So sikljovaja ando proročanstvo kova o Jakov phenđa angleder te merel? – 2. deo

1. Sostar ka vaćera ko akava članko?

E JAKOVESE ćhave ćedinđe pe uzo leste hem pažljivo šunena so ov mangela te phenel lenđe. Sar so dikhljam ko prethodno članko odova so o Jakov phenđa e Ruvimese, e Simeonese, e Levijese hem e Judase sigurno but iznenadinđa len. Odolese, akana pućena pe so o Jakov ka phenel avere ćhavenđe. Hajde akana te dikha so šaj te sikljova ando odova so o Jakov phenđa e Zavulonese, e Isaharese, e Danese, e Gadese, e Asirese, e Neftalimese, e Josifese hem e Venijaminese.a

ZAVULON

2. So o Jakov phenđa e Zavulonese hem sar odova ispuninđa pe? (Postanak 49:13; dikh o okvir.)

² Čitin Postanak 49:13. O Jakov phenđa so e Zavulonese potomkija ka živinen paše uzo more, ko severno deo andi Obećimi phuv. Oko 200 berš kasnije, on dobinđe po nasledstvo. Olengo than hine maškaro Galilejsko more hem o Sredozemno more. O Mojsije prorekninđa: „Radujin tut, Zavulon, ko te putovanja“ (Pon. zak. 33:18). Odova šaj značinđa so e Zavuloneso pleme lokho šaj hine te bavini pe trgovinaja sose hine maškaro duj morija. Sar god hine, e Zavulonese potomkija hine len razlog te oven bahtale.

3. So šaj te pomožini amen te ova bahtale?

³ So sikljovaja? Bizo obzir kaj živinaja ja save tane amare okolnostija, amen šaj te ova bahtale. Ama, te šaj hem ponodri te ova bahtale, valjani te ova zadovoljna odoleja so isi amen (Ps. 16:6; 24:5). Disavo puti tano polokho te razmislina ando odova so nane amen nego ando šukar buća kola isi amen. Odolese, trudin tut te dikhe pozitivno ko te okolnostija (Gal. 6:4).

ISAHAR

4. So o Jakov phenđa e Isaharese hem sar ispuninđa pe odova? (Postanak 49:14, 15; dikh o okvir.)

⁴ Čitin Postanak 49:14, 15. O Jakov pohvalinđa e Isahare hem uporedinđa le jekhe hereja kova isi le zorale kokala, avere lafencar uporedinđa le jekha životinjaja koja akhari pharo teret. Isto ađahar, phenđa lese so ka ovel le šukar phuv. E Jakovese lafija ispuninđe pe ked e Isaharese potomkija dobinđe šuži hem plodno phuv uzi reka Jordan (Is. Nav. 19:22). On sigurno ćerđe but buti ki pi phuv, ama hem pomožinđe averenđe (1. Kralj. 4:7, 17). Na primer, ked o sudija o Varak hem i proročica i Devora pućlje e Izraelcen te pomožinen len ki borba protiv o Sisara, e Isahareso pleme hine spremno te ćerel odova. On hine spremna hem ko avera prilike te borinen pe (Sud. 5:15).

5. Sose sare amen valjani te ova bućarne?

⁵ So sikljovaja? O Jehova but cenini odova so ćeraja olese ki služba sar so ceninđa odova so ćerđa e Isahareso pleme (Prop. 2:24). Razmislin ando starešine kola dena sa pestar te pomožinen ki skupština (1. Tim. 3:1). On na valjani te borinen pe ko disavo doslovno maribe, ama trudinena pe te zaštitinen e phralen ando sa odova so šaj te rumini olengo amalipe e Jehovaja (1. Kor. 5:1, 5; Jud. 17-23). Isto ađahar, dena sa pestar te pripreminen ohrabrujuća govorija kola šaj te zorjaćeren e phralen ki skupština (1. Tim. 5:17).

