E Nojesi arka

Sar nakhlja o vreme, ki phuv hine but manuša. But olendar hine lošna. Čak hem disave anđelija ulje lošna. On mukhlje po ćher ko nebo hem alje te živinen tele ki phuv. Da li đaneja sose ćerđe odova? Te šaj te ovel len manušikano telo hem te len pese romnjen.

Akala anđelija hem olenge romnja hine len ćhave. Ked odola ćhave barilje, on ulje but zorale hem nasilna. On hine but lošna premalo manuša. O Jehova naštine više odova te dikhel hem odolese odlučinđa te uništini e lošno manušen ko Potop.

Ama, jekh manuš na hine sar avera manuša. Ov manglja e Jehova. Oleso anav hine Noje. Ov hine le romni hem trin ćhave – o Sim, o Ham hem o Jafet. O sotrin hine ženime. O Jehova phenđa e Nojese te ćerel jekh bari arka te šaj ov hem olesi porodica te spasinen pe ko Potop. I arka tani bari kutija ando kaš so šaj te aćhol upro pani. Isto ađahar, o Jehova phenđa e Nojese te anel e životinjen ki arka te šaj hem on te spasinen pe.

O Noje odmah počminđa te ćerel i arka. Olese hem olese porodicaće valjanđa oko 50 berš te ćeren la. On ćerđe i arka ađahar sar so phenđa lenđe o Jehova. Isto ađahar, đi ćerđa i arka, o Noje vaćerđa e manušenđe so ka avel o Potop. Ama, niko na manglja te šunel le.

Ko krajo, alo o vreme te khuven ki arka. Hajde te dikha so ulo palo odova.