Sar o Devel brinini pe ando kašuke manuša?
Avdije, ko celo sveto isi oko 70 milionija kašuke manuša hem prekalo 200 znakovna ćhibja. Nažalost, but putija o manuša nepravedno ponašinena pe premalo kašuke. Aće disave primerija:
„But putija, ko sveto na poštujinena pe o pravija ando kašuke manuša hem ando okola kola na šunena šukar“ (Nacionalna asocijacija gluvih).
„Ko but phuvja, o kašuke tane maškaro najćorore manuša. Olenđe tano but pharo te đan ki škola, te arakhen buti hem te dobinen disave informacije“ (Svetska federacija gluvih).
Sar o Devel dikhela upro kašuke manuša? So i Biblija vaćeri olendar? Hem sar e Jehovase svedokija avdije pomožinena lenđe?
Sar o Devel dikhela upro kašuke manuša?
I Biblija mothovi so o Jehovaa brinini pe ando kašuke. Ov mangela hem on te penđaren le hem rodela amendar te ova šukar premalo lende.
Stih: „Ma de arman e kašuke manuše“ (Levitska 19:14).
So značini odova: Ando Zakon kova o Jehova dinđa e Izraelcenđe, dićhilo so o Jehova brininđa pe ando kašuke manuša.
Stih: „O Devel na dikhela koj tano ko“ (Dela apostolska 10:34).
So značini odova: O Jehova mangela sa e manušen, so uključini hem e kašuken.
Stih: „O Isus počminđa te đal ko sa o dizja hem o gava. . . propovedinđa i šukar vest ando Kraljevstvo“ (Matej 9:35).
So značini odova: O Isus alo ki phuv te sikavi e manušen ando Devleso Kraljevstvo hem te phenel lenđe so ka ćerel odova Kraljevstvo aso sa o manuša, so uključini hem e kašuken (Matej 6:10).
Stih: Ked hine ki phuv, o Isus „e kašukenđe [dinđa] te šunen hem e lalorenđe te vaćeren“ (Marko 7:37).
So značini odova: Odoleja so ćerđa o kašuke te šunen hem o lalore te vaćeren, o Isus mothovđa sar ka ovel ked e Devleso Kraljevstvo ka vladini ki phuv. Ked hine ki phuv, angleder so saćarđa e kašuke manuše, o Isus koristinđa disave znakija te bi mothovi lese so ka ćerel (Marko 7:31-35).
Stih: „E kašukenge kana ka phravđon“ (Isaija 35:5).
So značini odova: O Jehova phenđa so jekh dive o kašuke ka šunen (Isaija 29:18).
Sar e Jehovase svedokija pomožinena e kašukenđe?
Ko celo sveto, e Jehovase svedokija rodena e kašuke manušen te bi vaćerena lenđe i šukar vest. Sar amen odova ćeraja? Isi amen Biblija hem e biblijake videa ko pobuter ando 100 znakovna ćhibja. Isto ađahar, amen proučinaja i Biblija e manušencar hem ićeraja o sastankija ki znakovno ćhib. Sa odova ćeraja besplatno. Sose? Sebepi so o Isus phenđa: „Besplatno dobinđen, besplatno hem den“ (Matej 10:8).
Sa akava materijali šaj te arakhe ko internet ja šaj te huljave le ko to uređaj ađahar so ka koristine:
JW.ORG. Birin i ćhib te bi arakheja o materijali ko znakovni kova đaneja.
Aplikacija JW Library Sign Language. Huljav akija aplikacija ko to uređaj hem tegani šaj te dikhe ja te huljave o videa ki znakovno ćhib.
So ka pomožini e kašukenđe pošukar te haljon i Biblija?
I Biblija ki znakovno ćhib. O prevod Novi svet hine prvo Biblija ko celo sveto koja hine ćerdi ki američko znakovno ćhib. Svako berš isi sa pobuter znakovna ćhibja ko kola ikljola o prevod Novi svet ja disave biblijake knjige. (Ako mangeja te dikhe ko kola ćhibja isi i Biblija, ja ako mangeja te dikhe i Biblija ko internet, dikh o okvir „O prevod Novi svet ki znakovno ćhib“.)
Dikh o video Celokupan biblijski prevod Novi svet na američkom znakovnom jeziku te šaj te sikljove sar i Biblija prevodini pe ko znakovni.
Te šaj pošukar te haljove i Biblija, huljav i aplikacija JW Library Sign Language. Ki odija aplikacija čak šaj te birine određeno stih ko znakovni.
O Dmitro hem i Vita tane kašuke, ama olenge ćhave šunena. Dikh sar celona porodicaće koristini odova so svako dive dikhena i Biblija ki znakovno ćhib.
E biblijake videa. E Jehovase svedokija ćerđe but videa ko znakovni kola pomožinena e manušenđe te haljon i Biblija hem te ićeren pe ko olake savetija aso. . .
Proučin nekasa i Biblija. Neko ando Jehovase svedokija ka proučini i Biblija tuvaja. Ov ka odvojini vreme kobor valjani tuće. Šaj te rode te dikhe sar izgledini e biblijako kurs.
O Džeson Senahonen živini ko Filipini. Dikh sar e biblijako kurs pomožinđa lese te ovel paše e Devleja.
O Mario Antunez hine pastor ki crkva ko Honduras. Ov hine le but pućiba hem o odgovorija arakhlja ki Biblija. Čitin olesi priča „Imao sam više pitanja nego odgovora“.
O sastankija hem o bare skupija. Ko celo sveto, isi amen skupštine hem grupe ki znakovno ćhib, kuri o kašuke svako kurko šaj te sikljon ando Devel. Isto ađahar, svako berš ićeraja bare skupija ki znakovno ćhib kuri sikljovaja andi Biblija. Ko amare sastankija hem bare skupija, čak hem okola soj tane kašuke hem korore, šaj te sikljon andi Biblija ko taktilni znakovni. Isto ađahar, isi amen besplatno literatura ko Brajevo pismo.
Arakh i najpaše dvorana.
Sikljov diso pobuter ando amare kongresija hem pokrajinska sastankija.
Ava ki Spomen-svečanost. Odova tano najvažno događaj ko berš.
O Hose Luis Ajala živini ko Meksiko. Ov bijandilo kašuko, a kasnije aćhilo hem kororo. Dikh sar o phralja hem o phenja pomožinđe lese te penđari i Biblija hem te sikavi averen.
a Jehova tano e Devleso lično anav (Psalam 83:18). Dikh o članko „Koj tano o Jehova?“