8. PRIČA
O Avraham hem i Sara šunđe e Devle
Paše uzo Vavilon hine jekh diz koja vićinđa pe Ur. Odothe o manuša služinđe avere devlenđe, a na e Jehovase. Ama, ko Ur živinđa jekh manuš kova služinđa samo e Jehovase. Oleso anav hine Avraham.
O Jehova phenđa e Avrahamese: „Mukh to ćher hem te familija hem đa ki phuv koja ka mothovav tuće.“ Palo odova, o Devel obećinđa lese: „Tutar ka ovel baro narodo, hem prekalo tute ka ćerav šukaripe bute manušenđe ki celo phuv.“
O Avraham na đanđa kaj valjani te đal, ama hine le poverenje ko Jehova. Ađahar ov, olesi romni i Sara, oleso dad o Tara hem olese phraleso ćhavo o Lot, ćedinđe pe buća hem pođinđe ko baro drumo.
O Avraham hine le 75 berš ked pe porodicaja reslja ki phuv koja o Jehova manglja te del le. Odija phuv vićinđa pe Hanan. Uduri o Devel obećinđa e Avrahamese: „Celo akija phuv so dikheja, ka dav la te ćhavenđe.“ Ama, o Avraham hem i Sara hine phure hem na hine len ćhave. Sar o Jehova ka ispunini akava obećanje?
„Veraja o Avraham šunđa... hem đelo ko than kova valjanđa te dobini sar nasledstvo, iako na đanđa kuri đala“ (Jevrejima 11:8)