So ađićeri sa e religijen?

1. Da li tane sa o religije šukar?

Ko sa o religije isi manuša kola ćaće mangena e Devle. I šukar vest tani so o Devel dikhela asavke manušen hem brinini pe olendar. Ama, disave manuša koristinena i religija te bi ćerena lošna buća (2. Korinćanima 4:3, 4; 11:13-15). Avdije, ko vestija šaj te šuna so disave religije tane uključime ko terorizam, genocid, maribe hem ko seksualno zlostavljanje ando ćhave. Sa odova but pharo perela okolenđe kola ćaće verujinena ko Devel! Čitin Matej 24:3-5, 11, 12.

Đi i pravo religija slavini e Devle, i hovavni religija lađaćeri le. Oj sikavi o buća kola na nalazinena pe ki Biblija, sar soj tane o hovavne sikljoviba ando Devel hem ando meribe. Ama, o Jehova mangela o manuša te đanen o ćaćipe olestar. Čitin Jezekilj 18:4 hem 1. Timoteju 2:3-5.

2. So ađićeri e religijen ki budućnost?

E Devle našti te hovaven o religije kola samo vaćerena so mangena le, a ki aver strana dićhola so mangena e Bengeso sveto (Jakovljeva 4:4). Ko e Devleso Lafi, sa o hovavne religije tane vićime „Baro Vavilon.“ O Vavilon hine i purani diz kuri počminđa i hovavni religija, palo Potop kova hine ko e Nojese dive. Pana hari, o Devel ka uništini sa e religijen kola hovavena hem ćerena pharipa e manušenđe. Čitin Otkrivenje 17:1, 2, 5, 16, 17; 18:8.

Ama, odova nane sa. O Jehova na bistrela e iskreno manušen kola pripadinena ko razna hovavne religije ko celo sveto. Ov ćedela len ko jekhipe ađahar so sikavi len ando ćaćipe. Čitin Mihej 4:2, 5.

3. So valjani te ćeren o manuša kola ćaće mangena e Devle?

O Jehova brinini pe ando manuša kola mangena o ćaćipe hem o šukaripe. Ov vićini len te ikljon andi hovavni religija. O manuša kola mangena e Devle spremna tane te menjinen pe te bi ugodinena lese. Čitin Otkrivenje 18:4.

Ked ko prvo veko o apostolija propovedinđe i šukar vest, o manuša kola ćaće manglje e Devle, vilestar prihvatinđe la. On sikljilje ando Jehova sar te ovel len pobahtalo đivdipe kova isi le svrha hem i nada. On tane but šukar primer amenđe avdije, sose prihvatinđe i šukar vest hem ćhivđe e Jehova ko prvo than ko po đivdipe. Čitin 1. Solunjanima 1:8, 9; 2:13.

O Jehova vilestar prihvatini sa e manušen kola aćhavena i hovavni religija. Ako prihvatinena e Jehovaso poziv, ka oven amala oleja hem ka oven deo andi mangli porodica kuri pripadinena o prava hrišćanija kola obožavinena e Jehova. Isto ađahar, ka ovel tumen prilika večno te živinen. Čitin Marko 10:29, 30 hem 2. Korinćanima 6:17, 18.

4. Sar o Devel ka anel bahtalipe sa e manušenđe?

I šukar vest tani odija so i hovavni religija uskoro ka ovel uništimi. Odova ka oslobodini e manušen sose palo odova, i hovavni religija više niked na ka prevarini len hem na ka odvojini len. Sare ki phuv ka oven ko jekhipe ađahar so ka obožavinen e jedino ćaćutne Devle. Čitin Otkrivenje 18:20, 21; 21:3, 4.