O Izraelcija dena obećanje e Jehovase

Oko duj masek sar đelje ando Egipat, o Izraelcija reslje đi i planina Sinaj hem phravđe pe šatorija. O Mojsije hine ki planina hem o Jehova phenđa lese: „Me spasinđum e Izraelcen. Ako šunena man hem ako ićerena me zakonija, ka oven mo posebno narodo.“ Ked o Mojsije irinđa pe tele ko Izraelcija phenđa lenđe e Jehovase lafija. Sar reagujinđe? Sare phenđe: „Ka ćera sa so ka phenel amenđe o Jehova.“

O Mojsije palem uklinđa ki planina. Uduri o Jehova phenđa lese: „Palo trin dive, palem ka vaćerav tuvaja. Vaćer e narodose te na ukljel upre ki planina Sinaj.“ Palo odova, o Mojsije huljinđa tele ko Izraelcija hem vaćerđa lenđe te oven spremna sose o Jehova isi le diso te phenel olenđe.

Palo trin dive, o Izraelcija dikhlje jekh tamno oblako upri planina hem dikhlje so grmini, a šunđe hem o zvuk andi šing. Tegani o Jehova alo ki planina sar jag. O Izraelcija tresinđe andi dar. Celo planina počminđa te tresini hem hine ućhardi ćuroja. O zvuko andi šing hine sa pozoralo hem pozoralo. Tegani o Devel phenđa: „Me hijum o Jehova. Na isminena te služinen avere devlenđe.“

O Mojsije palem đelo ki planina hem o Jehova dinđa le zakonija kuri hine pisimo sar o narodo valjani te služini lese hem sar te ponašini pe. O Mojsije pisinđa akala zakonija hem čitinđa len e Izraelcenđe. Sarine obećinđe: „Ka ćera sa so vaćeri amenđe o Jehova.“ On dinđe lafi e Jehovase, ama da li ićerđe pe ko po lafi?