Da li tano averenđe lokho te prihvatinen toklo savet?

1-2. So jekh phral sikljilo ando odova sar valjani te del pe savet?

ANGLEDER but berša, duj starešine posetinđe jekha phenja koja na hine redovno ko amare sastankija. Jekh ando starešine phravđa laće nekobor stihija kola mothovena sose tano važno te ovel redovno ko sastankija. On mislinđe so odola stihija ka ohrabrinen la. Ama, ked pođinđe i phen phenđa lenđe: „Tumen hić na haljona save problemija me isi man.“ O phralja dinđe savet e phenjaće iako na đanđe kola problemija oj isi la. Sebepi odova, oj na dikhlja sar odova savet šaj te pomožini laće.

² Ked setini pe ko odova iskustvo, odova starešina phenela: „Tegani mislinđum so odija phen na poštujini amen. Ama, hari palo odova haljiljum so umesto so razmislinđum samo kola stihija valjani te čitinav laće, valjanđum te razmislinav andi mi phen hem te pućav la: ’So isi koro tute? Sar šaj te pomožinav tut?‘“ Odova starešina but sikljilo kotar odija situacija. Avdije, ov tano jekh saosećajno hem šukar pastiri.

3. Ko šaj te del savet ki skupština?

³ Sar pastirija, o starešine tane odgovorna te den savet ked odova valjani. Ama, podijekh puti hem avera ki skupština valjani te den savet. Na primer, jekh phral ja jekh phen šaj te del savet andi Biblija pe amalese (Ps. 141:5; Posl. 25:12). Ja jekh phureder phen šaj te del savet jekha poterna phenjaće ando buća kolendar vaćeri pe ko Titu 2:3-5. But putija, o roditeljija valjani te den savet pe ćhavenđe hem te sikaven len te ćeren odova soj tano šukar. Iako akava članko tano posebno ćerdo e starešinenđe, sare amen šaj te sikljova sar šaj te da savet kova hem ka pomožini averenđe hem ka zorjaćeri len (Posl. 27:9).

4. Sostar ka vaćera ko akava članko?

⁴ Ko akava članko ka vaćera ando štar pućiba: (1) Sose daja savet? (2) Da li ćaće valjani te da savet? (3) Ko valjani te del savet? (4) Sar šaj te da šukar savet?

SOSE DAJA SAVET?

5. Sostar valjani te razmislini jekh starešina angleder te del savet? (1. Korinćanima 13:4, 7)

⁵ O starešine mangena pe phralen hem pe phenjen. Podijekh puti, on odova mothovena ađahar so dena savet nekase koj tano ko drumo te ćerel greh (Gal. 6:1). Angleder te vaćeren odola osobaja, šukar tano o starešine te razmislinen ando disave buća kola o Pavle vaćerđa ando mangipe: „O mangipe tano strpljivo hem šukar. . . Sa podnosini, sa verujini, uvek nadini pe, sa trpini.“ (Čitin 1. Korinćanima 13:4, 7.) Ked jekh starešina hor razmislini ando akala stihija, odova ka pomožini lese te haljol da li o savet dela odolese so mangela odole phrale ja odola phenja. Ked o phralja hem o phenja osetinena so o starešina brinini pe olendar, olenđe ka ovel but polokho te prihvatinen odova savet (Rimlj. 12:10).

6. Sose tano o apostol Pavle šukar primer?

⁶ O apostol Pavle hine but šukar starešina. Na primer, ov dinđa savet e phralenđe ko Solun ked odova valjanđa. Ked pisinđa lenđe, o apostol Pavle najangleder pohvalinđa len asi olengi vera, istrajnost hem aso olengo mangipe. Isto ađahar, ov razmislinđa olendar, đanđa so olenđe nane lokho hem soj tane verna iako tane progonime (1. Sol. 1:3; 2. Sol. 1:4). Ov čak phenđa lenđe soj tane šukar primer averenđe (1. Sol. 1:8, 9). Odola phralja hem phenja sigurno hine but bahtale sebepi so o apostol Pavle ađahar pohvalinđa len. O apostol Pavle but manglja e phralen. Odolese, ov dinđa šukar savet odole phralenđe ko solduj lila (1. Sol. 4:1, 3-5, 11; 2. Sol. 3:11, 12).

7. Sose nekase šaj te ovel pharo te prihvatini o savet?

⁷ So šaj te ovel ako na daja savet ko šukar način? Jekh iskusno starešina phenela: „Disave na mangena te prihvatinen o savet, na sebepi so o savet nane ko than, već sose nane dindo ko šukar način.“ So sikljovaja akalestar? But tano polokho te prihvatina o savet ked neko dela amen savet sebepi so mangela amen, a na sebepi soj tano holjamo.

