Setin tut ki Lotesi romni

O Lot živinđa pe kakoja, e Avrahameja, ki phuv Hanan. Sar nakhlja o vreme, o Avraham hem o Lot hine len odobor but životinje so više na hine len than sarinenđe. Odolese, o Avraham phenđa e Lotese: „Našti više zajedno te živina ko jekh than. Molinava tut, birin ki koja strana mangeja te đa, a me ka đav ki aver strana.“ Akava so o Avraham ćerđa mothovi so na hine sebično.

O Lot dikhlja soj tani i phuv uzi diz Sodom but šuži. Othe hine but pani hem zeleno ćar aso olese životinje. Odolese, birinđa odova than hem đelo pe porodicaja te živini uduri.

O manuša ando Sodom hem i Gomora hine but lošna. On hine odobor lošna so o Jehova odlučinđa te uništini akala duj dizja. Ama, o Devel manglja te spasini e Lote hem olese porodica. Odolese, bićhalđa duj anđelija hem on phenđe lenđe: „Siđaren! Našen andi akija diz! O Jehova ka uništini la!“

Ama, o Lot na ikljilo odmah ked phenđe lese o anđelija. Odolese, on dolinđe e Lote ando vas, olese romnja hem olese duje ćhajen hem ikalđe len avri andi diz. Tegani, phenđe lenđe: „Prastan! Našen te spasinen tumen. Ma irinen tumen te dikhen palal, sose ako irinena tumen ka meren!“

Ked reslje ki diz Sigor, o Jehova ando nebo mukhlja jag hem sumpor upro Sodom hem i Gomora. Ađahar, akala duj dizja hine potpuno uništime. Ama, e Lotesi romni na hine poslušno e Jehovase hem irinđa pe te dikhel palal. Odolese ulji stubo ando lon. Sigurno e Lotese hem olese ćhajenđe hine but pharo so oj na šunđa e Jehova. Ki aver strana, on trin spasinđe pe sose hine poslušna e Jehovase. Ćaće tano važno ko sa te šuna e Jehova.