26. ČLANKO PROUČIBASE
ĐILI 123 Verno te ićera amen ko teokratsko redo
Ov ponizno ked diso na haljoveja
Amen našti te haljova sa ando Svemoćno (JOV 37:23)
SO KA SIKLJOVA?
Čak hem ked na đanaja sa so ka ovel, amen šaj te istrajina ako razmislinaja ando odova so đanaja hem ako uzdajinaja amen upro Jehova.
1. Sar stvorinđa amen o Jehova hem sose?
O JEHOVA stvorinđa amen ađahar te šaj te razmislina, te sikljova neve buća hem te ova mudra. Sose? Odolese so manglja te đana koj tano ov hem te služina lese ađahar so ka koristina amari godi (Posl. 2:1-5; Rimlj. 12:1).
2. (a) So valjani te haljova? (Jov 37:23, 24; dikh i slika.) (b) Sose tano važno te haljova so na đanaja sa?
2 Iako but buća šaj te sikljova, ipak isi buća kola na đanaja. (Čitin Jov 37:23, 24.) Razmislin ando Joveso primer. O Jehova pućlja le nekobor pućiba kola pomožinđe lese te haljol so isi but buća kola o Jov na đanela. Odova pomožinđa lese te ovel ponizno hem te haljol so valjani te menini po način sar razmislini (Jov 42:3-6). But tano važno te haljova so na đanaja sa. Asavki skromnost ka pomožini amen te ovel amen poverenje upro Jehova so ov ka mothovi amenđe odova so amen ćaće valjani te đana te šaj te ana mudra odluke (Posl. 2:6).
Ako hijam svesna kola buća na đanaja, odova ka pomožini hem amenđe sar e Jovese (Dikh o 2. odlomko)
3. Sostar ka vaćera ko akava članko?
3 Ko akava članko ka dikha kola buća na đanaja hem sose šaj te ovel amenđe pharo sebepi odova. Isto ađahar, ka dikha sose tano šukar so na đanaja disave buća. Odova so ka sikljova ka pomožini amen te ovel amen pana pobaro poverenje ko odova so o Jehova, „okova so isi le savršeno đandipe“, phenela amenđe odova so ćaće valjani te đana (Jov 37:16).
AMEN NA ĐANAJA KED KA AVEL O KRAJ
4. Premalo Matej 24:36, so amen na đanaja?
4 Čitin Matej 24:36. Amen na đanaja ked ka avel o kraj ando akava sveto. Čak ni o Isus, đi hine ki phuv, na đanđa o „dive hem o vreme“.a Ov kasnije phenđa pe apostolenđe so samo o Jehova „isi le pravo te odlučini“ ked ka desinen pe disave događaija (Dela 1:6, 7). O Jehova odlučinđa ked o krajo ka avel, ama amen našti te đana ked tačno odova ka ovel.
5. Sar šaj upro amende te utičini odova so na đanaja ked ka avel o kraj?
5 Amen na đanaja pana kobor valjani te ađićera. Sebepi odova šaj te našala amaro strpljenje ili te ova obeshrabrime, pogotovo ako but berš ađićeraja e Jehovaso dive. Isto ađahar, šaj te obeshrabrina amen ako neko andi amari porodica ili disave manuša marena amenđe muj odolese so o kraj pana na alo (2. Petr. 3:3, 4). Šaj te mislina so ako đanaja o tačno dive, ka ovel amenđe polokho te istrajina ked avera marena amenđe muj hem ka ova postrpljiva.
6. Sose tano šukar so na đanaja ked ka avel o kraj?
6 Odolese so o Jehova na phenđa amenđe ked tačno ka avel o kraj, amen isi prilika te mothova so služinaja lese odolese so mangaja le hem sose verujinaja lese. Amen na služinaja e Jehovase ađahar so ki godi isi amen disavo datum, ka phene amari vera isi la disavo rok kova trajini. Umesto te razmislina ando odova ked ka avel e „Jehovaso dive“, šukar tano te razmislina so odova dive ka ćerel. Odova ka pomožini amen te ova pana popaše e Jehovaja, te ovel amen pana pobaro poverenje upro leste hem te da sa amendar te ugodina lese (2. Petr. 3:11, 12).
