O Jehova bićhalđa e Jeremija te propovedini

O Jehova birinđa e Jeremija te ovel proroko ki Juda. Phenđa lese te propovedini e manušenđe hem te vaćeri lenđe te na ćeren više lošna buća. Ama, o Jeremija phenđa: „Jehova, me pana hijum ćhavoro. Na đanava sar te vaćerav e manušencar.“ O Jehova phenđa lese: „Ma dara. Me ka vaćerav tuće so te phene. Me ka pomožinav tut.“

Palo disavo vreme, o Jehova phenđa e Jeremijase te ćedel e starešinen, te phagel anglo lende jekh khoro hem te phenel lenđe: „O Jerusalim isto ađahar ka ovel uništimo.“ Ked o Jeremija ćerđa odova so phenđa o Jehova, o starešine but holjanđe. Jekh sveštenik kaso anav hine Pashor, marđa e Jeremija hem ćhivđa lese vasta hem lese pre ki kaštunali klada. Celo rat, o Jeremija naštine te mrdini. Tajsato dive, o Pashor oslobodinđa le. O Jeremija phenđa: „Našti više te izdržinav akava. Na mangava više te propovedinav.“ Ama, da li ćaće hine ađahar? Na. Ked razmislinđa hari pobuter, ov phenđa: „E Jehovase lafija tane sar jag so thabljola ano mande. Našti te na propovedinav.“ O Jeremija nastavinđa te upozorini e manušen.

Beršencar palo odova, ki Juda alo nevo kralj. O sveštenikija hem o hovavne prorokija mrzinđe odova so vaćerđa o Jeremija. On phenđe e manušenđe kola hine knezija: „Akava manuš valjani te merel.“ O Jeremija phenđa: „Ako mudarena man, ka mudaren e manuše kova nane krivo. Me samo vaćerđum tumenđe e Jehovase lafija.“ Ked o knezija šunđe odova, phenđe: „Akava manuš na valjani te merel.“

Sebepi so o Jeremija hem ponodri propovedinđa, o knezija but holjanđe. On rodinđe ando kralj te mudari e Jeremija. O kralj phenđa so oleja šaj te ćeren so god mangena. On lelje e Jeremija hem fordinđe le ki jekh hor jama koja hine pherdi ćikaja hem mislinđe so uduri ka merel. O Jeremija počminđa te batini ki ćik.

O Avdemeleh, kova služinđa ko dvor, phenđa e kraljese: „O knezija fordinđe e Jeremija ki jama! Ako mukhaja le uduri, ov ka merel.“ O kralj phenđa e Avdemelehese te lel peja 30 manušen hem te ikalji le andi jama. So mislineja, da li hem amen valjani te ova sar o Jeremija kova na mukhlja ništa te ćhinavi le te propovedini?