Ofto đene spasinđe pe ko Potop

O Noje, olesi porodica hem o životinje khuvđe ki arka. O Jehova phanlja o udar hem počminđa te perel boršim. O boršim odobor but đelo so i arka počminđa te uštel upro pani. Palo disavo vreme, celo phuv hine ućhardi panjeja. So ulo e lošno manušencar kola na khuvđe ki arka? On na aćhilje đivde. Ama, o Noje hem olesi porodica hine ko sigurno than, ki arka. Zamislin samo kobor hine radosna so šunđe e Jehova.

O boršim đelo 40 dive hem 40 raća hem palo odova aćhilo. O pani pohari počminđa te cidel pe andi phuv. Ko krajo, i arka aćhilji ki jekh planina. Ama, sebepi so pana hine but pani, o Noje hem olesi porodica naštine odmah te ikljon andi arka.

Hari-pohari, o pani šućilo. O Noje hem olesi porodica hine ki arka pobuter ando jekh berš. Tegani, o Jehova phenđa lenđe te ikljon andi arka. Ki phuv na hine nijekh lošno manuš. O Noje hem olesi porodica hine but zahvalna so o Jehova spasinđa len hem odova mothovđe ađahar so dinđe lese žrtva.

O Jehova hine bahtalo so ćerđe odova. Ov obećinđa so više niked na ka uništini o sveto potopeja. Te bi uverini len so ka ićeri pe ko po lafi, ov ćerđa ko nebo te pojavini pe i prvo duga. Da li iked dikhljan i duga?

Tegani o Jehova phenđa e Nojese hem olese porodicaće te ovel len ćhave hem ađahar te pheren i phuv.