I romni ko bunari

Pali Pasha, o Isus hem olese učenikija irinđe pe ki Galileja prekali Samarija. Paše uzi diz Sihar, o Isus aćhilo ko Jakoveso bunari. Đi ov hari odmorinđa pe, olese učenikija đelje ki diz te ćinen diso hajbase.

Palo disavo vreme, ko bunari alji jekh romni te pherel pani. O Isus phenđa laće: „De man hari pani.“ Oj phenđa lese: „Sose vaćereja mancar ked đaneja so me hijum Samarićanka? O Jevreja na vaćerena amencar.“ O Isus phenđa laće: „Ked bi đaneja ko hijum me, ka rode mandar pani hem me ka dav tut pani kova dela životi.“ Oj pućlja le: „Sar mislineja? Nane tut ni kofa te ikale pani.“ O Isus phenđa laće: „Svako so ka pijel o pani kova me dava le niked više na ka ovel trošalo.“ Tegani i romni phenđa: „Gospodine, de man odova pani.“

O Isus phenđa laće: „Vićin te rome te avel.“ Oj phenđa: „Nane man rom.“ O Isus phenđa laće: „Šukar phenđan. Panđ putija hijan le dindi, a akana živineja e manušeja kasa na hijan ko brako.“ I romni phenđa: „Dikhava so hijan proroko. Mo narodo verujini so šaj te molina amen e Devlese ki akija planina, a o Jevreja vaćerena so šaj te molina amen samo ko Jerusalim. Ama, me verujinava so ked ka avel o Mesija, ov ka sikavi amen sar te služina e Devlese.“ Tegani, o Isus phenđa diso so pana nikase na phenđa: „Me hijum o Mesija.“

I romni sigate đelji ki diz hem phenđa e Samarićanenđe: „Mislinava so arakhljum e Mesija. Đanela sa mandar. Aven hem dikhen!“ On đelje olaja ko bunari hem uduri o Isus počminđa te sikavi len.

O Samarićanija vićinđe e Isuse te aćhol ki olengi diz. Ov duj dive sikavđa e manušen hem but đene počminđe te verujinen ano leste. On phenđe e Samarićankaće: „Akana ked šunđam so vaćeri akava manuš, sigurna hijam so ov tano okova kova ka spasini o sveto.“