10. LEKCIJA
Sar šaj te đana koja tani i pravo religija?
1. Da li isi samo jekh pravo religija?
„Arakhen tumen ando hovavne prorokija“ (MATEJ 7:15).
O Isus sikavđa pe učenikonen so isi samo jekh religija koja tani pravo. Oj tani sar jekh drumo kova ljegari ko večno đivdipe. O Isus kotar akava drumo phenđa: „Hari đene arakhena le“ (Matej 7:14). O Devel prihvatini samo o obožavanje kova temeljini pe ko oleso Lafi, i Biblija. Sa o prava e Devlese sluge tane ujedinime ki jekh vera. Čitin Jovan 4:23, 24; 14:6; hem Efešanima 4:4, 5.
Dikh o kratko film Da li Bog prihvata sve religije?
2. So o Isus phenđa ando hovavne hrišćanija?
„On phenena so penđarena e Devle, ama odrekninena pe olestar pe delijencar“ (TITU 1:16).
O Isus upozorinđa so o hovavne prorokija ka ruminen o hrišćanstvo. Avrijal, on izgledinena sar o prava hrišćanija. Čak hem olenge crkve phenena odova. Ama, palo olenge delija šaj te dikhe koj tane on u stvari. Samo i pravo religija šaj te ćerel ando manuša te oven prava hrišćanija, kola šaj te penđaren pe premalo olenge osobine hem delija. Čitin Matej 7:13-23.
3. Sar šaj te penđare e pravo hrišćanen?
Dikh akala panđ buća:
O prava hrišćanija poštujinena i Biblija sar e Devleso Lafi. On dena sa pestar te živinen premalo e biblijake načelija. Odolese tani i pravo religija averćhane ando religije kola temeljinena pe ko e manušenge ideje (Matej 15:7-9). O prava hrišćanija na propovedinena jekh, a ćerena diso aver. Čitin Jovan 17:17 hem 2. Timoteju 3:16, 17.
E Isusese prava sledbenikija slavinena e Devleso anav, Jehova. O Isus slavinđa e Devleso anav ađahar so vaćerđa olestar. Ov pomožinđa e manušenđe te upoznajinen e Devle hem sikavđa len te molinen pe te svetini pe oleso anav (Matej 6:9). Koja religija, ko than kuri tu živineja, sikavi e manušen ando e Devleso anav? Čitin Jovan 17:26 hem Rimljanima 10:13, 14.
O prava hrišćanija propovedinena ando e Devleso Kraljevstvo. O Devel bićhalđa e Isuse te propovedini i šukar vest ando Kraljevstvo. E Devleso Kraljevstvo tano jedino nada aso sa o manuša. O Isus vaćerđa olestar sa đi na mulo (Luka 4:43; 8:1; 23:42, 43). Ov phenđa so hem olese sledbenikija ka propovedinen ando odova Kraljevstvo. Ako neko avela te vaćeri tuvaja ando e Devleso Kraljevstvo, so mislineja, ki koja religija ov pripadini? Čitin Matej 24:14.
E Isusese sledbenikija nane deo ando akava lošno sveto. Šaj te penđare len premalo odova so na mešinena pe ki politika ja ko disave protestija hem štrajkija (Jovan 17:16; 18:36). Isto ađahar, na ćerena lošna buća sar o manuša ko sveto hem na oponašinena olenge stavija. Čitin Jakovljeva 4:4.
O prava hrišćanija mangena jekh jekhe ando vilo. Ando e Devleso Lafi, on sikljona te poštujinen e manušen ando sa o narodija. I hovavni religija but putija podupirini o mariba maškaro narodija, a o prava hrišćanija odbinena te ćeren odova (Mihej 4:1-3). Isto ađahar, on nesebično koristinena po vreme hem sa so isi len te bi pomožinena averenđe hem te bi ohrabrinena len. Čitin Jovan 13:34, 35 hem 1. Jovanova 4:20.
4. Šaj li te penđare i pravo religija?
Koja religija temeljini sa pe sikljoviba ko e Devleso Lafi, slavini e Devleso anav hem propovedini so e Devleso Kraljevstvo tano jedino nada aso sa o manuša? Kola manuša mothovena mangipe hem na đana ko mariba? So tu mislineja? Čitin 1. Jovanova 3:10-12.