7. So amen đanaja?
7 But tano važno te razmislina ando odova so đanaja. Amen đanaja so o poslednja dive počminđe ko 1914. berš. Ki Biblija, o Jehova dinđa proročanstvija kola dokažinena odova. Isto ađahar, odothe phenđa pana but detaljija ando odova so ka ovel ko sveto palo odova berš. Sebepi odova, uverime hijam soj tano paše „o baro dive e Jehovaso“ (Sof. 1:14). Isto ađahar, đanaja so o Jehova mangela te ćera. Ov mangela so pobuter manušenđe te vaćera i „šukar vest ando Kraljevstvo“ (Mat. 24:14). Odija vest propovedinaja ko 240 phuvja hem ko pobuter ando 1 000 ćhibja. Amen na valjani te đana ked o kraj ka avel te šaj te ova revna ki služba.
AMEN NA ĐANAJA SO O JEHOVA KA ĆEREL AMENĐE
8. Ko so odnosinena pe o lafija „o postupkija ando ćaćutno Devel“? (Propovednik 11:5)
8 Amen na đanaja uvek „o postupkija ando ćaćutno Devel“. (Čitin Propovednik 11:5.) Akala lafija odnosinena pe ko odova so o Jehova šaj te ćerel diso te ovel ja ko odova so ov dozvolini diso te ovel te šaj te ispunini pi volja. Amen našti tačno te đana sose o Jehova dozvolini diso te desini pe ili so ka ćerel te šaj te pomožini amenđe (Ps. 37:5). Odova našti te haljova sar so našti te haljova sar barjola jekh tikno ćhavoro ko pe dajako vođi. Čak ni o naučnikija našti odova potpuno te haljon.
9. Sar šaj te osetina amen sebepi odova so na đanaja tačno sar o Jehova ka pomožini amen?
9 Odolese so na đanaja sar tačno o Jehova ka pomožini amenđe, amen šaj te dara te ana disave odluke. Šaj hijam ko duj gođa da li te odreknina amen ando disave buća hem te ćera diso pobuter ki služba ja te selina amen uduri kaj tani pobari potreba. Šaj pućaja amen da li tano o Devel zadovoljno amencar ako na ispuninaja disavo cilj, ako na dikhaja disave rezultatija ki služba iako but trudinaja amen ja ako disavo teokratsko projekat ko kova učestvujinaja na đala premalo plan.
10. Kola važna osobine šaj te razvijina iako na đanaja so o Jehova ka ćerel?
10 Odolese so na đanaja tačno so o Jehova ka ćerel, amen isi amen prilika te razvijina disave but važna osobine, sar soj tani i poniznost hem i skromnost. Odova pomožini amen te haljova so o Jehova uvek đanela soj tano najšukar amenđe (Is. 55:8, 9). Isto ađahar, amen sikljovaja so šaj pana pobuter te verujina lese hem te oslonina amen upro leste. Ked isi amen disavo šukar iskustvo ki služba ja ko dijekh teokratsko projekat, sa i hvala aso odova daja e Jehovase (Ps. 127:1; 1. Kor. 3:7). Ama, ako o buća na đana ađahar sar so očekujinđam, na valjani te bistra so o Jehova sa dikhela (Is. 26:12). Amen valjani te ćera amaro deo hem te verujina so o Jehova ka ćerel po deo. Iako ov na ka ćerel disavo čudo sar ko purano vreme, šaj te ova sigurna so ka del amen uputstvija kola valjanena amenđe (Dela 16:6-10).
11. Kola važna buća đanaja?
11 Amen đanaja so o Jehova but mangela amen, soj tano pravedno hem mudro. Isto ađahar, đanaja so ov but cenini odova so ćeraja olese hem amare phralenđe hem phenjenđe. Uzo odova, đanaja hem so o Jehova uvek nagradini okolen kola tane lese verna (Jevr. 11:6).
