28. ČLANKO PROUČIBASE
ĐILI 88 Sikav man to drumo
Sose valjani te roda savet?
Mudra tane okola kola rodena savet (POSL. 13:10)
SO KA SIKLJOVA?
Ka dikha so valjani te ćera te šaj te pomožinen amen o savetija kola dobinaja.
1. So valjani te ćera te šaj te ana mudra odluke hem te šaj amare planija te uspinen? (Poslovice 13:10; 15:22)
SARE mangaja te ana mudra odluke hem mangaja amare planija te uspinen. Ama te šaj odova te ovel, e Devleso Lafi phenela so valjani te roda savet. (Čitin Poslovice 13:10; 15:22.)
2. So o Jehova obećini amenđe?
2 Naravno, okova kova šaj te del amen najšukar savet tano amaro nebesko Dad, o Jehova. Ov obećini so ka pomožini amen ađahar so phenela: „Ka dav tut savet, mi jakh ka ovel upro tute“ (Ps. 32:8). Akala lafija mothovena na samo so o Jehova ka del amen savet, nego hem ka pomožini amen te primenina le.
3. Sostar ka vaćera ko akava članko?
3 Ko akava članko ka koristina e Devleso Lafi te šaj te dobina odgovor ko štar pućiba: (1) Kola osobine valjani te oven man te šaj nekaso savet te pomožini man? (2) Ko šaj te del man šukar savet? (3) Sar šaj te mothovav so ćaće mangava nekastar savet? (4) Sose na valjani te pućav averen te anen odluke umesto mande?
KOLA OSOBINE VALJANENA AMENĐE?
4. Kola osobine valjanena amenđe te šaj o savet te pomožini amen?
4 Amen valjani te ova ponizna hem skromna te šaj disavo savet te pomožini amenđe. Ked anaja disavi odluka, valjani te priznajina so šaj nane amen iskustvo ili so šaj na đanaja sa. Ako na hijam ponizna hem skromna, o Jehova na ka šaj te pomožini amen. Svako savet kova ka dobina đi čitinaja e Devleso Lafi ka perel ko pani (Mih. 6:8; 1. Petr. 5:5). Ama, ako hijam ponizna hem skromna, amen ka ova spremna te šuna hem te primenina o savetija kola avena ando Devleso Lafi.
5. Sebepi kola buća o David šaj hine te ovel ponosno?
5 Akana ka dikha so šaj te sikljova ando kralj David. Ov ćerđa but bare buća sebepi kola šaj hine te ovel ponosno. Beršencar angleder te ovel kralj, maškaro manuša hine penđarutno sar šukar muzičari. Ov čak bašalđa e kraljese (1. Sam. 16:18, 19). Kasnije, o Jehova birinđa le te ovel kralj hem dinđa le po sveti duh (1. Sam. 16:11-13). O manuša hvalinđe le odolese so mudarđa olenge dušmanen, sar na primer e Golijate (1. Sam. 17:37, 50; 18:7). Ked bi o David hine ovela ponosno, ov šaj hine te mislini so odolese so ćerđa sa odola buća olese više na valjanena averenge savetija. Ama, ov hine ponizno.
6. Sar đanaja so o David spremno prihvatinđa averenge savetija? (Dikh i slika.)
6 Palo odova so ulo kralj, o David hine paše e manušencar kola šaj hine te den le savet (1. Let. 27:32-34). U stvari, čak angleder te ovel kralj, ov uvek hine spremno te šunel averengo savet. Ov na prihvatinđa o savetija samo ando murša nego hem andi jekh romni koja vićinđa pe Avigeja. Olako rom hine o Naval. Ov hine ponosno, nezahvalno hem hić na poštujinđa averen. Ki aver strana, o David ponizno prihvatinđa olako savet hem sebepi odova na ćerđa jekh but bari greška (1. Sam. 25:2, 3, 21-25, 32-34).
O David ponizno prihvatinđa hem primeninđa e Avigejako savet (Dikh o 6. odlomko)
7. So šaj te sikljova ando David? (Propovednik 4:13; dikh o slike.)
7 Ando David šaj te sikljova nekobor buća. Na primer, šaj isi amen disavo talenat ili autoritet. Čak hem tegani, na valjani te mislina so đanaja sa hem so na valjanena amenđe savetija. Isto ađahar, valjani te ova spremna te šuna o savetija, bizo obzir ko dinđa amen. (Čitin Propovednik 4:13.) Ako ćeraja odova, verovatno na ka ćera disave bare greške kola šaj te anen problemija amenđe hem averenđe.
Valjani te ova spremna te prihvatina o šukar savet bizo obzir ko dinđa amen (Dikh o 7. odlomko)c
KO ŠAJ TE DEL AMEN ŠUKAR SAVET?
