29. ČLANKO PROUČIBASE
ĐILI 87 O sastankija zorjaćerena amen
Sikljov sar te de šukar savet
Ka dav tut savet, mi jakh ka ovel upro tute (PS. 32:8)
SO KA SIKLJOVA?
Ka dikha sar te da savet kova šaj te pomožini averenđe.
1. Ko valjani te del savet? Objasnin.
DA LI mangeja te de savet? Disavenđe odova nane pharo. Disave darana ja tano lenđe neprijatno te ćeren odova. Ama, sar god te osetina amen, sare disavo puti ka valjani te da savet. Sose? Odolese so odova tano način sar šaj te mothova mangipe amare phralenđe hem phenjenđe. O Isus phenđa so ako mangaja te ova olese učenikija amen valjani te mothova mangipe jekh jekhese (Jov. 13:35). Isto ađahar, ki Biblija pisini so ked daja „iskreno savet“ amen zorjaćeraja amaro amalipe (Posl. 27:9).
2. So o starešine valjani te ćeren hem sose? (Dikh o okvir „O savetija ko sastanko ko radno dive“.)
2 Posebno o starešine valjani te đanen sar te den šukar savet. O Jehova prekalo Isus ćhivđa len te brininen pe andi skupština (1. Petr. 5:2, 3). Jekh način sar ćerena odova tano so ko pe govorija dena amen savetija ando Devleso Lafi. Isto ađahar, disavo puti ka valjani nekase lično te den savet hem te pomožinen okolenđe kola cidinđe pe ando Jehova te irinen pe ki skupština. Sar šaj o starešine hem sare amen te da šukar savet?
3. (a) Sar šaj te sikljova te da šukar savet? (Isaija 9:6; dikh o okvir „Oponašin e Isuse ked deja savetija“.) (b) Sostar ka vaćera ko akava članko?
3 Amen šaj te sikljova te da šukar savet ađahar so ki Biblija ka istražina sar disave ćerđe odova. Najšukar primer tano o Isus Hrist. Ki Biblija olese phenela pe soj tano „Šukar Savetniko“. (Čitin Isaija 9:6.) Ko akava članko ka sikljova so šaj te ćera ked neko rodela amendar savet hem so šaj te ćera ked nekase valjani te da savet iako na rodinđa le. Isto ađahar, ka dikha kobor tano važno te da savet ko pravo vreme hem ko pravo način.
KED NEKO RODELA AMENDAR SAVET
4-5. Sostar valjani najangleder te razmisline ako neko pućela tut aso savet? Vaćer jekh primer.
4 Ked neko rodela amendar savet, sar valjani te reagujina? Šaj hijam bahtale so amaro amal isi le poverenje upro amende hem šaj ka manga odmah te da le savet. Ama, najangleder valjani te puća amen: „Da li isi man dovoljno iskustvo te šaj te savetujinav le asi odija buti?“ Podijekh puti, najšukar način sar šaj te pomožina nekase tano ađahar so ka phena lese te đal ki osoba koja isi la iskustvo hem koja ka del le šukar savet aso odova so pućlja.
5 Aće te dikha jekh primer. Zamislin so to amal phenđa tuće soj tano but nabormo. Ov počminđa te istražini disave metode sar te saćol hem pućela tut koja tani najšukar opcija. Tuće šaj sviđini pe jekh andi odija opcija. Ama, tu na hijan doktori hem na đaneja sar te pomožine lese. Najšukar način sar šaj te pomožine te amalese tano zajedno oleja te roden nekas koj tano stručno hem kova šaj te pomožini le.
6. So valjani te ćera angleder te da savet?
6 Podijekh puti šaj te mislina so amen šaj te da savet amare amalese. Ama, pošukar tano te na ćera odova odmah. Ko Poslovice 15:28 pisini so „e pravednikoso vilo razmislini angleder diso te phenel“. Odolese, čak hem ako đanaja so te phena, pošukar tano najangleder te istražina, te molina amen hem te razmislina. Ako ćeraja ađahar, amen ka da savet kova tano premali Jehovasi volja. Te dikha o primer ando prorok Natan.
