I dešto nevolja

O Mojsije obećinđa e faraonese so na ka avel palem koro leste. Ama, angleder te đal olestar, phenđa lese: „Ki ekvaš i rat, sa o prvobijande murša ko Egipat, ando faraoneso ćhavo pa sa đi e robonenge ćhave, ka meren.“

O Jehova vaćerđa e Izraelcenđe te ćeren jekh posebno hajbe. Ov phenđa lenđe: „Ćhinen jekhe bakre ja jare, nek ovel le jekh berš hem olese rateja makhen samo o okvirija ando udara. Peken o mas hem han le e mareja kova tano bizo kvasco. Đi hana, oven uravde, o sandale nek oven tumenđe ko pre hem oven spremna te pođinen. Akija rat ka oslobodinav tumen.“ Zamislin samo kobor hine radosna o Izraelcija.

Ki ekvaš i rat, e Jehovaso anđeo nakhlja ando svako ćher ko Egipat. Ko udara kaj na hine rat, mudarđa e prvobijande ćhave. Ama, ko ćhera so hine makhlje rateja, na ćerđa ništa. Ki svako egipatsko porodica, barvali ja ćorori, mulo o prvobijando ćhavo. Ama, sa o izraelska ćhave aćhilje đivde.

Mulo čak hem e faraoneso ćhavo. O faraon naštine više te izdržini akava. Ov odmah vaćerđa e Mojsijese hem e Aronese: „Đan tumenđe akatar. Đan hem služinen tumare Devlese. Len tumare životinjen hem đan tumenđe!“

Ked hine pherdi i mesečina, o Izraelcija ikljilje ando Egipat, podelime ko porodice hem ko plemenija. Hine 600 000 izraelska murša hem but đuvlja hem ćhave. Isto ađahar, olencar pođinđe hem avera manuša kola manglje te služinen e Jehovase. O Izraelcija konačno hine oslobodime!

Te šaj te setinen pe sar o Jehova spasinđa len, on valjanđe svako berš te spreminen asavko posebno hajbe. Akava dive vićinđa pe Pasha.