8. Sose o Jonatan šaj hine te del šukar savet e Davidese?
8 Te dikha pana jekh buti koja šaj te sikljova ando David. Ov šunđa o savetija kola dobinđa ando okola so hine e Jehovase amala. Ama, hem ando manuša kola šaj hine šukar te haljon olesi situacija. Na primer, ked manglja te đanel da li šaj palem te ovel ko mir e kraljeja, e Sauleja, ov šunđa e Jonataneso savet, kova hine e Sauleso ćhavo. Sose o Jonatan šaj hine te del le šukar savet? Odolese so uzo odova so hine e Jehovaso amal, ov but šukar penđarđa e Saule (1. Sam. 20:9-13). So sikljovaja akalestar?
9. Kastar šaj te rode savet? Vaćer jekh primer. (Poslovice 13:20)
9 Ked valjani amenđe savet, šukar tano te vaćera nekasa koj tano paše e Jehovaja hem kova isi le iskustvo ko odova so amenđe valjani.a (Čitin Poslovice 13:20.) Na primer, zamislin so jekh terno phral mangela te arakhi pese bračno drug. Ko šaj te del le šukar savet? Ako pućela pe amale kova nane ženimo, ov šaj te del le šukar savetija andi Biblija. Ama, odova terno phral verovatno ka dobini pokonkretno hem popraktično savet ando jekh zrelo bračno par kova šukar đanela le hem kova već nesavo vreme isi le bahtalo brak.
10. Sostar ka vaćera akana?
10 Đi akana razmotrinđam duj osobine kola valjanena amenđe hem razmotrinđam o odgovor ko pućibe ko šaj te del amen šukar savet. Akana ka dikha sar šaj te mothova so ćaće mangaja neko te del amen savet hem da li valjani averen te puća te anen odluke ko amaro than.
SAR ŠAJ TE MOTHOVAV SO ĆAĆE MANGAVA NEKO TE DEL MAN SAVET?
11-12. (a) So disavo puti šaj te ćera? (b) So ćerđa o kralj Rovoam ked valjanđa te anel jekh but važno odluka?
11 Podijekh puti, jekh osoba šaj pućela averen te den la savet. Ama, ako već odlučinđa so ka ćerel, oj u stvari samo mangela te đanel da li avera složinena pe odoleja so odlučinđa. Asavki osoba na mangela ćaće avera te den la savet. Oj valjani te sikljol ando odova so desinđa pe e kraljese e Rovoamese.
12 O Rovoam ulo kralj ked o Solomon mulo. Tegani, o manuša hine len sa so valjanđa lenđe ko životi. Ama, mislinđe so o Solomon ćhivđa len te ćeren but phari buti. Odolese, đelje ko Rovoam hem pućlje le da li šaj te olakšini lenđe hari i buti. O Rovoam phenđa lenđe te den le hari vreme te šaj te dikhel so ka ćerel. Ov šukar počminđa, pućlja e phure manušen aso savet kola angleder pomožinđe e Solomonese (1. Kralj. 12:2-7). Ama, na šunđa olengo savet. Sose odova ćerđa? Ov šaj već odlučinđa so te ćerel hem nadinđa pe so o phure ka složinen pe oleja. Odolese, prihvatinđa o savet ando pe terne amala sose on složinđe pe oleja (1. Kralj. 12:8-14). O Rovoam phenđa e narodose baš odova so olese amala phenđe lese. Sebepi odova, on pobuninđe pe hem rodinđe avere kralje. Kotar tegani, ov hine le bare problemija (1. Kralj. 12:16-19).
13. Sar šaj te đana da li ćaće mangaja neko te del amen savet?
13 So šaj te sikljova ando Rovoam? Ked rodaja savet, amen valjani hem ćaće te manga odova. Sar šaj te đana da li odova ćeraja? Šaj te puća amen: „Da li rodava savet, a palo odova na primeninava le sose na hine odova so mangljum te šunav?“ Akana ka razmotrina jekh primer.
14. So na valjani te bistra ked dobinaja disavo savet? Vaćer jekh primer. (Dikh i slika.)
14 Zamislin so jekh phral arakhlja buti kuri šaj but te zaradini. Angleder te prihvatini odija buti, ov pućela jekhe starešina aso savet. Odova phral phenela lese so sebepi odija buti šaj ka valjani but vreme te ovel odvojimo andi pi porodica. Isto ađahar, vaćeri oleja ando biblijako načelo kova phenela so olesi najbari odgovornost tani te brinini pe ando pe porodicake duhovna potrebe (Ef. 6:4; 1. Tim. 5:8). Akana zamislin so odova phral odmah arakhi greška ko odova savet hem pućela avere phralen so te ćerel, sa đi na arakhi nekas ko ka phenel lese odova so mangela te šunel. Da li ov ćaće rodela savet ili već anđa odluka hem samo rodela nekas ko ka složini pe oleja? Na valjani te bistra so amaro vilo tano hovavno (Jer. 17:9). Disavo puti, o savet kova na sviđini pe amenđe tano baš odova kova valjani amenđe.
