13. LEKCIJA

Da li sa o religije mothovena koj tano ćaće o Devel?

Štampimo izdanje

O Devel tano mangipe. Tegani, sose but manuša kola phenena so služinena olese ćerena lošna buća? Sebepi so olenge religiozna vođe na sikavena len koj tano ćaće o Devel. Sar odola religije lađaćerena e Devle? Sar o Devel osetini pe sebepi odova? So ov ka ćerel pana hari?

**1. Sar o religije odoleja so sikavena lađaćerena e Devle?**

O religiozna vođe „e Devleso ćaćipe zameninđe e hovajbaja“ (Rimljanima 1:25). Na primer, but religije garavena ando manuša kova tano e Devleso anav. Ama, i Biblija phenela soj tano but važno te đana e Devleso anav (Rimljanima 10:13, 14). Isto ađahar, ked ovela diso lošno, disave religiozna vođe phenena so o Devel manglja te ovel ađahar. Ama, odova tano jekh baro hovajbe. O Devel niked našti te ćerel lošnipe. (Čitinen Jakovljeva 1:13.) Sebepi odola hovajba, e manušenđe tano pharo te mangen e Devle.

**2. Sar o religije odoleja so ćerena lađaćerena e Devle?**

E Jehovase tano pharo ked dikhela so ko but religije na cenini pe e manušengo životi. Odolese, i Biblija phenela so olenge grehija „pherdilje đi ko nebo“ (Otkrivenje 18:5). Beršencar, but religije mešinena pe ki politika, podržinena o mariba hem sebepi olengo but manuša mulje. Disave religiozna vođe mangena te oven barvale hem sebepi odova rodena pare ando manuša aso odova so ćerena. Akava mothovi so na penđarena e Devle hem odolese on našti te sikaven e manušen koj tano ćaće o Devel. (Čitinen 1. Jovanova 4:8.)

3. So o Devel mislini ando religije kola lađaćerena le?

Ako tu hijan holjamo ked dikheja kobor lošna buća ćerena pe ko but religije, so mislineja sar o Jehova osetini pe? Ov mangela e manušen, ama holjamo tano upro religiozna vođe kola lađaćerena le hem kola lošno ponašinena pe premalo manuša. Ov phenela so sa odola religije ka oven uništime hem so „više niked na ka oven“ (Otkrivenje 18:21). Pana hari, o Devel ka ćerel odova (Otkrivenje 18:8).

SIKLJOV POBUTER

Sikljov pobuter odolestar so o Devel mislini ando religije kola lađaćerena le hem kola buća on ćerđe. Isto ađahar, sikljov sose odova na valjani te ćhinavi tut te penđare e Devle pana pošukar.

4. O Devel na prihvatini sa o religije

But manuša mislinena soj tane o religije različita drumija kola legarena amen đi ko Devel. Ama, da li tano ćaće ađahar? Čitinen Matej 7:13, 14, hem palo odova vaćeren ando akava pućibe:

So i Biblija vaćeri ando drumo kova legari amen ko večno životi?

Dikhen o VIDEO, hem palo odova vaćeren ando akava pućibe.

VIDEO: Da li o Devel prihvatini sa o religije? – insert (3:22)

Da li i Biblija mothovi so o Devel prihvatini sa o religije?

5. Ko but religije nane mangipe

But religije durjaćerena e manušen ando Devel ko razna načinija. Na primer, ađahar so mešinena pe ko mariba. Sar ćerena odova? Dikhen o VIDEO. Palo odova vaćeren ando akala pućiba.

VIDEO: So ćerđe o crkve ko Dujto svetsko rat? (2:22)

So but crkve ćerđe ko Dujto svetsko rat?
So tu mislineja odolestar?

Čitinen Jovan 13:34, 35 hem 17:16. Palo odova vaćeren ando akala pućiba:

So o Jehova mislini ando odova so but religije mešinena pe ko mariba?
Sebepi o religije ćerđe pe but lošna buća. So mislineja, sose ko but religije nane mangipe ando kova sikavi amen e Devleso Lafi?

Kolaž: I crkva hem i pagoda dićhona palal, a anglal tane o scene ando mariba kola hine hem ko kola mešinđe pe o religije. 1. Mariba sebepi i religija. 2. Prvo svetsko rat. 3. Jekh pravoslavno sveštenik blagoslovini jekhe vojniko. 4. Jekh pastor ki Afrika vaćeri te maren pe o plemenija maškaro peste. 5. O vojnikija kotar Japan mothovena čast e carese. — Ko but religije nane mangipe

6. O Devel mangela te pomožini e manušenđe te ikljon kotar religije kola lađaćerena le

Čitinen Otkrivenje 18:4,a hem palo odova vaćeren ando akava pućibe:

Sar upro tute utičini odova so o Devel mangela te pomožini e manušenđe te ikljon kotar religije kola lađaćerena le?

7. Sikljov hem ponodri kotar ćaćutno Devel

Da li odova so ćerela pe ko but religije valjani te durjaćeri tut ando Devel? Zamislin jekhe ćhave kova na šunela pe dade, ikljola ando ćher hem ćerela but lošna buća. E dadese na sviđini pe odova so oleso ćhavo ćerela. Ama, da li tano o dad krivo aso odova so ćerela oleso ćhavo?

Da li tano šukar te phena soj tano o Jehova krivo aso odova so but religije ćerena? Da li sebepi odova valjani te ćhinava te sikljova olestar?

AKO NEKO PHENELA: „Sa o religije tane šukar. On sikavena amen kotar šukar buća.“

So tu mislineja odolestar?
Iako but religije phenena so sikavena amen ando šukar buća, da li o Devel prihvatini sa o religije?

SO SIKLJILJAM

But religije lađaćerena e Devle odoleja so sikavena hem odoleja so ćerena. Pana hari, o Devel ka uništini len.

Te ponovina

So tu mislineja ando odova so but religije sikavena hem so ćerena?
So o Jehova mislini kotar religije kola lađaćerena le?
So ađićeri e religijen kola lađaćerena e Devle?

O dive ked završinđan i lekcija:

Ćhiv tuće cilj

Ko aver sastanko puć nekas: „Sose tu uljan e Jehovaso svedoko?“

Pana diso:

Pana diso

RODE POBUTER

Sikljov ko kola duj načinija but religije lađaćerena e Devle.

„Da li sa o religije pomožinena amen te ova paše e Devleja?“ (članko ko amaro sajt)

Da li o Jehova rodela amendar te služina olese zajedno avere manušencar?

„Da li valjani te ova deo andi disavi religija?“ (članko ko amaro sajt)

Jekhe sveštenikose na sviđinđa pe odova so dikhlja ki pi religija. Ama, odova na ćhinavđa le te sikljol ando ćaćutno Devel.

„Sose jekh svešteniko mukhlja pi crkva?“ (Probudite se!, februar 2015)

Beršencar, o religije vaćerena hovajba ando Devel hem odolese o manuša mislinena so o Devel tano okrutno hem soj tano dur amendar. Čitin kola tane odola trin hovajba hem sikljov savo tano ćaće o Devel.

„Da li tano pharo te manga e Devle?“ (Stražarska kula, 1. novembar 2013)

a Dikh o 1. dodatko, te šaj te đane sose ki knjiga Otkrivenje ando religije kolen o Devel na prihvatini vaćeri pe sar andi romni koja vićini pe Baro Vavilon.