HRIŠĆANSKO DŽIVDIPE
Ki kupa čera i služba ko terenja kuri vačerenape but čhibja
O manuša pošukar šunena o šukar haberi ked vačera ki oljengi dajaki čhib. Sebepi odova šaj ki Pedesetnica ko 33. berš ki amari era, o Jehova čerdža „o verna Judejci ando sa o narodija“ te šunen o šukar haberi ki pi dajaki čhib, iako džandže te vačeren o čhibja sar soj tane hebrejsko hem grčko (Čer 2:5, 8). Avdije ko thana kuri vačeripe but čhibja, o skupštine kola ičerena o sastankija ko odola čhibja šaj isiljen ista terenja. Sar o phralja hem o phenja ko asavke skupštine šaj ki kupa te vačeren o šukar haberi, a te na avel dži odova te džan ko ista manuša, sose odova šaj te holjančeri oljen?
Vačeren maškaro tumende (Godž 15:22). O nadglednikija andi služba valjani te vačeren jekh jekheja hem te dikhen sar šaj o phralja hem o phenja ko najšukar način te vačeren o šukar haberi. Ako oljenge terenja tane but tikne, tegani o skupštine kola vačerena o šukar haberi ki aver čhib šaj ka mangen tumari skupština te na džal ko čhera kola tane ko oljenge terenja. Ama, ako on našti te čeren redovno sa peklje terenja, sose tane odola terenja but dur, tegani šaj on ka mangen o phralja hem o phenja kotar tumari skupština te džan ko svako čher hem te vačeren oljendže ked džiko ko oljengo tereni mangela te džanel pobuter (od-SBO 93 ¶37). Isto adžahar, on šaj te pučen disavi skupština te pomožiniljen te roden e manušen kola vačerena oljengi čhib hem te bičhaljen oljendže o adrese ando odola manuša (km-SBO 7/12 5, okvir). Ičer ki godi so disavo puti ko jekh čher šaj vačeripe pobuter čhibja. Dži čera o terenja kuri vačerenape but čhibja, amen valjani te šuna o zakon kova phenela amendže so našti te khuva ki džikasi privatnost.
Čeren ki kupa (Ef 4:16). Ičertu ko sa o uputstvija kola delatu o nadglednik andi služba. Da lji isitu biblijako kurs džikasa ko vačeri aver čhib? O manuš so sikljola andi Biblija šaj posigate te haljol hem te ičeripe ko sa odova so sikljola, ako tu deja toklo biblijako kurs e skupštinače ja e grupače koja tani ki oljesi čhib.
Spreminen tumen (Godž 15:28; 16:1). Ako o manuš ko to tereni vačeri aver čhib, tegani de sa tutar te vačere oljese o šukar haberi. Šaj te spreminetu adžahar so ka dikhe savi čhib o manuša vačerena ko toklo tereni hem palo odova huljav ko to telefoni ja ko tablet i Biblija hem o filmija ko odola čhibja. Isto adžahar, šaj te koristine i aplikacija JW Language te šaj te sikljove sar te pozdravineljen ki oljengi čhib.