Da li valjani te ova deo andi disavi religija?

So phenela i Biblija?

Ja, sose o Devel mangela o manuša te ćeden pe te šaj te služinen lese. Ki Biblija pisini so valjani „te razmislina jekh jekhestar, te šaj te podstaknina amen ko mangipe hem ko šukar delija, hem te na aćhava amare sastankija“ (Jevrejima 10:24, 25, fusnote).

O Isus phenđa pe učenikonenđe: „Premalo odova sare ka đanen so hijen me učenikija, ako ka mangen jekh jekhe“ (Jovan 13:35). Odoleja manglja te mothovi so olese sledbenikija ka oven jekh organizujimi grupa. Jekh način sar e Isusese sledbenikija mothovena mangipe tano ađahar so družinena pe maškaro peste. On tane organizujime ko skupštine te šaj redovno te ćeden pe te služinen e Devlese (1. Korinćanima 16:19). Sare amen hijam deo andi jekh porodica ko celo sveto (1. Petrova 2:17).

Nane dovoljno samo te ova deo andi disavi religija

I Biblija phenela so valjani te ćeda amen te služina e Devlese. Isto ađahar, našti te ugodina e Devlese ako hijam samo deo andi disavi religija. Te šaj o Devel te ovel zadovoljno amencar, i religija valjani te utičini ko amaro životi. Na primer, i Biblija phenela: „Te služina amare Devlese hem Dadese ko način kova ov mislini soj tano čisto hem kova nane melalo značini akava: te brinine tut aso ćhave bizo roditeljija hem aso udovice ki olengi nevolja hem te arakhe tut ando melalipe kotar akava sveto“ (Jakovljeva 1:27, fusnota).