Uvod ko 5. deo

Duj masek palo odova so nakhlje o Crveno more, o Izraelcija reslje ki planina Sinaj. Odothe o Jehova ćerđa savez ja dogovor e Izraelcencar te oven oleso narodo. Ov zaštitinđa e Izraelcen hem dinđa len sa so valjani lenđe – mana hajbase, šeja so na pharavđona hem na puranđona hem bezbedno than kuri šaj te živinen. Ako isi tut ćhave, pomožin lenđe te haljon sose o Jehova dinđa e Izraelcenđe o zakon, o sveto šator hem e sveštenikonen. Naglasin kobor tano važno te ićera amen ko amaro lafi, te ova ponizna hem uvek te ova verna e Jehovase.