando trito veko opisujini so postojinđa slično kanali tali phuv. I knjiga phenela so ko jekh ugao ando oltari hine duj rupe. O rat ando žrtve hem o pani kova koristinđa pe te čistini pe o oltari đelje ko odola rupe hem nastavinđe te đan ko kanali kova legarđa ki dolina Kedron.
O arheologija složinena pe odoleja so pisini ki odija knjiga. Jekh knjiga andi judejsko istorija phenela so o arheologija arakhlje o kanalija kola hine uzo hram hem kotar kola verovatno đelo o rat ando žrtve hem o pani ando hram.
But pani: E sveštenikonenđe valjanđa but pani te šaj te thoven o deo talo oltari hem te šaj o kanalija te oven čista. Odolese, stalno valjanđa lenđe pani andi diz. O pani reslja đi o oltari prekalo kanalija, akvaduktija, rezervoarija hem bazenija. O arheolog, o Josif Patrik, pisinđa so izgleda so nijekh hram ko odova vreme na hine le odobor šukar način te obezbedini pani ko hram hem te cidel o melalo pani.