O Jakov hem o Isav pomirinđe pe

O Jehova obećinđa e Jakovese so ka arakhi le isto sar so arakhlja e Avrahame hem e Isake. O Jakov đelo te živini ko jekh than kova vićinđa pe Haran. Uduri ženinđa pe, hine le bari porodica hem ulo but barvalo.

Jekh dive, o Jehova phenđa e Jakovese: „Irin tut ki ti phuv.“ Tegani, o Jakov hem olesi porodica pođinđe ko baro drumo. Đi pana hine ko drumo, disave manuša phenđe e Jakovese: „To phral, o Isav, avela akari hem oleja isi 400 manuša!“ O Jakov darandilo so o Isav ka ćerel diso lošno olese hem olese porodicaće. Ov molinđa pe e Jehovase: „Molinava tut, spasin man ando mo phral.“ Tajsato dive, o Jakov bićhalđa e Isavese but bakre, buznja, gurumnja, kamile hem hera sar poklon.

Odija rat, ked o Jakov hine kokri, dikhlja jekhe anđele! Odova anđeo počminđa te borini pe oleja. On borinđe pe đi sabale! Iako o Jakov hine povredimo, na ćhinavđa te borini pe. O anđeo phenđa: „Mukh man.“ Ama, o Jakov phenđa lese: „Na ka mukhav tut sa đi na blagoslovineja man.“

Tegani o anđeo blagoslovinđa le. Ađahar, o Jakov đanđa so o Jehova na ka mukhel o Isav te ćerel lese diso lošno.

Odova sabaj, o Jakov dural dikhlja so o Isav hem olese 400 manuša avena. Ov đelo angli pi porodica hem efta putija pokloninđa pe anglo po phral. O Isav prastandilo đi ko Jakov hem dolinđa le ki angalja. Tegani, o solduj runđe hem pomirinđe pe. So mislineja, sar hine e Jehovase ked dikhlja kobor šukar postupinđa o Jakov ki akija situacija?

Palo odova, o Isav irinđa pe ćhere, a o Jakov đelo pe drumoja. O Jakov hine le 12 murša. Olenge anava hine Ruvim, Simeon, Levije, Juda, Dan, Neftalim, Gad, Asir, Isahar, Zavulon, Josif hem Venijamin. Palo odova, o Jehova prekalo Josif spasinđa pe narodo. Da li đaneja sar? Hajde te dikha.