O grm kova thabljola

O Mojsije živinđa ko Madijan 40 berš. Uduri ženinđa pe hem hine le ćhave. Jekh dive, đi arakhlja e bakren uzi planina Sinaj, dikhlja diso čudno. Jekh grm hine le jag, ama nisar te thabljol! Ked o Mojsije đelo popaše te dikhel soj tano odova, šunđa glaso ando grm sar vaćeri lese: „Mojsije! Ma ava popaše. Huljav te sandale sose terđoveja ko sveto than.“ Odova vaćerđa o Jehova prekalo jekh anđeo.

O Mojsije darandilo hem odolese ućharđa po muj. O glaso phenđa: „Me dikhljum kobor tane mučime o Izraelcija. Me ka spasinav len ando Egipćanija hem ka igarav len ki šukar phuv. Tu ka ikale me narodo ando Egipat.“ So mislineja, da li o Mojsije iznenadinđa pe ked šunđa akava?

O Mojsije pućlja: „So ka vaćerav ked o manuša ka pućen man ko bićhalđa man?“ O Devel odgovorinđa lese: „Vaćer lenđe so bićhalđa tut o Jehova, o Devel e Avrahameso, o Devel e Isakeso, hem o Devel e Jakoveso.“ Ama, o Mojsije phenđa: „So ako o manuša na ka mangen te šunen man?“ Tegani o Jehova ćerđa čudo te šaj te uverini e Mojsije so ka pomožini le. Ov phenđa e Mojsijese te fordel po kaš ki phuv. Tegani, o kaš ulo sap! Ked o Mojsije dolinđa e sape andi porik, ov palem ulo kaš. O Jehova vaćerđa: „Ked o manuša ka dikhen akava, ka verujinen so me bićhalđum tut.“

O Mojsije vaćerđa: „Ama me na vaćerava šukar.“ Odolese o Jehova obećinđa lese: „Me ka phenav tuće so te vaćere hem ka bićhalav te phrale, e Arone, te pomožini tut.“ Odolese so đanđa soj tano o Jehova oleja, o Mojsije lelja pe romnja hem pe ćhaven hem đelo ko Egipat.