7. So šaj te sikljova ando Natan?
7 O kralj David phenđa e Natanese so mangela te ćerel e Jehovaso hram. O Natan odmah phenđa lese so šaj te ćerel odova. Ama, ov najangleder valjanđa te pućel e Jehova so mislini odolestar. Sose odova hine važno? Odolese so o Jehova na manglja o David te ćerel o hram (1. Let. 17:1-4). Sar so akava primer mothovi, ked neko rodela amendar savet, amen valjani te ova mudra hem te na siđara te vaćera (Jak. 1:19).
8. Kova tano pana jekh razlog sose valjani te razmislina angleder te da nekase savet?
8 Isi pana jekh razlog sose valjani te razmislina angleder te da nekase savet. Ako daja pogrešno savet, amen šaj te ova kriva ako ka oven disave lošna posledice. Odolese, angleder te da savet, but tano važno šukar te razmislina.
SAR TE DA SAVET KED NEKO NA RODINĐA AMENDAR?
9. Ko so o starešine valjani te oven sigurna angleder te den nekase savet? (Galatima 6:1)
9 Disavo puti, o starešine valjani te den savet e phralese ja e phenjaće kola pođinđe ko „lošno drumo“. (Čitin Galatima 6:1.) Neko šaj anđa odluke kola nane mudra hem sebepi kola kasnije šaj te ćerel ozbiljno greh. O starešine mangena te pomožinen asavka osobaće te aćhol ko drumo kova legari ko večno životi (Jak. 5:19, 20). Ama, te šaj odova savet ćaće te pomožini laće, o starešine najangleder mora te dikhen da li i osoba ćaće pođinđa ko lošno drumo. O Jehova sarinenđe mukhela kokri te anen odluke premali pi savest (Rimlj. 14:1-4). Ama, so ako jekh phral ćaće pođinđa ko lošno drumo hem o starešine odlučinđe so valjani te den le savet?
10-12. So o starešine valjani te ćeren ked dena savet nekase kova na rodinđa lendar odova? Vaćer jekh primer. (Dikh o slike.)
10 E starešinenđe nane lokho te den savet nekase kova na rodinđa lendar odova. Sose? O apostol Pavle phenđa so neko šaj nane ni svesno so pođinđa ko lošno drumo. Odolese, o starešine najangleder valjani te pripreminen le te prihvatini o savet.
11 Razmislin ando akava primer. Jekh manuš mangela te sadini jekh biljka ki zorali phuv. Angleder te ćerel odova, ov hanela i phuv te šaj te kovljaćeri la hem te pripremini la aso seme. Tek palo odova, ov sadini o seme. Kasnije, ćhivela pani te šaj i biljka te barjol. Isto ađahar, angleder o starešina te del savet, ov valjani ka phene te pripremini i phuv. Na primer, ov ađićeri ked tano najšukar vreme te vaćeri oleja hem tegani phenela lese so brinini pe olese hem so isi diso sostar bi mangela te vaćeri oleja. Ako odova starešina tano penđardo sar neko koj tano šukar hem ljubazno, e phralese ka ovel polokho te prihvatini oleso savet.
12 Đi ka vaćeri odole phraleja, o starešina hem ponodri ka kovljaćeri i phuv ađahar so ka phenel so sare grešinaja hem so sarinenđe podijekh puti valjani savet (Rimlj. 3:23). Đi ka vaćeri oleja, ov ka ovel smireno hem ka mothovi lese poštovanje. Ama jasno ka mothovi lese andi Biblija so pođinđa ko lošno drumo. Ked o phral ka haljol so pogrešinđa, o starešina ka sadini o seme ađahar so ko jednostavno način ka objasnini lese so valjani te ćerel te šaj te menini pe. Ko krajo, o starešina ka ćhivel pani ko odova seme ađahar so iskreno ka pohvalini le hem ka molini pe oleja (Jak. 5:15).
