O Jakov dobinđa o nasledstvo

Ked o Isak hine le 40 berš, ženinđa pe e Rebekaja. Ov but manglja la. Palo disavo vreme, dobinđe duj bliznakija.

Prvo bijandilo o Isav, a palo odova o Jakov. O Isav but manglja te ovel avri hem hine šukar lovco. Ama, o Jakov pobuter manglja te ovel ćhere.

Ko odova vreme, palo dadeso meribe, o najphureder ćhavo dobini najbaro deo andi phuv hem ando pare. Odova vićinđa pe nasledstvo. Ki Isakesi porodica, deo ando nasledstvo hine hem o obećanja kola o Jehova dinđa e Avrahamese. E Isavese na hine but važna akala obećanja, ama e Jakovese hine but važna.

Jekh dive, o Isav alo ćhere but umorno sose hine celo dive ko lov. Ked dikhlja so o Jakov ćerđa diso šukar hajbase, phenđa lese: „But hijum bokhalo, de man te hav hari ando odova lolo habe.“ O Jakov phenđa lese: „Ka dav tut, ama prvo obećin maje so ka de man to nasledstvo.“ O Isav phenđa: „Baš maje briga aso nasledstvo! Ka dav tut le, samo de man te hav.“ So mislineja, da li odova so ćerđa o Isav hine šukar? Na, na hine. O Isav našalđa diso but vredno, sebepi jekh obično habe.

Ked o Isak hine but phuro, valjanđa te blagoslovini e prvone ćhave. Ama, i Rebeka pomožinđa e Jakovese te dobini o blagoslov. Ked o Isav šunđa odova, but holjanđa hem manglja te mudari pe phrale. Te šaj te zaštitinen e Jakove, o Isak hem i Rebeka phenđe lese: „Đa ko to ujko, ko Lavan, hem aćhov uduri sa đi na smirini pe o Isav.“ O Jakov šunđa pe roditeljengo savet hem našlja te šaj te spasini pe.