Jekh tikni ćhaj hem jekh ratniko

Ki Sirija živinđa jekh tikni izraelsko ćhaj koja hine dur ando pe roditeljija. I sirijsko vojska lelja la andi olaki porodica hem legarđa la te ovel sluškinja e romnjaće ando jekh zapovedniko kova vićinđa pe Naman. Akija tikni ćhaj služinđa e Jehovase, čak iako živinđa maškaro manuša kola na manglje le.

O Naman hine but nabormo andi guba hem hine le bare dukha. I tikni ćhaj but manglja te pomožini le. Oj phenđa e Namanese romnjaće: „Me đanava nekas ko šaj te pomožini te romese. Ko Izrael isi jekh prorok kova služini e Jehovase. Oleso anav tano Jelisej. Ov šaj te saćari te rome.“

E Namanesi romni vaćerđa lese so phenđa laće i tikni ćhaj. Ov hine spremno sa te ćerel, odolese đelo ko Jelisejeso ćher ko Izrael. O Naman mislinđa so o Jelisej valjani te ađićeri le sar jekhe važno manuše. Ama, o prorok ni na ikljilo te vaćeri oleja, nego bićhalđa pe sluga te phenel e Namanese: „Đa hem nanđov efta putija ki reka Jordan hem palo odova ka saćove.“

O Naman hine but razočarimo. Ov phenđa: „Mislinđum so akava prorok ka saćari man ađahar so ka vićini pe Devle hem ka ćhivel pe vasta upro mande. A ov phenela maje te đav ki odija izraelsko reka. Amen isi amen pošukar reke ki Sirija. Me šaj hem uduri te đav!“ O Naman but holjanđa hem đelo pese ando Jelisejeso ćher.

Olese sluge pomožinđe le pošukar te razmislini. On phenđe lese: „Na li hijan le spremno te ćere sa, te šaj te saćove? Odova so phenđa tuće akava proroko te ćere, nane pharo. Sose na šuneja le?“ O Naman šunđa pe slugen. Đelo ki reka Jordan hem celo khuvđa ko pani efta putija. Palo eftato puti, ov ikljilo ando pani sasto. Ov hine but radosno hem irinđa pe ko Jelisej te zahvalini pe olese. O Naman phenđa: „Akana đanava so o Jehova tano ćaćutno Devel.“ So mislineja, sar osetinđa pe i tikni izraelsko ćhaj ked o Naman irinđa pe ćhere sasto?