DA LI ĆAĆE VALJANI TE DA SAVET?

8. So jekh starešina valjani te pućel pe angleder te del savet nekase?

⁸ O starešine na valjani te siđaren te den savet. Angleder te den savet, on valjani te pućen pe: „Da li ćaće valjani te dav savet? Da li hijum sigurno so odija osoba ćaće ćerela diso pogrešno? Da li i Biblija mothovi soj tano pogrešno odova so ćerela ja samo me na bi ćerava ađahar?“ Jekh mudro starešina na ka „vaćeri bizo te razmislini“ (Posl. 29:20). Ako jekh starešina nane sigurno da li valjani te del savet, ov šaj te pućel avere starešina da li hem ov mislini so odija osoba ćerela diso so nane premalo Devleso Lafi hem da li valjani te den la savet (2. Tim. 3:16, 17).

9. So sikljovaja ando apostol Pavle, sar valjani te da savet ando urajbe? (1. Timoteju 2:9, 10)

⁹ Te dikha jekh primer. Zamislin so jekh starešina mangela te del savet jekhe phralese ja jekha phenjaće ando urajbe. Odova starešina šaj te pućel pe: „Da li isi man biblijako razlog te dav savet?“ Ov đanela so na valjani te vaćeri poklo lično mišljenje. Odolese, šaj te pućel avere starešina ja jekhe zrelo objavitelje so ov mislini. On šaj zajedno te dikhen kova savet o apostol Pavle dinđa ando urajbe. (Čitin 1. Timoteju 2:9, 10.) O apostol Pavle dinđa disave načelija kola mothovena so amaro urajbe valjani te ovel pristojno, skromno hem te na lađaćeri e Devle. Ama, ov na ćhivđa pravilija so neko šaj, a so našti te uravi. Ov đanđa so o phralja hem o phenja šaj te uraven odova so mangena sa đi odova tano premalo biblijake načelija. Odolese ked o starešine razmislinena da li valjani te den savet, on najangleder razmislinena da li o urajbe andi odija osoba mothovi soj tani skromno hem razborito.

10. Sose valjani te poštujina averenge odluke?

¹⁰ Na valjani te bistra so duj hrišćanija šaj te anen duj različita odluke hem odova na značini so jekhesi tani šukar, a averesi tani lošno. Na valjani te ćhiva averen te ćeren odova so amen mislinaja soj tano šukar (Rimlj. 14:10).

KO VALJANI TE DEL SAVET?

11-12. Ked valjani te del savet, so o starešina valjani te pućel pe hem sose?

¹¹ Ako ipak valjani nekase te del pe savet, tegani: „Ko valjani te del odova savet?“ Angleder te del savet jekha phenjaće koja tani ko rom ja jekhe ćhavese, o starešina valjani te vaćeri e poglavareja andi odija porodica, kova šaj ka mangel kokri te vaćeri pe romnjaja ja pe ćhaveja.b Ja o poglavari šaj ka pućel te ovel odothe ked o starešina dela savet. Ja sar so dikhljam ko trito odlomko, podijekh puti ka ovel pošukar jekh phureder phen te del savet jekha poterne phenjaće.

¹² Isi pana jekh buti andi koja o starešina valjani te razmislini. Ov valjani te pućel pe: „Da li ka ovel šukar me te dav savet ja ka ovel pošukar neko aver te ćerel odova?“ Na primer, jekh osoba borini pe odoleja te poštujini kokri pes. Olaće šaj ka ovel polokho te prihvatini o savet ando starešina kova borinđa pe odoleja sose ov šaj te haljol odola osoba. Ama, so ako ki skupština nane nijekh starešina kova hine le asavko slično problemi? Sa o starešine isi len odgovornost te ohrabrinen e phralen hem te pomožinen lenđe te menjinen pe. Odolese ked valjani te del pe savet nane najvažno da li disavo starešina doživinđa odova isto problemi, već tano važno te del pe o savet ked odova tano potrebno.

SAR ŠAJ TE DE ŠUKAR SAVET?

13-14. Sose tano važno o starešina te šunel angleder te del savet?

