O Mojsije birinđa te služini e Jehovase

Ko Egipat, e Jakovesi porodica ulji penđardi sar Izraelcija. Palo e Jakoveso hem e Josifeso meribe, počminđa te vladini nevo faraon. Ov darandilo so o Izraelcija ka oven pozorale ando Egipćanija. Odolese, akava faraon ćerđa o Izraelcija te oven robija. Ov ćhivđa len te ćeren cigle hem te ćeren but phari buti ko njive. Ama, iako o Egipćanija mučinđe len, o Izraelcija hine sa poviše đene. E faraonese na sviđinđa pe odova, odolese naredinđa te mudaren pe sa o izraelska murša so ka bijanđon. Šaj li te zamisline kobor darandilje o Izraelcija?

Jekh Izraelka koja vićinđa pe Johaveda bijanđa but šuže murše. Te šaj te zaštitini le, ćhivđa le ki jekh korpa hem garavđa le maškaro trske ki reka Nil. E bebaki phen, i Marija, bešlja ki strana te dikhel so ka ovel oleja.

E faraonesi ćhaj alji te nanđol ki reka hem dikhlja i korpa. Andre arakhlja e ćhave sar rovela hem but žalinđa le. I Marija pućlja la: „Mangeja li te arakhav tuće romnja koja ka del thud e ćhavese?“ Ked e faraonesi ćhaj prihvatinđa odova, i Marija đelji hem vićinđa pe daja, e Johaveda. E faraonesi ćhaj phenđa laće: „Le akala beba hem arakh la, a me ka platinav tuće.“

Ked o ćhavo hari barilo, i Johaveda igarđa le ki faraonesi ćhaj. Oj ćhivđa leso anav Mojsije hem barjaćerđa le sar pe ćhave. O Mojsije barilo ko faraoneso ćher hem šaj hine te ovel le sa so manglja. Ama, o Mojsije niked na bisterđa e Jehova. Ov đanđa soj tano Izraelco, a na Egipćanin. Ov birinđa te služini e Jehovase.

Ked hine le 40 berš, o Mojsije odlučinđa te pomožini pe narodose. Jekh dive, ked dikhlja sar jekh Egipćanin marela jekhe Izraelco, o Mojsije khuvđa e Egipćane odobor zorale so mudarđa le. Palo odova, garavđa e manušeso telo ki pošik. Ama, ked o faraon šunđa so ćerđa o Mojsije, manglja te mudari le. Odolese, o Mojsije našlja ki phuv Madijan. O Jehova brininđa pe olestar uduri.