O čudo ko Crveno more

Ked o faraon šunđa so o Izraelcija đelje ando Egipat, kajinđa pe so mukhlja len. Ov naredinđa pe vojskaće: „Spreminen tumare kočije hem hajde te đa palo lende. Na valjanđam te mukha len te đan.“ O faraon hem olese manuša đelje palo Izraelcija.

Te šaj te vodini pe narodo, o Jehova diveste koristinđa o oblako, a raćate i jag. Ov igarđa len đi ko Crveno More hem phenđa lenđe te ćhiven pese uduri šatorija.

Palo odova, o Izraelcija dikhlje sar o faraon hem olesi vojska avena palo lende. On hine ki zamka, andi jekh strana hine o more, a andi aver strana hine i egipatsko vojska. O manuša but darandilje hem phenđe e Mojsijese: „Ka mera! Valjanđan te mukhe amen ko Egipat!“ Ama, o Mojsije phenđa lenđe: „Ma daran. Ađićeren hem dikhen sar o Jehova ka spasini amen.“ O Mojsije hine le baro poverenje ko Jehova.

O Jehova phenđa e Izraelcenđe te ćeden o šatorija. Odija rat, o Jehova ćhivđa o oblako maškaro lende hem o Egipćanija. Tegani ki Egipćanengi strana hine tomnina, a ki Izraelcengi strana hine svetlo.

O Jehova phenđa e Mojsijese te pružini po vas upro more. Tegani o Jehova ćerđa bari bavlal te phudel celo rat. I bavlal delinđa o more ko duj strane hem ko maškar phravdilo o drumo. Ađahar, sa o Izraelcija nakhlje ki šuki phuv, a ando solduj strane hine zidija ando pani.

E faraonesi vojska đelji palo Izraelcija ko odova šuko drumo ko more. Tegani o Jehova ćerđa o vojnikija te zbuninen pe hem te na đanen kuri te đan. O točkija ando olenge kočije počminđe te ikljon. O vojnikija pištinđe: „Hajde te naša akatar! O Jehova borini pe olenđe.“

O Jehova phenđa e Mojsijese te pružini po vas upro more. Ando jekh puti o panja ando more ućharđe i egipatsko vojska. O faraon hem olesi vojska mulje. Nijekh olendar na aćhilo đivdo.

Ki aver strana ando more, o Izraelcija slavinđe e Jehova điljaja: „Đilaben e Jehovase, sose mothovđa pi moć. Fordinđa e vojska zajedno e grastencar ko more.“ Đi sarine đilabđe, o đuvlja ćhelđe hem bašalđe ko daire. Sare hine but radosna sose hine oslobodime.