Lil ando Vodeće telo
Manglje phraljalen hem phenjalen,
Sar e Jehovase sluge, amen mangaja oleso Lafi, i Biblija. Uverime hijam so oj tačno mothovi i istorija, so isi la šukar savetija hem so ano late šaj te arakha dokazija so o Jehova ćaće mangela e manušen (Psalam 119:105; Luka 1:3; 1. Jovanova 4:19). Amen vilestar mangaja te pomožina averenđe te sikljon o ćaćipe kolestar pisini ko Devleso Lafi. Sebepi odova, amen ikalđam akija knjiga koja vićini pe „Sikljov kotar priče andi Biblija.“ Mangaja te phena nekobor lafija andi akija knjiga.
Akija knjiga tani ćerdi e ćhavenđe. Ama, oj šaj te pomožini hem e bare manušenđe kola mangena te đanen pobuter andi Biblija. Odolese soj tani i Biblija sa e manušenđe, sigurna hijam so sarinenđe amenđe ka koristini te podsetina amen ko olake pouke, kola šaj te pomožinen amen ćaće te ova bahtale.
Akija knjiga vaćeri ando događaja kola hine pana ked hine ćerde o prva manuša. Dinđam sa amendar te mothova e biblijake izveštaja ko jekh jasno hem jednostavno način hem kobor god šaj redoja sar so desinđe pe.
Ama, ki akija knjiga na pisinena samo o priče andi Biblija. Hem o tekst hem o slike tane ađahar ćerde te šaj te pomožinen amen te haljova so ćaće ulo hem sar osetinđe pe o manuša kolendar vaćeri pe.
Đi čitinaja akala priče, ka haljova so i Biblija tani knjiga koja vaćeri ando manuša kola šunđe e Jehova hem kola na šunđe le. Isto ađahar, podstaknini amen te sikljova ando olengo primer (Rimljanima 15:4; 1. Korinćanima 10:6). I knjiga tani podelimi ko 14 delija. Ko početko ando svako deo tane o glavna pouke ando nekobor priče kola tane ko odova deo.
Ako isi tumen ćhave, šaj zajedno olencar te čitinen akija knjiga, te dikhen o slike hem te vaćeren odolestar. Palo odova, šaj te čitinen o biblijsko izveštaj ando kova vaćeri pe ki odija priča. Pomožinen lenđe te haljon savi veza isi maškaro biblijsko izveštaj hem o pouke andi priča. Isto odova šaj te ćerel pe hem ked jekh baro manuš mangela te đanel sostar vaćeri i Biblija.
Nadinaja amen so akija knjiga ka pomožini sa e iskreno manušenđe, sar e ternenđe ađahar hem e phurenđe, te sikljon ando Devleso Lafi hem te ićeren pe ko odova so sikljilje. Ađahar hem on ka služinen e Jehovase hem ka oven deo andi olesi porodica.
Tumare phralja,
Vodeće telo ando Jehovase svedokija