O starešine mothovena mangipe hem pripreminena e osoba te prihvatini o savet kova na rodinđa lendar (Dikh kotar 10-12. odlomko)
13. Sar šaj o starešine te uverinen pe so i osoba haljilji o savet kova dobinđa?
13 Disavo puti odova so i osoba koja dela savet phenela hem odova so i osoba koja dobini savet šunela tane duj različita buća. So šaj o starešine tegani te ćeren? Valjani taktično te pućen la disave pućiba sose odova ka pomožini len te dikhen da li i osoba haljilji o savet hem da li đanela te primenini le (Prop. 12:11).
DE SAVET KO PRAVO VREME HEM KO PRAVO NAČIN
14. Sose na valjani te da savet đi hijam holjame?
14 Sare hijam nesavršena hem odolese podijekh puti ka phena ja ka ćera diso so ka povredini averen (Kol. 3:13). Ki Biblija pisini so podijekh puti šaj jekh jekhe te holjanćera (Ef. 4:26). Ama, valjani te pazina te na da savet đi hijam holjame. Sose? Odolese so „e manušesi holi na legari đi e Devlesi pravednost“ (Jak. 1:20). Ako bi tegani daja savet, verovatno ka ćera i situacija te ovel pana pološno. Odova na značini so e osobaće koja holjanćerđa amen na valjani niked te phena so mislinaja ili sar osetinaja amen. Ama, prvo valjani te ađićera te smirina amen, a palo odova te phena laće odova so mangljam. Amen šaj but te sikljova ando Elijuj, kova dinđa šukar savet e Jovese.
15. So sikljovaja ando Elijuj? (Dikh i slika.)
15 O Elijuj nekobor dive šunđa e Jove sar branini pe ando optužbe kola phenđe olese trin hovavne amala. Olese hine žao sebepi o Jov. Ama hem holjanđa upro leste. Sose? Odolese so đi pokušinđa te mothovi so nane krivo, o Jov phenđa hem disave buća ando Jehova kola na hine tačna. O Elijuj ipak hine strpljivo hem ked alo oleso redo te vaćeri, ov hine blago hem mothovđa baro poštovanje e Jovese (Jov 32:2; 33:1-7). Ando oleso primer sikljovaja diso but važno – o savetija valjani te da ked hijam smirena hem đi ćeraja odova valjani te mothova mangipe hem poštovanje (Prop. 3:1, 7).
Iako holjanđa upro Jov sebepi odova so phenđa, o Elijuj najangleder smirinđa pe hem palo odova dinđa le savet hem mothovđa lese poštovanje đi ćerđa odova (Dikh o 15. odlomko)
HEM PONODRI DE HEM PRIHVATIN SAVETIJA
16. So sikljovaja ando Psalam 32:8?
16 O vodećo stih ando akava članko phenela: „Ka dav tut savet, mi jakh ka ovel upro tute.“ (Čitin Psalam 32:8.) Odova značini so o Jehova uvek ka pomožini amenđe. Ov na samo so dela amen savetija, već hem pomožini amen te primenina len. Ked isi amen prilika nekase te da savet, amen šaj te oponašina e Jehova ađahar so ka ohrabrina le hem ka pomožina lese te anel šukar odluke.
17. Sar osetinaja amen ked o starešine dena amen savet? Objasnin. (Isaija 32:1, 2)
17 Avdije sar niked angleder, amen valjani te da savetija hem te prihvatina len (2. Tim. 3:1). O starešine kola dena konkretno savet ando Devleso Lafi tane „sar potok ando pani ki šuki phuv“. (Čitin Isaija 32:1, 2.) Amare amala kola đanena so mangaja te šuna, a phenena amenđe odova so valjani te šuna dena amen poklon kova vredini sar „o zlatna phabaja ko srebrna ćare“ (Posl. 25:11). Hajde sare hem ponodri te ova mudra hem te prihvatina o savetija.
ĐILI 109 Te manga amen ando vilo