57. LEKCIJA
So ako ka ćere disavo ozbiljno greh?
Sare amen but mangaja e Jehova hem daja sa amendar te na ćera diso so ka povredini le. Ama, podijekh puti šaj ka grešina diso. Disave grehija tane but ozbiljna (1. Korinćanima 6:9, 10). Ako jekh dive ka ćere disavo ozbiljno greh, ma bistri so ništa našti te ćhinavi e Jehova te mangel tut. Ov tano spremno te oprostini tuće hem te pomožini tut.
1. So valjani te ćera te šaj o Jehova te oprostini amenđe?
Ked okova kova mangela e Jehova haljola so ćerđa disavo ozbiljno greh, olese tano but pharo. Ama, but bari uteha šaj te del le odova so o Jehova phenđa pe narodose: „Ako tane tumare grehija sar i loli boja, ka oven parne sar o iv“ (Isaija 1:18). Ako kajinaja amen celone vileja, o Jehova ka oprostini amenđe. Amen mothovaja so kajinaja amen ked ćhinavaja te ćera odova soj tano lošno hem ked molinaja e Jehova te oprostini amenđe. Isto ađahar, daja sa amendar te menjina amaro način sar razmislinaja hem o buća kola legarđe amen te ćera odova greh hem trudinaja amen te živina premalo Jehovase načelija. (Čitinen Isaija 55:6, 7.)
2. Sar o Jehova pomožini amen prekalo starešine?
Ako neko ćerđa ozbiljno greh, o Jehova phenela „nek vićini e starešinen andi skupština.“ (Čitinen Jakovljeva 5:14, 15.) On but mangena e Jehova hem okolen so služinena olese. O Jehova sikavđa e starešinen sar te pomožinen amen palem te ova paše oleja (Galatima 6:1).
Sar ka pomožinen amen o starešine? Duj ja trin starešine ka koristinen e Devleso Lafi te pomožinen amen te haljova sose tano pogrešno odova so ćerđam. On ka den amen savetija kola ka pomožinen amen te na ćera palem odova isto greh. Ama, ako neko ćerđa ozbiljno greh hem na kajini pe aso odova, o starešine ka ciden odola osoba andi skupština te bi zaštitinena averen.
SIKLJOV POBUTER
Ako ćerđam disavo ozbiljno greh, sar o Jehova pomožini amen hem sar šaj te ova zahvalna aso odova?
3. Ked phenaja so ćerđam, palem šaj te ova paše e Jehovaja
Ked ćeraja disavo ozbiljno greh, amen povredinaja e Jehova. Odolese valjani sa te phena olese. Čitinen Psalam 32:1-5, hem palo odova vaćeren ando akava pućibe:
Sose na valjani te garava ando Jehova odova so ćerđam?
Uzo odova so amare grehija ka phena e Jehovase, ka ovel amenđe polokho ako rodaja pomoć ando starešine. Dikhen o VIDEO, hem palo odova vaćeren ando akava pućibe.
Sar o starešine pomožinđe e Kanonese te irini pe e Jehovase?
Valjani te ova phravde e starešinencar sose on tane odothe te pomožinen amen. Čitinen Jakovljeva 5:16, hem palo odova vaćeren ando akava pućibe:
Sose e starešinenđe ka ovel polokho te pomožinen amen ked hijam phravde olencar?
Ma garav to greh, ov phravdo e starešinencar hem mukh e Jehova te pomožini tut
4. O Jehova mothovi milosrđe okolenđe so grešinđe
Ako neko ćerđa ozbiljno greh hem na mangela te ćhinavi odoleja hem te ićeri pe ko Jehovase načelija, ov više našti te ovel deo andi skupština. Amen više na družinaja amen oleja hem na vaćeraja oleja. Čitinen 1. Korinćanima 5:6, 11, hem palo odova vaćeren ando akava pućibe:
O humer ušljola ked ćhivela pe kvasco. Tegani, sar upri skupština šaj te utičini i osoba koja na kajini pe?
O starešine oponašinena e Jehovaso milosrđe hem odolese trudinena pe te đan hem te pomožinen okolenđe kola tane cidime andi skupština te irinen pe. But phralja hem phenja kola irinđe pe ki skupština haljilje, so iako hine lenđe but pharo, odija disciplina pomožinđa lenđe te haljon so odova so ćerđe tano pogrešno (Psalam 141:5).
Sar o način ko kova o Jehova postupini okolencar so grešinena mothovi soj tano razumno, milosrdno hem pherdo mangipe?
5. O Jehova oprostini amenđe ked kajinaja amen
O Isus vaćerđa jekh priča koja pomožini amen te haljova sar o Jehova osetini pe ked neko kajini pe. Čitinen Luka 15:1-7, hem palo odova vaćeren ando akava pućibe:
So sikljovaja ando Jehova kotar akija priča?
Čitinen Jezekilj 33:11, hem palo odova vaćeren ando akava pućibe:
Sar šaj te mothova so ćaće kajinaja amen?
Sar o pastiri, o Jehova brinini pe ando pe bakre
AKO NEKO PHENELA: „Darava so više na ka ovav deo andi skupština ako phenava e starešinenđe so ćerđum.“
So šaj te phene nekase ko ađahar mislini?
SO SIKLJILJAM
O Jehova ka oprostini amenđe čak hem disavo ozbiljno greh ako kajinaja amen ando vilo hem daja sa amendar te ćhinava te ćera odova soj tano lošno.
Te ponovina
Sose na valjani te garava amare grehija ando Jehova?
So valjani te ćera te šaj te oven oprostime amare grehija?
Ako jekh dive ka ćera disavo ozbiljno greh, sose valjani te roda pomoć ando starešine?
RODE POBUTER
Dikh sar o Jehova jekhe manušese mothovđa milosrđe ando kova vaćeri pe ko Isaija 1:18.
Sar o starešine pomožinena okolenđe kola ćerđe ozbiljno greh?
Dikh sar mothovi pe mangipe hem milosrđe premalo okola so na kajinena pe.
Ko iskustvo „Morandiljum te irinav man e Jehovase“ čitin sar jekh manuš osetinđa so o Jehova mangela te irini pe olese.
„I Biblija pomožini e manušenđe te menjinen po životi“ (Stražarska kula, 1. april 2012)