Da li o manuša šaj te anen mir ki phuv?

Živinaja ko sveto kuri but putija ovena mariba hem oružana sukobija. Sebepi odova, o Ujedinjena nacije hem avera organizacije organizujinena o mirovna misije, so značini so on bićhalena pe manušen ko thana kaj isi maribe te bi arakhena disavo rešenje hem te bi ćerena mir. On nadinena pe so ka pomožinen te smirini pe i situacija. O generalno sekretari ando Ujedinjena nacije, o Antonio Guteres, phenela: „O mirovna snage ando Ujedinjena nacije isi len najvažno uloga ko odova te ovel mir ko sveto“.

Već but berša o mirovna operacije hine len disavo uspeh. Na primer, on zaštitinđe e manušen kola živinena ko thana kaj isi maribe, e manušen kola našlje irinđe ko pe phuvja, anđe hrana hem avera buća kola valjanđe e manušenđe hem obnovinđe o objektija kola tane potrebna aso normalno životi. Ama, o mirovna operacije na uspinena svako puti te ispuninen odova so o manuša očekujinena. Isi li disavo rešenje kova ka anel pravo mir ki phuv? So phenela i Biblija odolestar?

Sose tano pharo te arakha o mir hem savo rešenje šaj te arakha ki Biblija?

Ki slika tane mothovde duj murša kola terđona phanlje musijencar.

O problemi: nane saradnja. Nane uvek lokho o vojna hem o civilna organizacije, kola obično avena ando razna phuvja, te sarađujinen. Podijekh puti, olenđe tano pharo te ćeren zajedno sebepi o nesporazumija ja sebepi so nane lenđe najvažna o ista buća.

E biblijako rešenje: „O nebesko Devel ka vazdel o kraljevstvo [...] hem ka uništini sa odola kraljevstvija [sa o manušikane vlastija], a samo ov ka aćhol večno“ (Danilo 2:44).

Pana hari, o Devel ka ćhinavi sa o mariba hem ka ćerel mir ki celo phuv (Psalam 46:8, 9). Umesto o manušikane vlastija, ki celo phuv ka vladini samo e Devleso Kraljevstvo. Ked ka vladini odova Kraljevstvo, više na ka valjanen amenđe o organizacije kola trudinena pe te arakhen o mir.

Ki slika dićhola jekh phravdi hem ćući kutija.

O problemi: ograničime mogućnostija. O mirovna operacije nane len uvek dovoljno manuša, finansijsko podrška hem avera potrebna buća. O manuša kola tane bićhalde te ćeren mirovno sporazum, but putija ćerena buti ko thana kuri tane ki bari opasnost.

E biblijako rešenje: „O Devel ando amaro Gospod Isus Hrist [...] ćhivđa [e Isuse] te bešel ki olesi desno strana ko nebo, hem ađahar ov ćhivđa le te ovel upreder svako vladavina, svako vlast, svako sila“ (Efešanima 1:17, 20, 21).

O Svemoćno Devel, o Jehovaa, ćhivđa e Isuse te ovel Kralj ko Devleso Kraljevstvo hem dinđa le sa so valjani te šaj uspešno te vladini (Danilo 7:13, 14 b). O Isus isi le pobari moć, đandipe, mudrost hem razboritost nego bilo kova manušikano vladari (Isaija 11:2). Isto ađahar, ov isi le but moćno nebesko vojska (Otkrivenje 19:14). Nijekh problemi nane olese pharo.

Sa odova so o Devel dinđa le, o Isus na ka koristini samo te ćhinavi o mariba, već ov ka anel mir hem sigurnost sarinenđe upro kola ka vladini e Devleso Kraljevstvo (Isaija 32:17, 18).

Ki slika dićhola o čekići kova koristini pe ko sudo.

O problemi: zakonska ograničenja. Podijekh puti, okola so ćerena ko mirovna organizacije našti te ćeren sa so valjani sose nane len jasna smernice andi pi phuv kotar odova so šaj te ćeren ja so očekujini pe olendar ja sebepi o zakonska ograničenja ki phuv kaj tane bićhalde. Sebepi odova, on našti te zaštitinen averen ja te ispuninen po cilj.

E biblijako rešenje: „[E Isusese] tani dindi sa i vlast ko nebo hem ki phuv“ (Matej 28:18).

O Devel dinđa e Isusese jasna smernice hem autoritet te šaj te ćerel mir ki phuv (Jovan 5:22). O Isus niked na ka ovel nepravedno premalo manuša hem uvek ka ovel pošteno (Isaija 11:3-5). Odolese, ki Biblija pisini so o Isus tano „Knez ando Mir“ hem so oleso Kraljevstvo „ka temeljini pe ki pravda hem ki pravednost“ (Isaija 9:6, 7).

E Devleso Kraljevstvo ka anel pravo mir

E manušenge mirovna organizacije šaj te anen disavi stabilnost ja čak šaj te ćhinaven disavo maribe. Ama, on našti te ikaljen i mržnja kotar e manušengo vilo koja legari đi o nasilje.

„Našti te arakhe odova so na postojini“ (Denis Džet, bivšo američko ambasador).

Ki aver strana, e Devleso Kraljevstvo šaj te anel pravo mir sose ov pomožini e manušenđe te ikaljen i mržnja kotar po vilo. Na primer, ked o Isus hine ki phuv, ov sikavđa e manušen hem odoleja so vaćerđa hem odoleja so ćerđa sar te mothoven mangipe averenđe. Aće so ov phenđa:

„Bahtale tane okola kola ćerena mir“ (Matej 5:9).

„Mang te pašutne sar kokri tut“ (Marko 12:29-31).

„Irin o mač ko oleso than, sose sa okola so dolena pe ko mač, ka meren olestar“ (Matej 26:52).

„Ked vređinđe [e Isuse], na irinđa lenđe. Ked patinđa, na pretinđa“ (1. Petrova 2:23).

Isto ađahar, o Isus phenđa so okola upro kola vladini e Devleso Kraljevstvo, ka penđaren pe premalo mangipe. I Biblija mothovi so okola kola mrzinena averen, našti te oven deo ando odova Kraljevstvo. Aće so pisini ki Biblija:

„Premalo odova sare ka đanen so hijen me učenikija, ako mangena jekh jekhe“ (Jovan 13:34, 35).

„Ko god mrzini pe phrale, ov tano ubica“ (1. Jovanova 3:15).

„Okova so mangela e Devle valjani te mangel hem pe phrale“ (1. Jovanova 4:20, 21).

O Jehova, kova ćerđa e manušen, đanela kova tano o najšukar način te ćerel mir ki celo phuv. Oleso Kraljevstvo ka ćerel okova so o manuša našti te ćeren.

a Jehova tano e Devleso anav (Psalam 83:18). Čitin o članko „Koj tano o Jehova?“

b Ko Danilo 7:13, 14, o lafija „manušikano ćhavo“ odnosinena pe ko Isus (Matej 25:31; 26:63, 64).