Štar terne ćhave aćhilje verna e Jehovase

Ked o Navuhodonosor legarđa e knezon andi Juda ko Vavilon, ćhivđa e Asfenaze, kova služinđa ko dvor, te brinini pe olendar. O Navuhodonosor phenđa e Asfenazese te birini maškaro lende terne ćhaven kola tane najsaste hem najgođale. Akala terne ćhave valjanđe te školujinen pe trin berš, a palo odova te služinen ko dvor. On valjanđe te sikljon te čitinen, te pisinen hem te vaćeren ki ćhib koja koristinđa pe ko Vavilon. Isto ađahar, valjanđe te han isto odova so hana o kralj hem olese manuša. Štar kotar akala terne hine o Danilo, o Ananija, o Misailo hem o Azarija. O Asfenaz dinđa len vavilonska anava: Valtasar, Sedrah, Misah hem Avdenago. Da li odova so sikljona ko dvor ka cidel len ando Jehova?

Akala štar terne odlučinđe so ka aćhon verna e Jehovase. On đanđe so na valjani te han o habe kova hala o kralj, sose premalo Jehovaso zakon o mas ando disave životinje na isminđa te hal pe. Odolese, on phenđe e Asfenazese: „Molinaja tut, ma ćhiv amen te ha ando kraljeso habe.“ O Asfenaz phenđa lenđe: „Ako na hana, pa naborsaljona, o kralj ka mudari man!“

Ama, o Danilo hine le jekh ideja. Ov phenđa e Asfenazese: „Molinaja tut, de amen deš dive te ha samo povrće hem te pija pani. Palo odova, dikh sar ka izgledina amen, a sar o terne so hana e kraljeso habe.“ O Asfenaz složinđa pe odoleja.

Palo deš dive, o Danilo hem olese trin amala izgledinđe but posaste kotar avera terne. O Jehova but radujinđa pe so aćhilje lese poslušna. Ov čak dinđa e Danilose mudrost te haljol o vizije hem o sune.

Ked olengo školovanje završinđa pe, o Asfenaz legarđa e ternen anglo Navuhodonosor. Ov vaćerđa olencar hem dikhlja so o Danilo, o Ananija, o Misailo hem o Azarija tane mudra hem so pošukar haljona o buća ando avera terne. Tegani birinđa len te ćeren buti ko kraljevsko dvor. Ked valjanđa te anel važna odluke, o kralj često rodinđa savet olendar. O Jehova dinđa lenđe mudrost koja hine pobari andi mudrost koja hine len sa e kraljese manuša hem olese mađioničarija.

Iako hine ki aver phuv, o Danilo, o Ananija, o Misailo hem o Azarija na bisterđe so o Jehova tano olengo Devel. Da li hem tu uvek ka ove poslušno e Jehovase, čak ked na hijan te roditeljencar?