Da li ćaće mangaja savet ili samo rodaja nekas ko ka složini pe amencar? (Dikh o 14. odlomko)
DA LI VALJANI TE PUĆAV AVEREN TE ANEN ODLUKE UMESTO MANDE?
15. So valjani te pazina te na ćera hem sose?
15 Svako amendar isi le odgovornost te anel odluke kokri pese (Gal. 6:4, 5). Sar so vaćerđam, jekh mudro osoba angleder te anel disavi odluka ka rodel savet ando Devleso Lafi hem ando disavo zrelo hrišćanin. Ama, valjani te pazina te na puća averen te anen odluke umesto amende. Disave šaj te ćeren odova ađahar so ka pućen nekas kas poštujinena: „So bi tu ćereja ki mi situacija?“ A nesave šaj jednostavno ćerena odova so avera odlučinđe, bizo te razmislinen odolestar.
16. So valjanđe te ćeren o hrišćanija ko Korint? (1. Korinćanima 8:7, 10:25, 26)
16 Razmislin andi odluka koja o hrišćanija ko Korint valjanđe te anen ando odova da li ka han o mas kova hine žrtvujimo e idolenđe. Odole hrišćanenđe o apostol Pavle pisinđa: „Đanaja so o idoli nane ćaće devel nego so postojini samo jekh Devel“ (1. Kor. 8:4). Sebepi odova so o Pavle phenđa, disave andi skupština odlučinđe te han o mas kova bikinđa pe ko pazari, iako hine žrtvujimo e idolenđe. Ama, averenđe olengi savest na dozvolinđa te han asavko mas. (Čitin 1. Korinćanima 8:7, 10:25, 26.) Odija hine lično odluka. O apostol Pavle niked na savetujinđa e hrišćanen ko Korint te anen odluke ko averengo than niti te ćeren odova so avera ćerena. Svako olendar valjanđa kokri pese te odgovorini anglo Devel (Rimlj. 14:10-12).
17. So šaj te desini pe ako samo ćeraja odova so avera odlučinđe? Vaćer jekh primer. (Dikh o slike.)
17 Sar šaj diso slično te desini pe avdije? Razmislin kotar frakcije ando rat. Svako hrišćanin valjani kokri te odlučini da li ka prihvatini len ili na.b Šaj nane amenđe lokho sa odova te haljova, ama ipak svako amendar valjani kokri te odlučini so te ćerel (Rimlj. 14:4). Ako samo ćeraja odova so avera odlučinđe, sar đala o vreme, amari savest šaj te ovel slabo. Amen šaj te oblikujina amari savest ađahar so ka koristina la, avere lafencar ađahar so ka ana odluke kola temeljinena pe ki Biblija (Jevr. 5:14). Odolese, ked valjani te puća disave zrelo hrišćane aso savet? Palo odova so amen istražinđam, ama ipak valjani amenđe pomoć sose pana na haljovaja sar e biblijake načelija odnosinena pe ki amari situacija.
O savet valjani te roda tek palo odova so istražinđam andi disavi tema (Dikh o 17. odlomko)
RODE SAVET HEM PONODRI
18. So o Jehova ćerđa amenđe?
18 O Jehova mothovđa so isi le but baro poverenje upro amende ađahar so mukhlja kokri te ana odluke. Ov dela amen po Lafi i Biblija. Isto ađahar, dela amen mudra amalen kola šaj te pomožinen amen pošukar te haljova hem te primenina e biblijake načelija. Ađahar mothovđa so brinini pe amendar sar amaro Dad (Posl. 3:21-23). Sar šaj te mothova lese amari zahvalnost?
19. Sar šaj hem ponodri te radujina e Jehova?
19 Razmislin akalestar. O roditeljija tane bahtale ked dikhena sar olenge ćhave đi barjona ovena e Jehovase mudra sluge kola pomožinena averenđe. Ko slično način, hem o Jehova tano bahtalo ked dikhela so amen ovaja zrela hrišćanija, rodaja savetija averendar hem palo odova anaja odluke kolencar mothovaja so mangaja le.
ĐILI 127 Savo manuš valjani te ovav
a O hrišćanija šaj podijekh puti te pućen hem nekas ko na služini e Jehovase aso savet kotar finansijska, medicinska ili avera buća.
b Aso pobuter informacije andi akija tema, dikh ki knjiga Ov bahtalo zauvek! i 39. lekcija i 5. tačka hem o deo „Rode pobuter“.
c SO DIKHAJA KI SLIKA: Jekh starešina dela savet avere starešinase ando odova sar vaćerđa ko sastanak kova hine len.