Vredini te živine!

O Fajzal morandilo te đal ki but phari operacija ando vilo samo berš dive palo odova so olesi romni mulji. Ov phenela: „Ked čitinđum i knjiga ando Jov, haljiljum sose o Jehova manglja oj te ovel deo andi Biblija. Ked arakhaja diso so odnosini pe upro amende hem upri amari situacija, tegani ovela amenđe polokho hem haljovaja so vredini te živina.“

I Tarša hine but terni ked mulji olaki daj. Oj phenela: „Ked penđarđum e Stvoritelje haljiljum sose živinava. Odova dinđa man nada hem radost, iako hine man but pharipa. E Jehova našti ništa te ćhinavi te ovel uzo amende hem te pomožini amen te borina amen ando dive ko dive.“

KO PRETHODNA člankija dikhljam so sebepi razna traume šaj te dićhol amenđe so na vredini te živina. Sebepi o problemija, šaj pućeja tut da li valjani te borine tut hem da li neko brinini pe tutar. Ama, ov sigurno so o Devel brinini pe tutar. Ov but mangela tut.

O pisco ando 86. psalam mothovđa so isi le poverenje upro Devel hem phenđa: „Vićinava tut ko dive andi nevolja, sose đanava so ka odgovorine maje“ (Psalam 86:7). Ama, šaj pućeja tut: „Sar šaj o Devel te pomožini man?“

Iako o Devel na ka cidel odmah amare problemija, ko po Lafi ov obećinđa so ka del amen snaga hem mir. Koro leste pisini: „Ma brininen tumen nisose, nego sa tumare brige vaćeren e Devlese ki molitva, celone vileja molinen tumen olese hem zahvalinen tumen olese. Hem e Devleso mir, kova tano upreder odova so o manuš šaj te haljol, ka arakhi tumaro vilo hem [tumare mislija]“ (Filipljanima 4:6, 7, fusnota). Zapazin sar akala biblijake stihija mothovena so o Devel mangela tut.

O Devel brinini pe tutar

„O Devel na bistrela nijekhe [vrapco] ... Tumen hijen povredna ando but vrapcija“ (Luka 12:6, 7).

SO ODOVA ZNAČINI TUĆE: E Devlese tane važna čak hem o tikne ćiriklja kolen niko na primetini. Ov primetini čak hem e najtikne vrapce sose olese tane dragocena sa o stvorenja. Naravno, e Devlese o manuša tane but povredna ando vrapcija. Ando sa so o Jehova stvorinđa ki phuv, o manuša tane posebna sose isi len sposobnost te mothoven ista osobine kola ov isi le (Postanak 1:26, 27).

„Jehova, tu hor dikhljan ano mande hem penđareja man [...] Dural đaneja so isi man ki godi [...] Ispitin hem dikh me mislija kola uznemirinena man“ (Psalam 139:1, 2, 23).

SO ODOVA ZNAČINI TUĆE: O Devel šukar penđari tut. Ov đanela te najhor osećanja hem te brige. Iako avera podijekh puti na haljona kobor tano tuće pharo, o Devel brinini pe tutar hem mangela te pomožini tut. Odolese, vredini te živine.

O Devel ka pomožini tut

„Jehova, šun mi molitva hem šun man ked vićinava tut. [...] Teljov hem šun man, sigate odgovorin maje ked vićinava tut. [...] Ka šunel o molitve okolenge kola aćhilje bizo ništa“ (Psalam 102:1, 2, 17).

SO ODOVA ZNAČINI TUĆE: O Jehova na bistrela nijekh asvi koja đelji amendar sebepi razna pharipa (Psalam 56:8). Odova odnosini pe hem upro tute. Sebepi so but mangela tut, ov na bistrela te asva hem te problemija.

„Ma brinin tut, sose me hijum to Devel. Me ka zorjaćerav tut hem ka pomožinav tut. [...] Me, o Jehova, to Devel [...] phenava tuće: ’Ma dara. Me ka pomožinav tut‘“ (Isaija 41:10, 13).

SO ODOVA ZNAČINI TUĆE: O Devel tano spremno te pomožini tut. Ako pereja, ov ka vazdel tut.

Isi nada asi pošukar budućnost

„O Devel odobor manglja o sveto so dinđa pe jedinobijande Ćhave, te na ovel uništimo nijekh kova mothovi vera ano leste, nego te ovel le večno životi“ (Jovan 3:16).

SO ODOVA ZNAČINI TUĆE: O Devel odobor mangela tut so pe ćhave, e Isuse, dinđa tuće. Sebepi odova šaj te nadine tut so zauvek radosno ka živine.a

Akana šaj isi tut bare problemija hem mislineja so našti više te izdržine. Ama, ako proučineja e Devleso Lafi hem ako zorjaćereja ti vera ko Devlese obećanja, odova ka pomožini tut te ove bahtalo hem ka irini pe tuće želja te živine.

a Ako mangeja te đane pobuter ando odova kobor tani e Isusesi žrtva važno amenđe, dikh o video Setin tut ko Isuseso meribe ko amaro sajt www.jw.org. Đa ko deo AMENDAR > SPOMEN SVEČANOST.