O Kraljevstvo kova večno ka vladini

Jekh rat, o kralj Navuhodonosor dikhlja jekh čudno suno. Odobor darandilo so naštine više te sovel. Vićinđa pe mađioničaren hem phenđa lenđe: „Objasninen maje so dikhljum ko suno.“ On phenđe lese: „Phen amenđe so dikhljan ko suno.“ O Navuhodonosor phenđa lenđe: „Na! Tumen ka phenen maje so dikhljum ko suno ja ka mudarav tumen!“ On palem phenđe lese: „Phen amenđe so dikhljan ko suno hem tegani ka phena tuće so značini to suno.“ Tegani, ov phenđa lenđe: „Tumen mangena te hovaven man. Phenen maje so dikhljum ko suno!“ On phenđe lese: „Nane manuš ki phuv kova šaj te phenel tuće so dikhljan ko suno. Odova so rodeja našti te ćera.“

O Navuhodonosor but holjanđa hem naredinđa te mudaren pe sa o mađioničarija hem o mudra manuša. Maškaro odola mudra manuša hine o Danilo, o Sedrah, o Misah hem o Avdenago. O Danilo rodinđa ando kralj te del le hari vreme. Palo odova, ov hem olese amala molinđe pe e Jehovase te pomožini lenđe. So ćerđa o Jehova?

Ki jekh vizija, o Jehova mothovđa e Danilose so o Navuhodonosor dikhlja ko suno hem so značini odova. Tajsato dive, o Danilo đelo ko kraljeso sluga kova hine odredimo te mudari e mudro manušen hem phenđa lese: „Ma mudar odole manušen, me šaj te objasninav o suno e kraljese.“ Tegani, o sluga legarđa e Danilo ko Navuhodonosor, a o Danilo phenđa lese: „O Devel tuće mothovđa so ka ovel ki budućnost. Akava tano to suno: Dikhljan jekh baro kip. Oleso šero hine kotar zlato, o kolin hem o vasta hine ando srebro, o vođi hem o ćanga upreder o koćija hine ando bakar, o ćanga teleder o koćija hine ando sastron, a o stopala hine mešime sastroneja hem glinaja. Đi dikhljan, andi jekh planina odvojinđa pe jekh bar hem khuvđa e kipe ko stopala. O kip phađilo hem ulo prašina koja i bavlal legarđa. A o bar ulo bari planina hem ućharđa celo phuv.“

Palo odova, o Danilo phenđa: „Aće so značini o suno: O šero kotar zlato tano to kraljevstvo. O srebrno deo tano o kraljevstvo so ka avel palo tute. O bakar predstavini jekh kraljevstvo kova ka vladini ko celo sveto. Palo leste ka avel jekh kraljevstvo so ka ovel zoralo sar sastron. A o poslednjo kraljevstvo so ka vladini ka ovel delimo – disave delija ka oven zorale sar sastron, a disave kovle sar glina. O bar so ulo planina tano e Devleso Kraljevstvo. Odova Kraljevstvo ka uništini sa odola kraljevstvija hem ka vladini zauvek.“

Ked šunđa akala lafija, o Navuhodonosor pokloninđa pe e Danilose hem phenđa lese: „To Devel mothovđa tuće so značini o suno. Nijekh Devel nane sar oleste.“ Ki početka, o Navuhodonosor manglja te mudari e Danilo, ama ko krajo ćhivđa le te ovel poglavari upro sa o mudra manuša hem te ovel vladari ko Vavilon. Da li dikheja sar o Jehova odgovorinđa e Danilose ki molitva?