E Jovanese vizije

Đi o apostol Jovan hine ko phanlipe ko ostrvo Patmos, o Isus mothovđa lese 16 vizije ja slike ando odova so ka ovel ki budućnost. Ko akala vizije hine mothovdo sar e Jehovaso anav ka ovel posvetimo, so oleso kraljevstvo ka avel hem so olesi volja ka ćerel pe hem ki phuv hem ko nebo.

Ki jekh vizija, o Jovan dikhlja e Jehova sar bešela ko veličanstveno presto ko nebo, a uzo leste hine 24 starešine uravde ko parne šeja hem ko šero hine len zlatna krune. Ando presto šundilo sar grmini. O 24 starešine pokloninđe pe anglo Jehova hem služinđe lese. Ki aver vizija, o Jovan dikhlja but manuša ando sa o nacije hem ćhibja kola služinena e Jehovase. O bakro, kova predstavini e Isuse, brinini pe olendar hem igari len ko panja kola dena životi. Palo odova, ki aver vizija, dikhlja sar o Isus počmini te vladini sar Kralj ko nebo, zajedno e 24 starešinencar. Ki aver vizija, o Jovan dikhlja sar o Isus borini pe e zmajeja, kova tano o Satana hem olese demonencar. O Isus fordinđa len ando nebo tele ki phuv.

Palo odova, o Jovan dikhlja diso but šukar. O Bakro hem o 144 000 terdilje ki gora Sion. Ov isto dikhlja jekhe anđele sar letini okolo i phuv hem phenela e manušenđe te daran ando Devel hem te den lese i slava.

Ki aver vizija dikhlja o Armagedon. Ko odova maribe, o Isus hem olesi vojska pobedinđe e Satanaso lošno sveto. Ki zadnjo vizija, o Jovan dikhlja sar ko nebo hem ki phuv isi savršeno mir. O Satana hem okola kola tane ki olesi strana hine potpuno uništime. Sare ko nebo hem ki phuv slavinđe e Jehovaso anav hem služinđe samo olese.