49. PRIČA
Jekh lošno kraljica hine kaznimi
Andi pi palata ko Jezrael, o Ahav dikhlja e Navutejeso vinograd. Odova vinograd but sviđinđa pe lese hem manglja te ćinel le. Ama, premalo e Jehovaso zakon hine zabranimo te biknel pe i phuv koja neko dobinđa ko nasledstvo hem odolese o Navutej na manglja te biknel la. Da li o Ahav poštujinđa e Navutejesi odluka? Na. O Ahav hine odobor holjamo so na manglja te ikljol andi pi soba hem te hal maro.
E Ahavesi romni, i lošno kraljica Jezavelja, phenđa lese: „Tu hijan kralj ko Izrael hem šaj te ovel tut sa so mangeja. Me ka ćerav te dobine odova vinograd.“ Oj pisinđa lil e dizjake starešinenđe hem phenđa lenđe te optužinen e Navuteje so vaćerđa protiv o Devel hem te mudaren le. O starešine ćerđe sa so i Jezavelja phenđa lenđe. Palo odova, oj phenđa e Ahavese: „O Navutej mulo. Šaj te le oleso vinograd.“
I Jezavelja na mudarđa samo e Navuteje, već hem avere manušen kola manglje e Jehova. Oj služinđa e hovavne devlenđe hem ćerđa razna lošna buća. O Jehova dikhlja sa so ćerđa i Jezavelja. Da li ov ćerđa diso sebepi odova?
Ked mulo o Ahav, oleso ćhavo o Joram ulo kralj. O Jehova bićhalđa jekhe manuše, kaso anav hine Juj, te kaznini e Jezavelja hem olake porodica.
O Juj ukljinđa ki kočija hem đelo ko Jezrael, kuri živinđa i Jezavelja. O Joram ikljilo pe kočijaja anglo Juj hem pućlja le: „Isi li mir maškaro amende?“ O Juj phenđa: „Našti te ovel mir sa đi ti daj, i Jezavelja, ćerela lošna buća.“ Tegani o Joram manglja te irini pi kočija hem te našel. Ama, o Juj pogodinđa le e strelaja hem ov mulo.
Palo odova, o Juj đelo ki Jezaveljaki palata. Ked šunđa ko avela, i Jezavelja šminkinđa pe, ćerđa pese frizura hem ađićerđa le ko đami. Ked o Juj reslja, oj grubo vaćerđa oleja. Tegani, o Juj phenđa e slugenđe kola hine uzo late: „Forden la tele!“ On fordinđe la ando đami hem oj mulji.
Palo odova, o Juj mudarđa e Ahavese 70 ćhaven hem uništinđa sa so hine povezimo odoleja te služini pe e Valese. Da li akava uverini tut so o Jehova sa dikhela hem so ko pravo vreme ka kaznini okolen kola ćerena lošna buća?
„O barvalipe kova dobini pe sebepi i pohlepa, na ka ovel blagoslovimo“ (Poslovice 20:21)