O prva trin nevolje

O Izraelcija hine robija hem morandilje te ćeren phari buti. O Jehova bićhalđa e Mojsije hem e Arone ko faraon te phenen lese: „Mukh me narodo te đal ki pustinja te služini maje.“ O faraon ponosno phenđa: „So interesini man so phenđa o Jehova. Na ka mukhav e Izraelcen.“ Tegani, o faraon ćhivđa len te ćeren pana pophari buti. Alo o vreme o Jehova te mothovi e faraonese koj tano o Devel. Đaneja li sar ćerđa odova? Ov ćerđa ko Egipat te oven deš nevolje. O Jehova phenđa e Mojsijese: „O faraon na šunela man. Tajsa, rano sabale, ov ka ovel ki reka Nil. Đa koro leste hem phen lese so celo pani ki reka Nil ka ovel rat, odolese so na mukhlja me narodo te ikljol.“ O Mojsije šunđa le hem đelo ko faraon. O faraon dikhlja sar o Aron khuvela e kašteja ko Nil hem sar i reka ovela rat. Oj počminđa lošno te mirišini, o maćhe koro late mulje hem više naštine te pijel pe pani olatar. Ama, o faraon pana na mukhlja e Izraelcen te đan.

Palo efta dive, o Jehova palem bićhalđa e Mojsije te phenel e faraonese: „Ako na mukheja me narodo te đal, tegani celo Egipat ka ovel pherdo žabencar.“ O Aron vazdinđa o kaš hem celo phuv počminđa te pherđol žabencar. O manuša arakhlje e žaben ko pe ćhera, ko krevetija hem ko ćare. O žabe hine svugde! O faraon phenđa e Mojsijese te molini e Jehova te ćhinavi akija nevolja. Ov obećinđa so ka mukhel e Izraelcen te đan. Ađahar, o Jehova ćhinavđa i nevolja, hem o Egipćanija ćedinđe sa e žaben so mulje. I phuv počminđa lošno te mirišini. Ama, o faraon palem na mukhlja e Izraelcen te đan.

Tegani o Jehova phenđa e Mojsijese: „O Aron valjani te khuvel e kašteja ki phuv hem andi prašina ka oven komarcija.“ Ando jekh puti svugde hine komarcija. Disave e faraonese sluge phenđe lese: „Akija nevolja tani ando Devel.“ Ama, o faraon hem akava puti na manglja te mukhel e Izraelcen te đan.