AMEN NA ĐANAJA SO KA OVEL TAJSA
12. So sikljovaja andi Jakovljeva 4:13, 14?
12 Čitin Jakovljeva 4:13, 14. Amen na đanaja so šaj te ovel amare životoja tajsa. Ko akava sveto, but buća šaj te desinen pe kola na očekujinaja ja upro kola nane amen kontrola (Prop. 9:11). Sebepi odova, na đanaja da li ka uspina te ćera odova so planirinđam ja da li ka ova đivde te ćera odova.
13. Sar šaj upro amende te utičini odova so na đanaja so anela amenđe o tajsato dive?
13 Sebepi odova so na đanaja so anela amenđe o tajsato dive, šaj te ovel amenđe but pharo te istrajina. Sar odova? Pa ako but brininaja amen ando odova so ka ovel, šaj te našala amari radost. Amaro životi šaj te menini pe ko neočekivano način ili disave lošna buća šaj te desinen pe iznenada. Sebepi odova, šaj te ova tužna hem holjame. Ked na ispuninđa pe odova so očekujinđam, šaj te ova razočarime hem obeshrabrime (Posl. 13:12).
14. Sostar zavisini amaro bahtalipe? (Dikh o slike.)
14 Bizo obzir save pharipa te oven amen, amen šaj te mothova so služinaja e Jehovase odolese so mangaja le. Ki Biblija isi amen izveštaija kola mothovena so na valjani te ađićera o Jehova te zaštitini amen kotar sa o pharipa hem so ov na odredini angleder so ka ovel amencar. Ov đanela so amaro bahtalipe na zavisini odolestar da li đanaja so anela amenđe o tajsato dive, već da li rodaja oleso vođstvo hem da li šunaja le (Jer. 10:23). Ked rodaja lestar pomoć te ana disave odluke, amen u stvari phenaja: „Ako ka ovel e Jehovasi volja, ka živina hem ka ćera akava ili okova“ (Jak. 4:15).
Ako rodaja e Jehovaso vođstvo hem šunaja le, odova šaj te ovel amenđe bari zaštita (Dikh o 14. hem o 15. odlomko)b
15. So đanaja andi budućnost?
15 Amen na đanaja so ka ovel tajsa, ama đanaja so o Jehova obećinđa so ka del amen večno životi ko nebo ili ki phuv. Đanaja so ov našti te hovavi hem so ništa našti te sprečini le te ispunini pe obećanja (Titu 1:2). Samo ov šaj te vaćeri „so ka ovel ko krajo, but angleder [vaćeri] odova so pana na ulo“. Sa o buća kola prorekninđa ko purano vreme već ispuninđe pe hem sa odova so phenđa asi budućnost ka ispunini pe (Is. 46:10). Amen đanaja so ništa našti te sprečini le te mangel amen (Rimlj. 8:35-39). Ov ka del amen mudrost, uteha hem snaga koja valjani amenđe te šaj te istrajina ko sa. Šaj te ova sigurna so o Jehova ka pomožini amen hem ka blagoslovini amen (Jer. 17:7, 8).
AMEN NAŠTI POTPUNO TE HALJOVA KOBOR ŠUKAR O JEHOVA ĐANELA AMEN
16. So o Jehova đanela amendar hem sar osetinaja amen sebepi odova? (Psalam 139:1-6)
16 Čitin Psalam 139:1-6. Amaro Stvoritelj đanela sar hijam ćerde hem so ćerđa amen te ova asavke save hijam. Uvek brinini pe amendar. Ov đanela so vaćeraja hem so mangaja te phena, so ćeraja hem sose diso ćeraja. O kralj David phenđa so o Jehova tano uvek spremno te pomožini amen. Sar osetineja tut ked đaneja so o Vrhovno Vladari ando celo svemir, o svemoćno Stvoritelj ando nebo hem andi phuv odobor brinini pe tutar? O kralj David phenđa: „To đandipe odobor tano baro so našti te haljovav le, odobor tano hor so našti te haljovav le“ (Ps. 139:6).
