O Avraham hem i Sara dobinđe ćhave

O Avraham hem i Sara hine but berša ko brak. On mukhlje po šužo ćher ko Ur hem živinđe ko šatorija. Ama, i Sara na žalinđa pe sose hine la poverenje ko Jehova.

I Sara odobor manglja te ovel la ćhavo so čak phenđa e Avrahamese: „Ako mi sluškinja i Agara bijani ćhave, me ka mangav le sar mekle.“ Palo disavo vreme, i Agara bijanđa murše. Oleso anav hine Ismailo.

Palo but berša, ked o Avraham hine le 99 berš, a i Sara 89 berš, koro lende alje trin manuša. O Avraham vićinđa len te bešen talo jekh kaš te odmorinen pe hem te han diso. Da li đaneja ko hine on? Odola hine o anđelija! On phenđe e Avrahamese: „Aver berš ko akava vreme, tu hem ti romni ka ovel tumen ćhavo.“ I Sara hine ko šatori hem šunđa so vaćerena. Oj asandilji ano peste hem mislinđa: „Sar šaj me te ovel man ćhavo ked hijum odobor phuri?“

Đi berše, i Sara ćaće bijanđa murše, sar so vaćerđa e Jehovaso anđeo. O Avraham ćhivđa leso anav Isak, so značini „asajbe“.

Ked o Isak hine le oko panđ berš, i Sara dikhlja sar o Ismailo marela lese muj. Oj manglja te zaštitini pe ćhave, odolese đelji ko Avraham hem phenđa lese te paldel e Agara hem e Ismaile. Ko početko, o Avraham na manglja te ćerel odova. Ama, o Jehova phenđa lese: „Šun e Sara. Me ka brininav man e Ismailese. A me obećanja ka ispuninen pe prekalo Isak.“