O Jerusalim tano uništimo

O manuša ki Juda but putija irinđe po dumo e Jehovase hem služinđe e hovavne devlenđe. O Jehova but berša trudinđa pe te pomožini len. Ov bićhalđa bute prorokonen te upozorinen len, ama umesto te šunen len, on asandilje lenđe. Sar o Jehova mothovđa lenđe so na valjani te služinen e hovavne devlenđe?

O Navuhodonosor, o kralj ando Vavilon, pobedinđa bute narodon. Ked prvo puti osvojinđa o Jerusalim, ov phanlja e kralje e Joahine, e manušen kola hine knezija, e vojnikonen, e zanatlijen hem legarđa len ko Vavilon. Isto ađahar, ov lelja sa o barvalipe ando Jehovaso hram. Palo odova, e Sedekija ćhivđa te ovel kralj ki Juda.

Ko početko, o Sedekija šunđa e Navuhodonosore. Ama, o narodija so hine uzo lende hem o hovavne prorokija vaćerđe e Sedekijase te bunini pe protiv o Vavilon. O Jeremija upozorinđa le: „Ako bunineja tut protiv o Vavilon, ki Juda ka ovel baro mudaribe, bokhalipe hem nabormipe.“

Palo ofto berš, o Sedekija odlučinđa te bunini pe protiv o Vavilon. Rodinđa pomoć kotar egipatsko vojska. Ama, o Navuhodonosor bićhalđa pe vojska te napadini o Jerusalim hem i vojska opkolinđa celo diz. O Jeremija phenđa e Sedekijase: „O Jehova phenela so ako predajineja tut e Vaviloncenđe, ka aćhove đivdo hem i diz na ka ovel uništimi. Ama, ako na predajineja tut, o Vaviloncija ka tharen o Jerusalim, a tut ka len sar robo.“ O Sedekija phenđa: „Na ka predajinav man!“

Palo jekh tekvaš berš, i vavilonsko vojska rušinđa o jerusalimska zidija hem tharđa celo diz. On tharđe o hram, mudarđe bute manušen, a pana buten lelje te oven olenge robija.

O Sedekija našlja ando Jerusalim, ama o Vaviloncija đelje palo leste. Astarđe le paše uzo Jerihon hem legarđe le ko Navuhodonosor. O vavilonsko kralj ćhivđa e Sedekija te dikhel sar mudarena olese ćhaven. Palo odova, o Navuhodonosor korjaćerđa e Sedekija, ćhivđa le ko phanlipe hem odothe mulo. Ama, e manušenđe andi Juda o Jehova obećinđa: „Palo 70 berš, palem ka irinav tumen ko Jerusalim.“

Ama, so ulo e ternencar kola hine legarde ko ropstvo ko Vavilon? Da li aćhilje verna e Jehovase?