O Izraelcija na ićerđe pe ko odova so obećinđe

O Jehova phenđa e Mojsijese: „Ava koro mande ki planina. Ka dav tut ploče ando bar ko kola ka pisinav tuće me zakonija.“ O Mojsije đelo ki planina hem uduri aćhilo 40 dive hem 40 raća. Đi hine uduri, o Jehova pisinđa o deš zapovestija ko duj ploče ando bar hem dinđa len e Mojsijese.

Palo disavo vreme, o Izraelcija mislinđe so o Mojsije mukhlja len. On phenđe e Aronese: „Valjani amenđe neko ko ka vodini amen! Ćer amenđe devle!“ Tegani o Aron phenđa: „Den man tumaro zlato.“ Ov topinđa o zlato hem olestar ćerđa zlatno telco. Tegani o manuša phenđe: „Akava telco tano amaro devel kova ikalđa amen ando Egipat!“ On počminđe te klaninen pe anglo zlatno telco, te ćhelen hem te đilaben. Da li odova so ćerđe hine šukar? Na, sose na ićerđe pe ko odova so obećinđe.

O Jehova dikhlja so ulo hem phenđa e Mojsijese: „Đa tele ko manuša. On nane maje poslušna hem služinena e hovavne devlese.“ O Mojsije huljinđa andi planina hem lelja peja o duj ploče.

Ked alo popaše uzo logor, o Mojsije šunđa sar o narodo đilabi. Tegani dikhlja sar ćhelena hem sar pokloninena pe anglo zlatno telco. O Mojsije but holjanđa. Tegani fordinđa o duj ploče ando bar hem on phađilje ko kotora. Odmah uništinđa e zlatno telco. Palo odova, pućlja e Arone: „Sar o narodo ubedinđa tut te ćere akija lošno buti?“ O Aron phenđa: „Ma holjan. Đaneja savo tano akava narodo. On manglje te ćerav lenđe devle hem me topinđum olengo zlato hem ikljilo akava zlatno telco!“ O Aron ćerđa bari greška. O Mojsije irinđa pe palem ki planina hem ando vilo molinđa e Jehova te oprostini e manušenđe.

O Jehova oprostinđa okolenđe kola manglje te oven olese poslušna. Da li haljoveja kobor hine važno o Izraelcija te šunen e Mojsije?