O Isus uskrsnini e Lazare

O Isus hine le trin but paše amala kola živinđe ki Vitanija. Odola hine o Lazar hem olese duj phenja, i Marija hem i Marta. Jekh dive, đi o Isus hine ki aver strana ando Jordan, i Marija hem i Marta bićhalđe lese jekh but važno poruka: „O Lazar tano but nabormo. Molinaja tut, ava sigate!“ Ama, o Isus na đelo odmah. Ov ađićerđa pobuter ando duj dive hem phenđa pe učenikonenđe: „Hajde te đa ki Vitanija. O Lazar sovela, đava te vazdav le.“ O apostolija phenđe: „Ako o Lazar sovela, odova ka pomožini lese te ovel pošukar.“ Tegani o Isus phravdo phenđa lenđe: „O Lazar mulo.“

Ked o Isus reslja ki Vitanija, o Lazar hine parumo, već štar dive. But manuša alje te utešinen e Marta hem e Marija. Ked i Marta šunđa so o Isus avela, sigate đelji te dikhel le. Oj phenđa: „Gospode, te ove hine akate mo phral na bi merela.“ O Isus phenđa laće: „To phral ka uštel. Da li verujineja ko odova, Marta?“ Oj phenđa: „Verujinava so jekh dive ka uskrsnini.“ O Isus phenđa laće: „Me hijum o uskrsenje hem o životi.“

Tegani, i Marta đelji ki Marija hem phenđa laće: „O Isus tano akate.“ I Marija prastandilji koro Isus hem o manuša đelje palo late. Oj pelji anglo Isusese pre hem naštine te ćhinavi te rovel. Oj phenđa: „Gospode, te ove hine akate, amaro phral pana bi ovela đivdo!“ Ked o Isus dikhlja kobor tani bari olaki dukh hem ov počminđa te rovel. Ked o manuša dikhlje olese asva, on phenđe: „Dikhen kobor o Isus manglja e Lazare.“ Ama, disave pućlje pe: „Sose na spasinđa pe amale?“ So ka ćerel o Isus akana?

O Isus đelo ko grobo kuri ko ulaz hine ćhivdo jekh baro bar. Ov phenđa: „Ciden o bar.“ I Marta phenđa: „Ama, nakhlje već štar dive sar mulo! Oleso telo mirišini.“ Tegani, on cidinđe o bar hem o Isus molinđa pe: „Mo Dad, hvala tuće so šunđan man. Me đanava so tu uvek šuneja man, ama vaćerđum odova sebepi o manuša te šaj te đanen so tu bićhalđan man.“ Tegani, vićinđa ando sa o glaso: „Lazare, ikljov!“ Tegani, ulo diso but šukar: O Lazar ikljilo ando grobo, ama pana hine paćardo ko zavoja. O Isus phenđa: „Ciden lestar o zavoja hem mukhen le te đal.“

But đene kola dikhlje odova, počminđe te verujinen ko Isus. Ama, disave đelje hem phenđe e farisejenđe so ulo. Ando tegani, o fariseja manglje te mudaren hem e Lazare hem e Isuse. Jekh ando dešuduj apostolija, o Juda Iskariotski, ćorjalje đelo ko fariseja hem phenđa lenđe: „Kobor ka platinen maje ako pomožinava tumen te astaren e Isuse?“ On phenđe lese so ka den le 30 srebrnikija. Palo odova, o Juda počminđa te rodel prilika te izdajini e Isuse ko fariseja.