DAN

6. Savo zadatko dobinđa e Daneso pleme? (Postanak 49:17, 18; dikh o okvir.)

⁶ Čitin Postanak 49:17, 18. O Jakov phenđa so o Dan tano sar sap kova napadini pobare životinjen, sar soj tano o gras kova tano koristimo ki bitka. E Daneso pleme hine but hrabro hem hine spremno te napadini e Izraelcenge dušmanen. Ko drumo asi Obećimi phuv, e Daneso pleme hine najpalal hem ađahar hine sar „zaštitno straža“ aso sa o plemenija (Br. 10:25). Iako avera plemenija na dikhlje so sa e Daneso pleme ćerđa, odova so on ćerđe hine but važno aso celo narodo.

7. Sar valjani te dikha ko odova ked ćeraja diso e Jehovase?

⁷ So sikljovaja? Da li nekad hine tut disavo zadatko kova ćerđan, a avera ni na primetinđe odova? Šaj pomožinđan te čistini pe ja te održini pe i dvorana ja ćerđan diso ko pokrajinsko sastanak ja ko kongres? Ili šaj ćerđan diso aver. Odova tano asi svako pohvala! Niked ma bistri so o Jehova dikhela hem cenini sa odova so ćereja olese. Posebno cenini ked služinaja lese, na sose mangaja avera te hvalinen amen, već te mothova lese amaro mangipe (Mat. 6:1-4).

GAD

8. Sose e Izraelcenge dušmanija lokho šaj hine te napadinen e Gadeso pleme? (Postanak 49:19; dikh o okvir.)

⁸ Čitin Postanak 49:19. O Jakov prorekninđa so e Gadeso pleme ka napadinen o razbojnikija. Pobuter ando 200 berš kasnije, on nasledinđe i phuv ki istočno strana andi reka Jordan koja hine okružimi e dušmanencar. Sebepi odova, o dušmanija ando okolna narodija lokho šaj hine te napadinen len. Ama, e Gadeso pleme manglja te aćhol uduri odolese so odothe hine but poljija kuri olenge životinje šaj hine te han (Br. 32:1, 5). Očigledno so on hine but hrabra manuša. Uzo odova, on hine len poverenje so o Jehova ka pomožini len te pobedinen e dušmanen hem te len i phuv koja dinđa len. Beršencar, on čak bićhalđe pe vojnikonen te pomožinen ko odova avera plemenija te osvojinen i phuv kotar aver strana andi reka Jordan (Br. 32:16-19). Hine len poverenje upro Jehova so ka arakhi olenge romnjen hem olenge ćhaven đi on nane odothe. O Jehova blagoslovinđa len sebepi olengi hrabrost hem samopožrtvovanost (Is. Nav. 22:1-4).

9. Sar amaro poverenje upro Jehova ka utičini upro amare odluke?

⁹ So sikljovaja? Te šaj te služina e Jehovase hem ko phare okolnostija, valjani te ovel amen poverenje upro leste (Ps. 37:3). Avdije, but phralja hem phenja mothovena so isi len poverenje upro leste ađahar so ćerena žrtve te šaj te pomožinen ki gradnja, te služinen uduri kaj tani pobari potreba ja te ćeren disave avera zadatkija ki Jehovasi organizacija. Odova ćerena sose tane sigurna so o Jehova uvek ka brinini pe olendar (Ps. 23:1).

ASIR

10. So e Asireso pleme na ćerđa? (Postanak 49:20; dikh o okvir.)

¹⁰ Čitin Postanak 49:20. O Jakov prorekninđa so e Asireso pleme ka ovel but barvalo hem ađahar hine. E Asireso pleme dobinđa jekh but plodno phuv (Pon. zak. 33:24). Isto ađahar, on hine uzo Sredozemno more hem ko oleso područje hine i barvali feničansko luka ko Sidon. Ama, on na cidinđe e Hanancen andi phuv (Sud. 1:31, 32). Šaj sebepi olengo lošno uticaj hem po barvalipe, on na ćerđe odova so šaj hine te ćeren e Jehovase. Na primer, ked o sudija Varak pućlja e Izraelcen te pomožinen lese te borini pe protiv o hananska narodija, e Asireso pleme na manglja te đal. Sebepi odova, na dikhlje sar o Jehova ko jekh neverovatno način pomožinđa pe narodose te pobedini uzo „panja ko Megido“ (Sud. 5:19-21). E Asireso pleme sigurno but lađandilo ked šunđe sar o Varak hem i Devora pominđe len ki đili: „O Asir samo bešlja ki obala hem ništa na ćerđa“ (Sud. 5:17).

