O trin Jevreja na pokloninđe pe e zlatno kipese

Disavo vreme palo so o Navuhodonosor dikhlja jekh suno ando kip, ov ćerđa jekh baro kip ando zlato. O kip ćhivđa ki jekh ravnica koja vićinđa pe Dur hem vićinđa sa e važna manušen ando po kraljevstvo te aven odothe. Maškaro lende hine o Sedrah, o Misah hem o Avdenago. O kralj naredinđa: „Ked ka šunen i muzika ando trube, harfe hem gajde pokloninen tumen anglo kip! Svako ko na poklonini pe, ka ovel fordimo ki jag.“ Da li akala trin Jevreja ka pokloninen pe anglo akava kip ja ka aćhon verna e Jehovase?

Tegani o kralj naredinđa te počmini i muzika. Sare pokloninđe pe, samo o Sedrah, o Misah hem o Avdenago na ćerđe odova. Disave manuša primetinđe odova hem phenđe e kraljese: „Okola trin Jevreja na pokloninđe pe anglo kip.“ O Navuhodonosor naredinđa te anen len anglo leste hem phenđa: „Ka dav tumen pana jekh šansa te pokloninen tumen anglo kip. Ako palem na ćerena odova, ka fordav tumen ki peć. A nane devel kova ka spasini tumen mandar.“ On phenđe lese: „Na valjani amenđe dujto šansa. Amaro Devel ka spasini amen. Ama, čak hem te na ćerel odova, amen na ka poklonina amen anglo kip.“

O Navuhodonosor hine but holjamo. Phenđa pe slugenđe: „Tharen i jag hem ćeren i peć te ovel efta putija potati nego obično!“ Tegani naredinđa pe vojnikonenđe: „Phanen akale manušen hem forden len ki peć!“ I peć hine odobor tati so o vojnikija kola legarđe len mulje ko isto trenutko ked alje uzi peć. O trin Jevreja hine fordime ki jag. Ama, ked o Navuhodonosor dikhlja andre ki peć, ov dikhlja sar phirena štar đene, a na trin. Tegani, but darandilo hem pućlja pe manušen: „Na li so fordinđam trine đenen ki jag? Me dikhava štare đenen, a jekh olendar dićhola sar anđeo!“

O Navuhodonosor đelo popaše uzi peć hem vićinđa: „Ikljoven avri, tumen so služinena e Najbare Devlese!“ Sare hine iznenadime ked dikhlje e Sedrahe, e Misahe hem e Avdenago sar ikljona andi peć đivde hem saste. Olengi koža, o bala hem o šeja na hine thare hem čak na mirišinđe ko ćuro.

O Navuhodonosor phenđa: „O Devel ando Sedrah, Misah hem Avdenago tano baro. Ov bićhalđa pe anđele hem spasinđa len. Nijekh devel nane sar olengo.“

Da li hijan odlučno te aćhove verno e Jehovase ki bilo koja situacija, sar akala trin Jevreja?