¹³ Ov spremno te šune. Ked jekh starešina valjani te del savet, ov valjani te pućel pe: „So đanava kotar mo phral? So desini pe ko oleso životi? Da li isi le disave problemija aso kola me na đanava? So akana najviše valjani lese?“

¹⁴ O načelo kova pisini ki Jakovljeva 1:19 šaj but te pomožini okolese kova dela savet. O Jakov pisinđa: „Svako nek ovel sigutno te šunel, a pohari te vaćeri hem pohari te holjani.“ Jekh starešina šaj te mislini so sa đanela kotar odija osoba. Ama, da li tano odova ćaće ađahar? Ko Poslovice 18:13 pisini: „Ko vaćeri angleder te šunel, odova tano olese dilinipe hem lađaćeri kokri pes.“ Pošukar tano te puća e osoba sar tano olaće. Odova značini so valjani te šuna angleder diso te vaćera. Setin tut so sikljilo o phral kolestar vaćerđam ko početko ando akava članko. Ov haljilo so na valjanđa te vaćeri odmah sa so pripreminđa, već so valjanđa te pućel e phenja: „So isi koro tute? Sar šaj te pomožinav tut?“ Ako o starešine odvojinena vreme te šunen kola problemija o phralja hem o phenja isi len, verovatno ka ohrabrinen len hem ka pomožinen len.

15. Sar šaj o starešine te ićeren pe ko načelo ando Poslovice 27:23?

¹⁵ Šukar penđar to stado. Sar so vaćerđam ko početko, te šaj o starešine te den šukar savet on na valjani samo te čitinen nekobor stihija ja te den disave predlogija. Amare phralja hem phenja valjani te osetinen so on brininena pe olendar, so haljona len hem so ćaće mangena te pomožinen lenđe. (Čitin Poslovice 27:23.) O starešine valjani te den sa pestar te oven paše pe phralencar hem pe phenjencar.

16. So ka pomožini e starešinenđe te den šukar savet?

¹⁶ O starešine na mangena o phralja hem o phenja te mislinen so on jedino vaćerena olencar ked valjani te den len savet. Odolese, on valjani redovno te vaćeren pe phralencar hem pe phenjencar hem te mothoven so brininena pe olendar ked isi len problemija. Jekh iskusno starešina phenela: „Ako ćereja odova, tu ka ove olencar amal. Tegani, ked valjani te de len savet ka ovel tuće polokho te ćere odova.“ Isto ađahar, hem e phralenđe hem e phenjenđe ka ovel polokho te prihvatinen o savet.

17. Sose tano važno o starešina te ovel strpljivo hem ljubazno?

¹⁷ Ov strpljivo hem ljubazno. Posebno tano važno te ova strpljiva hem ljubazna ked okova so dobinđa o savet ko početko na mangela te prihvatini le. O starešine na valjani te holjanen ked o phral ja i phen na prihvatini odmah odova savet ja na primenini le. Ko Devleso Lafi ando Isus hine pisimo: „I trska koja tani gazimi na ka phagel hem o fitilji kova ćurini na ka aćhavi“ (Mat. 12:20). Odolese, ked o starešina ka ovel kokri hem ked ka molini pe e Jehovase, ov ka rodel olestar te pomožini odola osobaće te haljol sose tano odova savet dindo hem te ićeri pe ko odova savet. Odola osobaće šaj ka valjani vreme te razmislini ando savet kova tano olaće dindo. Ako tano o starešina strpljivo hem ljubazno, tegani o phral ja i phen na ka razmislini ando način ko kova tano o savet dindo, već odolestar soj tano vaćerdo. Naravno, o savet uvek valjani te avel kotar Devleso Lafi.

18. (a) So na valjani te bistra ked valjani te da savet? (b) Premalo okvir hem premali slika sostar akala roditeljija vaćerena?

¹⁸ Sikljov kotar te greške. Sebepi so hijam nesavršena, amen našti savršeno te ićera amen ko savetija kola tane dinde ko akava članko (Jak. 3:2). Sare amen ka ćera greške, ama ked odova ovela, valjani te sikljova diso olendar. Ako amare phralja hem phenja osetinena so mangaja len, olenđe ka ovel polokho te oprostinen amenđe ked ka ćera ja ked ka phena diso so ka povredini len. (Isto ađahar, dikh o okvir „E roditeljenđe“.)

SO SIKLJILJAM?

19. Sar šaj averenđe te ovel lokho te prihvatinen amaro savet?

¹⁹ Sar so dikhljam, nane lokho te da šukar savet. Nesavršena hijam hem amen hem okola kase daja savet. Ićer ki godi o načelija kola sikljiljam ko akava članko. Puć tut sose deja savet. Da li odova savet tano ćaće potrebno hem da li tu valjani te de odova savet? Angleder te de o savet, puć e osoba sar tani hem pažljivo šun kola problemija isi la. De sa tutar te haljove odola osoba. Ov ljubazno hem ov amal te phralencar hem te phenjencar. Ma bistri so amaro cilj nane samo te da šukar savet, već hem te ovel lokho amare phralenđe hem e phenjenđe te prihvatinen le (Posl. 27:9).