O Isus Navin hem o Gavaoncija

Ki celo hanansko phuv šundilo so ulo ko Jerihon. O kraljija ando Hanan ćedinđe pe zajedno te borinen pe protiv o Izraelcija. Ama, o Gavaoncija hine len aver plan. Uravđe o purane šeja, đelje ko Isus Navin hem phenđe lese: „Amen avaja dural. Šunđam e Jehovase hem sa so ćerđa tumenđe ko Egipat hem ko Moav. Obećinen amenđe so na ka napadinen amen hem ka ova tumare sluge.“

O Isus Navin verujinđa akale manušenđe hem obećinđa lenđe so na ka napadinen len. Ama, palo trin dive šunđa so on na avena dural, nego ando Hanan. O Isus Navin pućlja len: „Sose hovavđen amen?“ On odgovorinđe: „Amen darandiljam, sose đanaja so o Jehova tumaro Devel borini pe tumenđe. Molinaja tumen, ma mudaren amen.“ O Isus Navin ćerđa odova so obećinđa hem na mudarđa len.

Palo disavo vreme, ćedinđe pe panđ hananska kraljija te napadinen e Gavaoncen. O Isus Navin hem olesi vojska phirđe celo rat te bi pomožinena len. O maribe počminđa rano sabale. O Hanancija počminđe te našen ko sa o strane. Ama, ando Jehova naštine te našen, sose ov ćerđa te perel i kukudi upro lende. Palo odova, o Isus Navin molinđa pe e Jehovase te ćerel o kham te aćhol ko jekh than. Sose rodinđa odova ando Jehova, ked đanđa so niked angleder na desinđa pe diso ađahar? Odolese so o Isus Navin hine le poverenje ko Jehova! Hem ćaće o kham aćhilo ko jekh than sa đi o Izraelcija na pobedinđe e hanansko kraljen hem olenge vojnikonen.