E đuvljengi bezbednost – So phenela i Biblija odolestar?

„Ked hijum le tikni, mo phureder phral but maltretirinđa man hem svako dive dukhavđa man pe lafencar. Palo odova, ked leljum maje rome, mi sasuj but vređinđa man. Oj hem mo sastro ponašinđe pe mancar samći ked hijum olengo robo. Tegani mangljum te mudarav man.“ (Madhu,a Indija).

„Ko celo sveto, but đuvlja tane žrtve ando nasilje“, phenela i Svetsko zdravstveno organizacija. Ando trin đuvlja barem jekh olendar doživinđa fizičko ja seksualno nasilje.

Ako hem tu odova doživinđan, akana kuri god te đa, šaj daraja te na doživine odova palem. Šaj mislineja so but manuša dikhena upro đuvlja sar nevažna. Ama, sar o Devel dikhela upro đuvlja? Da li tane on važna olese?

Sar o Devel dikhela upro đuvlja?

Stih: „[O Devel] stvorinđa e murše hem e đuvlja“ (Postanak 1:27).

So odova značini: O Devel stvorinđa e murše hem e đuvlja. Anglo olese jaćha o solduj zaslužinena poštovanje. Uzo odova, ov ađićeri ando roma te mangen pe romnjen sar kokri pes, a na te kontrolišinen svako olengo korako hem te oven gruba ja nasilna (Efešanima 5:33; Kološanima 3:19). Odova mothovi so e Devlese tano važno da li o đuvlja osetinena pe sigurno hem bezbedno.

„Ked hijum le tikni, me rođakija seksualno zlostavinđe man. Ked hine man 17 berš, mo šefi phenđa maje so ka del man otkaz ako na sovava oleja. Kasnije, mo rom, me roditeljija hem me komšije hić na poštujinđe man. Ama, sar đelo o vreme, penđarđum e Jehova.b Ando odova so sikljiljum, haljiljum so ov poštujini e đuvljen, so mangela man hem so hijum vredno anglo olese jaćha.“ (Maria, Argentina).

So šaj te pomožini tuće te osetine tut pošukar?

Stih: „Isi hem amala kola tane popaše ando phral“ (Poslovice 18:24).

So odova značini: O pravo amal šaj te pomožini tut. Ako isi tut nekas upro kaste isi tut poverenje, tegani phravdo vaćer sar osetineja tut.

„Skoro 20 berš nikase na phenđum so hijum le seksualno zlostavimi. Sebepi odova, na hijum le bahtali hem hijum le depresivno. Ama, ked phravđum mo vilo nekase upro kaste hine man poverenje, hine maje but polokho“ (Elif, Turska).

Stih: „Sa tumare brige forden [ko Devel], sose ov brinini pe tumendar“ (1. Petrova 5:7).

So odova značini: Ked molineja tut e Devlese, ov ćaće šunela tut (Psalam 55:22; 65:2). Sebepi so brinini pe tutar, ov mangela te pomožini tuće te haljove so hijan but vredno.

„Odova so sikljiljum ando Jehova pomožinđa maje te ­cidav i dukh koja but vreme hine man ko vilo. Akana isi man kase te phenav sar osetinava man. O Jehova tano pravo amal kova haljola man“ (Ana, Belize).

Da li iked ka avel o vreme ked o đuvlja na ka oven zlostavime?

Stih: „Jehova . . . tu ka de pravda e ćhavenđe bizo dad hem okolenđe kola tane mučime hem više na ka daran ando jekh obično manuš“ (Psalam 10:17, 18).

So odova značini: O Devel pana hari ka cidel sa i nepravda, o nasilje hem nijekh đuvlji više na ka ovel maltretirimi.

„Ked haljiljum so o Jehova pana hari ka cidel sa o lošnipa hem so više niko na ka maltretirini e đuvljen, odova saćarđa mo phago vilo. Akana isi man mir“ (Roberta, Meksiko).

Ako mangeja te đane pobuter savi nada dela amen i Biblija, sose šaj te ova sigurna so e Devlese obećanja ka ispuninen pe hem sar e Jehovase svedokija pomožinena e manušenđe, vaćer e osobaja koja bićhalđa tuće akava članko.

Huljav akava članko.