11. Sose o pare na valjani te oven amenđe najvažna ko životi?

¹¹ So sikljovaja? Amen mangaja te da e Jehovase amaro najšukar. Odolese, valjani te pazina te na ova sar o manuša ko sveto kola mislinena so o pare hem odova so šaj te ćinen tane najvažna buća ko životi (Posl. 18:11). Iako o pare valjanena amenđe, amen na mislinaja soj tane on považna ando odova te služina e Jehovase (Prop. 7:12; Jevr. 13:5). Na mangaja te našala amaro vreme hem amari snaga te oven amen o buća kola na valjanena amenđe. Umesto odova, trudinaja amen te ćera sa so šaj e Jehovase. Đanaja so, ako ka aćhova lese verna, ađićeri amen but šukar budućnost (Ps. 4:8).

NEFTALIM

12. Sar ispuninđa pe odova so o Jakov phenđa e Neftalimese? (Postanak 49:21; dikh o okvir.)

¹² Čitin Postanak 49:21. O Jakov phenđa so o Neftalim ka vaćeri „šuže lafija“. Odova šaj odnosinđa pe ko način sar o Isus ka vaćeri đi hine ki phuv. O Isus but vreme hine ko Kapernaum, ki diz koja pripadinđa aso Neftalimeso pleme. Sebepi odova, ov phenđa so o Kapernaum hine olesi diz (Mat. 4:13; 9:1; Jov. 7:46). Ked prorekninđa ando Isus, o Isaija phenđa so o manuša ando Zavuloneso hem e Neftalimeso pleme ka dikhen „bari svetlost“ (Is. 9:1, 2). Đi sikavđa e manušen, o Isus mothovđa soj tano ov odija „pravo svetlost koja svetlini sa e manušenđe“ (Jov. 1:9).

13. Sar šaj amare lafencar te ugodina e Jehovase?

¹³ So sikljovaja? Odova so phenaja hem sar phenaja diso tano but važno e Jehovase. Sar šaj te vaćera „šuže lafija“ kola tane ugodna e Jehovase? Najangleder, ađahar so ka vaćera o ćaćipe (Ps. 15:1, 2). Isto ađahar, šaj te ohrabrina averen ađahar so ka pohvalina len. Ka pazina te na kritikujina averen ja te na ovel amen navika uvek te žalina amen (Ef. 4:29). Uzo odova, šaj te ćhiva amenđe cilj te ova pošukar ko odova te počmina o razgovor e manušencar hem palo odova te vaćera diso ando Jehova.

JOSIF

14. Sar ispuninđa pe odova so o Jakov phenđa e Josifese? (Postanak 49:22, 26; dikh o okvir.)

¹⁴ Čitin Postanak 49:22, 26. O Jakov hine but ponosno upro Josif. O Jehova birinđa le te ovel „izdvojimo ando pe phralja“ hem oleso dad phenđa soj tano ov „granka ando plodno kaš“. O Jakov hine o kaš, a o Josif hine i granka ando odova kaš. O Josif hine e Jakoveso prvo ćhavo andi Rahela. O Jakov prorekninđa so o Josif ka dobini duj putija pobaro deo ando nasledstvo umesto oleso prvenco o Ruvim, kole bijanđa i Lija (Post. 48:5, 6; 1. Let. 5:1, 2). Odova proročanstvo ispuninđa pe ked e Josifese duj ćhave, o Jefrem hem o Manasije, ulje duj plemenija ko Izrael hem hine len pi phuv (Post. 49:25; Is. Nav. 14:4).

