O Pavle tano bićhaldo ko Rim

O Pavle po trito misionarsko putovanje završinđa ko Jerusalim. Odothe hine astardo hem ćhivdo ko phanlipe. Ki vizija koja dobinđa jekh rat, o Isus phenđa lese: „Tu ka đa ko Rim hem ka propovedine uduri.“ E Pavle kotar Jerusalim legarđe ki Cezareja, kuri hine duj berš ko phanlipe. Ked hine ko suđenje anglo namesnik Fest, o Pavle phenđa: „Mangava te sudini maje o car ko Rim.“ O Fest odgovorinđa lese: „Ako mangeja te sudini tuće o car, ko car hem ka đa.“ E Pavle ćhivđe ko brodo kova đelo ko Rim, hem oleja pođinđe o Luka hem o Aristarh.

Ked hine ko more, hine jekh bari oluja, koja trajinđa nekobor dive. Sarine mislinđe so ka meren. Ama, o Pavle phenđa: „Manušalen, jekh anđeo ko suno phenđa maje: ’Pavle, ma dara. Tu ka đa ko Rim, hem sare ko akava brodo ka oven spasime‘. Oven hrabra! Amen na ka mera.“

I oluja trajinđa 14 dive. Ko krajo, dikhlje o kopno. Odova hine o ostrvo Malta. Ked reslje ko jekh than kuri o pani hine plitko, o brodo zaglavinđa ki pošik. A ando silna talasija, o paluno deo phađilo ko kotora. Ama, o 276 manuša kola hine ko brodo reslje đi o kopno. Disave plivinđe, a disave dolinđe pe ko kotora ando brodo hem o pani igarđa len đi o kopno. O manuša ko ostrvo Malta brininđe pe olendar hem tharđe lenđe jag te šaj te taćon.

Palo trin masek, o vojnikija igarđe e Pavle ko Rim avere brodoja. Ked reslja, o phralja alje te dikhen le. Ked o Pavle dikhlja len zahvalinđa pe e Jehovase hem but hine ohrabrimo. Iako o Pavle hine phanlo, dozvolinđe lese te bešel ko jekh ćher kuri arakhlja le jekh vojniko. Odothe aćhilo duj berš. O manuša avena hine te dikhen le, a ov propovedinđa lenđe ando Devleso Kraljevstvo hem sikavđa len ando Isus. Isto ađahar, o Pavle pisinđa lila e skupštinenđe ki Mala Azija hem ki Judeja. O Jehova ćaće koristinđa e Pavle te vaćeri i šukar vest bute narodonđe.