Da lji o Devel džanela sar tano amendže?

SO SIKAVIMEN ODOVA SO ČERDŽA O DEVEL

Te šaj te džana sar tano averendže, amen valjani te osetina oljengi dukh ko odova so nakhena, adžahar so ka čhiva ki godi sar bi ovela amendže ked bi ova ko oljengo than. O doktori Rik Hanson kova tano psiholog phenela „soj tano hor ano amaro vilo te manga te džana sar tano averendže“.

RAZMISLIN AKALJESTAR: Sose samo o manuša šaj te džanen sar tano averendže? I Biblija mothovi so o Devel čerdža e manušen premalji piklji slika (1. Mojsieso 1:26). Odova vačeri amendže so šaj te ova sar oljeste hem so šaj te mothova oljese šukar osobine. Odoljese, ked o manuša pomožinena sebepi so mangena te džanen sar tano averendže, tegani mothovena soj tane sar o Devel, o Jehova, kova čerdžaljen (Godžalje lafija 14:31).

SO SIKLJOVA ANDI BIBLIJA ODOLJESTAR SO O DEVEL DŽANELA SAR TANO AMENDŽE

O Devel džanela sar tano amendže hem mrzini ked dikhela so amen isimen muke. Na primer, ko purano vakti o Izraelcija hine robija ko Egipat hem palo odova hineljen but muke dži hine 40 berš ki pustinja. I Biblija mothovi sar hine tegani e Devljese: „Ko sa oljenge pharipa hem olje dukhala hine“ (Isaija 63:9). Premalo akava šaj te dikha so o Devel na džandža samo oljenge pharipa, nego hem osetija oljengi dukh. Ov vačerdža: „Šukar džanava oljenge dukha so isiljen“ (2. Mojsieso 3:7). Isto adžahar pheja: „Ko takini tumen, takini man andral ki mi jakh“ (Zaharija 2:8). Ked avera dukhavena amen, tegani hem olje dukhala.

Amen šaj mislina so na hijam nisose hem so na vredina o Devel te džanel sar tano amendže. Ama, i Biblija phenela: „O Devel tano pobaro kotar amaro vilo hem džanela sa“ (1. Jovaneso 3:19, 20). O Devel pendžari amen but pošukar, nego lji so amen pendžara kokri amen. Ov džanela sa so amen nakha ko amaro dživdipe, sa so isimen ki godi hem ko vilo. O Devel čače džanela sar tano amendže.

So sikljova ando Devljeso Lafi

• „Ako tegani ka vičine e Jehova, ov ka šuneltu. Ako rodeja te pomožinitu, ov ka phenel: ’Ače akate hijum‘“ (ISAIJA 58:9).

• „’Sose me džanava so mangava te dav tumen‘, vačeri o Jehova, ’mangava te dav tumen rahati, a na pharipe, te dav tumen dive ko vakti so avela hem nada. Tumen ka vičinen man, ka aven koro mande hem ka moljinen tumen maje, a me ka šunav tumen‘“ (JEREMIJA 29:11, 12).

• „Meklje asva čhiveja ko toklo khoro andi morti. Nane lji on pisime ki tiklji knjiga?“ (PSALAM 56:8).

O DEVEL DIKHELA, HALJOLA HEM DŽANELA SAR TANO AMENDŽE

Ked isimen pharipa, da lji šaj te pomožini amen odova so o Devel džanela sar tano amendže? Te dikha so nakhlja i Marija:

„Mo čhavo duj berš hine nabormo kotar rak. Ked hinelje 18 berš mulo. Tegani hine man but bari dukh hem ko dživdipe hine maje sa kalo. Hijumlje but holjami upro Jehova sose na čerdža diso te sačari me čhave.

„Palo šov berš, jekh mi šukar hem manglji amaljin kotar dvorana, šujama ked phradžum olače mo vilo hem phejum so o Jehova na mangela man. Palo odova so but sača šujama bizo te čhinavima, vačerdža maje jekh stih kova khudža maje ko vilo. Odova hine o 1. Jovaneso 3:19, 20 kuri phenela: ’O Devel tano pobaro kotar amaro vilo hem džanela sa.‘ Vačerdža maje so o Jehova haljola amare pharipa.

„Ama, palo sa odova me pana hijumlje holjami upro Devel! Tegani čitijum o Psalam 94:19 kuri phenela: ’Ked ani mi godi isi but gajlje, ti uteha čerela te ovelma rahati.‘ Akala lafija samči hine pisime samo maje! Sar dželo o vakti, šaj hine te vačerav e Jehova ando odova so dukhalama, adžahar arakhljum rahati sose džandžum so ov šunela hem haljola man.“

Kobor tano šukar te džana so o Devel haljola amen hem džanela sar tano amendže! Ama sose isi odobor muke? Da lji o Devel kaznini amen sebepi so čerdžam diso lošno? Da lji o Devel ka čerel diso te cidel sa o muke? Akaljestar ka vačera ko avera člankija.