17. Sose šaj te ovel amenđe pharo te verujina so o Jehova šukar đanela amen?
17 Sebepi odova sar bariljam, sebepi amari kultura ja amare verovanja, šaj tano amenđe pharo te dikha e Jehova sar Dad kova but mangela amen hem brinini pe amendar. Ja šaj mislinaja so sebepi disave greške kola angleder ćerđam hijam odobor lošna so o Jehova na mangela ni te šunel amenđe hem soj tano dur amendar. Disavo puti, čak hem o David osetinđa pe ađahar (Ps. 38:18, 21). Ja šaj neko ko trudini pe te menini diso koro peste hem te ićeri pe ko Jehovase merilija, pućela pe: „Ako o Devel ćaće šukar đanela man, sose bi očekujini mandar te meninav diso soj tano maje but pharo?“
18. Sose tano važno te haljova so o Jehova đanela amen pošukar amendar? (Dikh o slike.)
18 Ama, nane nemoguće te prihvatina odova so o Jehova đanela amen pošukar amendar hem so koro amende dikhela o šukar buća kola amen našti te dikha. Iako dikhela amare mane hem haljola sar osetinaja amen hem sose diso ćerđam, ov ipak mangela amen (Rimlj. 7:15). Ked haljovaja so o Jehova đanela so šaj te menina amen hem so ko odova mangipaja pomožini amen, odova šaj te del amen snaga te služina lese verno hem te ova radosna.
O Jehova pomožini amen te istrajina ko neočekivana problemija ađahar so pomožini amen te zorjaćera amari vera ko olese obećanja. (Dikh o 18. hem o 19. odlomko)c
19. So sigurno đanaja ando Jehova?
19 Amen đanaja so o Jehova tano mangipe hem hijam sigurna ko odova (1. Jov. 4:8). Đanaja so olese pravedna merilija tane dokaz so ov mangela amen hem so mangela amenđe samo najšukar. Amen đanaja so o Jehova mangela te del amen o večno životi. Te šaj odova te ovel moguće, ov dinđa amen pe Ćhave. I otkupnina uverini amen so šaj te služina e Jehovase sar so ov mangela iako hijam nesavršena (Rimlj. 7:24, 25). Đanaja so o Jehova tano „pobaro ando amaro vilo hem đanela sa“ (1. Jov. 3:19, 20). O Jehova dikhela sa hem isi le poverenje so šaj te uspina te ćera olesi volja.
20. So šaj te pomožini amen te na brinina amen but sose na đanaja sa o buća?
20 O Jehova phenela amenđe sa so valjani te đana. Odolese, na valjani te brinina amen ando odova so na đanaja. Umesto odova, šaj te usredsedina amen ko odova soj tano ćaće važno. Ađahar šaj te mothova so isi amen baro poverenje upro Jehova, okova „kova isi le savršeno đandipe“ (Jov 36:4). Iako akana na haljovaja disave buća, amen đanaja so o Jehova ko nevo sveto ka sikavi amen but neve buća hem ka ovel amen prilika zauvek te sikljova olestar (Prop. 3:11).
ĐILI 104 O Devel dela amen sveti duh
a Odolese so o Isus ka predvodini ko maribe protiv e Satanaso sveto, razumno tano te zaključina so ov akana đanela ked ka počmini o Armagedon hem ked ka avel o vreme te „anel i pobeda đi o krajo“ (Otkr. 6:2; 19:11-16).
b SO DIKHAJA KO SLIKE: Jekh dad pe ćhaveja spremini o ranco hem odolese i porodica tani spremno aso disave hitna situacije.
c SO DIKHAJA KI SLIKA: Jekh phral kova isi le disave pharipa ko životi, razmislini ando šužo životi kova ka ovel le ko nevo sveto.