E Avrahamesi vera hine ispitimi

O Avraham sikavđa pe ćhave, e Isake, te mangel e Jehova hem te verujini ko olese obećanja. Ama, ked o Isak hine le oko 25 berš, o Jehova rodinđa ando Avraham te ćerel diso but pharo. So valjanđa te ćerel?

O Devel phenđa e Avrahamese: „Molinava tut, le te ćhave, e jedinco, hem de le sar žrtva ki jekh planina ki phuv Morija.“ O Avraham na đanđa sose o Jehova rodinđa lestar te ćerel odova. Ama, ipak hine lese poslušno.

Tajsato dive, rano sabale, o Avraham, o Isak hem olese duj sluge pođinđe ki Morija. Palo odova so trin dive đelje phirindoj, dural šaj hine te dikhen o planine. O Avraham phenđa pe slugenđe te ađićeren le đi ov hem o Isak đana te den žrtva. O Avraham dinđa e Isakese te akhari o kašta asi jag, a ov lelja i ćhurik. O Isak pućlja pe dade: „Kaj tano o bakro so valjani te da le sar žrtva?“ O Avraham odgovorinđa: „Mo ćhavo, o Jehova ka brinini pe odolese.“

Ked reslje ki planina, ćerđe jekh oltari. Tegani o Avraham phanlja e Isakese vasta hem lese pre hem ćhivđa le ko oltari.

Ked o Avraham lelja i ćhurik, tegani šunđa sar e Jehovaso anđeo phenela: „Avraham! Ma ćer ništa e ćhavese. Akana đanava so isi tut vera ko Devel sose hijan le spremno te de te ćhave sar žrtva.“ Palo odova, o Avraham dikhlja jekhe bakre kase šinga hine zaglavime ko jekh grm. Ov odmah phravđa e Isake, hem ko oleso than dinđa e bakre sar žrtva.

Kotar odova dive, o Jehova upro Avraham dikhlja sar po amal. Đaneja li sose? Sose o Avraham hine spremno te ćerel sa so rodinđa lestar o Jehova, čak hem ked na haljilo sose valjani te ćerel odova.

O Jehova palem phenđa po obećanje e Avrahamese: „Ka blagoslovinav tut hem ka ćerav tutar te avel baro narodo.“ Odova značini so o Jehova prekali Avrahamesi porodica ka bIagoslovini sa e šukar manušen.