O Jehova hine strpljivo e Jonaja

O manuša andi asirsko diz Niniva hine but lošna. O Jehova phenđa pe prorokose, e Jonase, te đal ki Niniva hem te phenel lenđe te na ćeren više lošna buća. Ama, o Jona našlja hem đelo ko aver drumo. Ukljilo ko jekh brodo kova đelo ko Tarsis hem našlja.

Đi putujinđa, kotar jekh puti počminđa but bari oluja hem o mornarija but darandilje. On molinđe pe pe devlenđe hem pućlje pe: „Sose ovela amenđe akava?“ Ko krajo, o Jona phenđa lenđe: „Me hijum krivo. Me našava kotar odova so phenđa maje o Jehova te ćerav. Forden man ko more hem i oluja ka aćhol.“ O mornarija na manglje te forden le ko more, ama ov rodinđa lendar odova. Ked fordinđe le ko more, i oluja aćhilji.

O Jona mislinđa so ka merel. Đi batinđa sa pohor hem pohor ko more, ov molinđa pe e Jehovase. Tegani, o Jehova bićhalđa jekhe bare maćhe kova nakhavđa e Jona, ama na mudarđa le. Kotar maćheso vođi, o Jona molinđa pe: „Obećinava so ka ćerav sa so ka phene maje.“ O Jehova ćerđa o Jona te aćhol đivdo hem palo trin dive o maćho fordinđa le ki phuv.

Da li odova so o Jehova spasinđa e Jona značinđa so ov na valjanđa palem te đal ki Niniva? Na. O Jehova palem phenđa e Jonase te đal uduri. Akava puti, o Jona šunđa le. Ov đelo ki Niniva hem e lošno manušenđe phenđa: „Aso 40 dive, i Niniva ka ovel uništimi.“ Ama, tegani ulo diso so o Jona ni na mislinđa so ka ovel. O manuša andi Niniva šunđe le hem meninđe pe. O kralj andi Niniva phenđa pe narodose: „Roden e Devle hem pokajinen tumen. Šaj na ka uništini amen.“ Ked o Jehova dikhlja so o manuša pokajinđe pe, ov na uništinđa i Niniva.

O Jona but holjanđa so o Jehova na uništinđa i diz. Zamislin, o Jehova hine strpljivo hem milostivo premalo Jona, a ov na hine milostivo premalo manuša so živinđe ki Niniva. Umesto odova, ov holjanđa. Đelo andi diz hem bešlja tali jekh senka kotar jekh dudum. Ama, o dudum šućilo hem o Jona but holjanđa. Odolese, o Jehova phenđa lese: „Tuće tano poviše žao aso jekh dudum, nego aso manuša andi Niniva. Me oprostinđum lenđe hem odolese tane on pana đivde.“ So manglja o Jehova odoleja te sikavi e Jona? O manuša andi Niniva hine pobuter važna ando jekh dudum.