15. Sar o Josif reagujinđa ked doživinđa nepravda?

¹⁵ O Jakov pominđa e strelcen kola „mrzinđe [e Josife], progoninđe le hem gađinđe le“ (Post. 49:23). Odova odnosinđa pe upro olese ljubomorna phralja kola hine odgovorna aso but nepravde kola doživinđa. Ama, ov na mrzinđa pe phralen niti krivinđa e Jehova sebepi odova so ulo oleja. O Jakov phenđa: „E Josifeso luk aćhilo zoralo, a olese vasta hem ponodri hine zorale hem spretna“ (Post. 49:24). Ov na irinđa pe phralenđe, nego mothovđa lenđe milosrđe hem šukaripe, a odola osobine hine sar „strele“ kola mudarđe olengi mržnja. Ov osloninđa pe upro Jehova ked hine le kušnje hem na samo so oprostinđa pe phralenđe, već hine šukar premalo lende (Post. 47:11, 12). O Josif ando pe kušnje sikljilo sar te ovel pana pošukar manuš (Ps. 105:17-19). Sebepi odova, o Jehova prekalo leste šaj hine te ćerel but važna buća.

16. Sar šaj e Josifeso primer te pomožini amen ked isi amen problemija?

¹⁶ So sikljovaja? Niked na valjani te mukha o problemija te ciden amen ando amare phralja hem phenja. Ma bistri so o Jehova prekalo kušnje šaj mangela diso te sikavi amen (Jevr. 12:7). O kušnje šaj te pomožinen amen te razvijina disave šuže osobine, sar na primer milosrđe hem spremnost te oprostina (Jevr. 12:11). O Jehova ka nagradini amari istrajnost sar so nagradinđa e Josifesi.

VENIJAMIN

17. Sar ispuninđa pe odova so o Jakov phenđa e Venijaminese? (Postanak 49:27; dikh o okvir.)

¹⁷ Čitin Postanak 49:27. O Jakov phenđa so e Venijamineso pleme ka ovel sar ruv hem so olese manuša ka oven but šukar ratnikija (Sud. 20:15, 16; 1. Let. 12:2). „Sabale“, avere lafencar ki početka ando izraelsko kraljevstvo, kotar Venijamineso pleme alo o prvo izraelsko kralj, o Saul. Ov mothovđa pe sar but šukar ratniko đi borinđa e Filistejencar (1. Sam. 9:15-17, 21). „Raćate“, avere lafencar ko krajo andi istorija kotar izraelsko kraljevstvo, i kraljica Jestira hem o upravitelj ando Persijsko carstvo o Mardohej, o solduj ando Venijamineso pleme, spasinđe e Izraelcen te na oven mudarde (Jest. 2:5-7; 8:3; 10:3).

18. Sar šaj te ova sar o manuša ando Venijamineso pleme?

¹⁸ So sikljovaja? O manuša ando Venijamineso pleme hine but radosna ked o Saul, kova hine ando olengo pleme ulo kralj. Ama, kasnije ked o Jehova ćhivđa e Davide kova hine ando Judaso pleme te ovel kralj, on podržinđe odija promena (2. Sam. 3:17-19). Beršencar palo odova ked avera deš plemenija buninđe pe protiv e Judaso pleme, e Venijamineso pleme podržinđa e Judaso pleme hem e kralje kova alo andi Davidesi porodica (1. Kralj. 11:31, 32; 12:19, 21). Sar e Venijamineso pleme, hem amen valjani te podržina okolen kolen o Jehova ćhivđa te predvodinen maškaro oleso narodo (1. Sol. 5:12).

19. Sar pomožini amen e Jakoveso proročanstvo kova phenđa angleder te merel?

¹⁹ Šaj but te sikljova ando odova so o Jakov phenđa angleder te merel. Odolese so odova proročanstvo ispuninđa pe, šaj te ova uverime so hem avera proročanstvija kola tane ko Devleso Lafi ka ispuninen pe. Odova so dikhljam sar e Jakovese ćhave hine blagoslovime, pomožini amen te haljova sar šaj hem amen te ugodina e Jehovase.