So sikljovaja ando proročanstvo kova o Jakov phenđa angleder te merel? – 1. deo

1-2. So o Jakov ćerđa hari angleder te merel hem sose? (Dikh i slika .)

NAKHLJE oko 17 berš sar o Jakov pe ćherutnencar selinđa pe kotar Hanan ko Egipat (Post. 47:28). Ov hine but bahtalo so palem dikhlja pe ćhave e Josife hem so celo porodica palem hine ki kupa. Ama, đanđa so pana hari ka merel hem odolese vićinđa pe ćhaven te phenel lenđe diso but važno (Post. 49:28).

² Ko odova vreme hine uobičajeno o poglavari andi porodica te ćedel sa pe ćherutnen hem te phenel lenđe so te ćeren palo leso meribe (Is. 38:1). Tegani šaj hine te phenel ko ka ovel poglavari ki porodica palo leste.

3. So šaj te sikljova kotar Postanak 49:1, 2?

³ Čitin Postanak 49:1, 2. Ama, akava na hine jekh obično razgovor. O Jakov hine prorok. Uzi Jehovasi pomoć, ov phenđa pe ćhavenđe so ka ovel olencar hem olenge potomkonencar ki budućnost. Odolese, odova so o Jakov phenđa pe ćhavenđe angleder te merel tano proročanstvo.

4. So ka razmotrina ko akava članko? (Dikh o okvir „E Jakovesi porodica.“)

⁴ Ko akava članko ka razmotrina so o Jakov phenđa pe štare ćhavenđe: e Ruvimese, e Simeonese, e Levijese hem e Judase. Ko aver članko ka vaćera odolestar so phenđa pe pana ofto ćhavenđe. Ka dikha so o Jakov na phenđa samo so ka ovel olese ćhavencar, već hem olenge potomkonencar kolendar kasnije ka ovel jekh but baro narodo. Ked razmislinaja ando odova so desinđa pe e izraelsko narodose, dikhaja so e Jakovese lafija ćaće ispuninđe pe. Đi ka razmotrina olese lafija, amen ka sikljova sar šaj te ugodina amare nebesko Dadese, e Jehovase.

RUVIM

5. So o Ruvim verovatno očekujinđa te dobini ando po dad?

⁵ O Jakov najangleder vaćerđa e Ruvimeja hem phenđa lese: „Tu hijan mo prvenco“ (Post. 49:3). Odolese so hine prvenco, o Ruvim verovatno očekujinđa te dobini pobaro nasledstvo nego olese phralja. Šaj očekujinđa hem te ovel poglavari ki porodica palo pe dadeso meribe hem kasnije odija čast te oven len olese potomkija.

6. Sose o Ruvim našalđa po pravo kova hine le sar prvenco? (Postanak 49:3, 4)

⁶ Ama, o Ruvim na dobinđa o nasledstvo sar prvenco (1. Let. 5:1). Sose? Odolese so nekobor berš angleder, ov suća e Jakovese inočaja e Valaja. Oj hine i sluškinja kotar Jakovesi mangli romni i Rahela, koja već muli (Post. 35:19, 22). O Ruvim hine e Lijako ćhavo, koja hine e Jakovesi aver romni. E Ruvimese šaj sviđinđa pe i Vala hem naštinđa te kontrolišini pe seksualna želje. Ili šaj manglja o Jakov te mrzini e Vala hem pobuter te mangel e Lija, olese daja. Savo god razlog hine le, odova so ćerđa na hine šukar ni anglo Jehovase ni anglo olese dadese jaćha. (Čitin Postanak 49:3, 4.)

7. So ulo e Ruvimeja hem olese potomkonencar? (Dikh o okvir „O proročanstvo kova o Jakov phenđa angleder te merel“.)

⁷ O Jakov phenđa e Ruvimese: „Više na ka ove prvo maškaro te phralja.“ Odola lafija ćaće ispuninđe pe sose ki Biblija nigde na pisini so neko ando Ruvimese potomkija ulo kralj, svešteniko ja proroko. Ama, o Jakov ipak dinđa le nasledstvo hem olese potomkija hine jekh pleme ko Izrael (Is. Nav. 12:6). Ko avera situacije o Ruvim mothovđa but šukar osobine hem nigde ki Biblija na pisini so palem ćerđa nemoral (Post. 37:20-22; 42:37).

8. So šaj te sikljova ando Ruvimeso primer?

⁸ So sikljovaja? Amen valjani te trudina amen te ovel amen samokontrola hem te cida amen ando nemoral. Ako nekad hijam ko iskušenje te ćera greh, valjani te terđova hem te razmislina so odova so ka ćera ka povredini e Jehova, amare porodica hem averen. Na valjani te bistra so ki Biblija pisini „so o manuš sejini, odova hem ka ćedel“ (Gal. 6:7). Ki aver strana, odova so desinđa pe e Ruvimese setinćeri amen kobor tano baro e Jehovaso milosrđe. Iako o Jehova na ka zaštitini amen ando posledice kotar amaro greh, ov ka blagoslovini amen ako trudinaja amen te ćera odova soj tano ispravno.

SIMEON HEM LEVIJE

9. Sose o Jakov na hine zadovoljno e Simeoneja hem e Levijeja? (Postanak 49:5-7)

⁹ Čitin Postanak 49:5-7. Palo odova, o Jakov vaćerđa e Simeoneja hem e Levijeja. Ama, ando odova so phenđa lenđe dikhaja so na hine zadovoljno olencar. Nekobor berš angleder, e Jakovese ćhaja, e Dina, silujinđa jekh Hananco kova vićinđa pe Sihem. Tegani, sa e Jakovese ćhave hine holjame sebepi odova. Ama, o Simeon hem o Levije na kontrolišinđe pi holi. On hovavđe e Siheme hem olese manušen ađahar so phenđe so ako sa olenge murša obrezinena pe ka ovel mir maškaro lende hem e Jakovesi porodica. Odola manuša prihvatinđe odova hem obrezinđe pe. Đi pana hine ko dukha sebepi o obrezanje, o Simeon hem o Levije „lelje pe mačija hem khuvđe ki diz, ki koja niko na sumnjinđa upro lende, hem mudarđe sa e muršen“ (Post. 34:25-29).

10. Sar ispuninđe pe o proročanska lafija kola o Jakov phenđa ando Simeon hem Levije? (Dikh o okvir „O proročanstvo kova o Jakov phenđa angleder te merel“.)

¹⁰ O Jakov hine but holjamo upro pe duj ćhave sose mudarđe odole manušen. Ov prorekninđa so on ka oven razdelime hem strevime prekalo celo Izrael. Odola proročanska lafija ispuninđe pe prekalo 200 berš kasnije ked i nacija Izrael khuvđa ki Obećimi phuv. E Simeoneso pleme dobinđa sar nasledstvo disave dizja ko Judaso pleme (Is. Nav. 19:1). A e Levijeso pleme nasledinđa 48 dizja kola hine strevime ko celo Izrael (Is. Nav. 21:41).

11. Kola šukar buća ćerđe e Simeoneso hem e Levijeso pleme?

¹¹ E Simeonese hem e Levijese potomkija na ponovinđe olenge greške. E Levijeso pleme verno služinđa e Jehovase. Ked o Mojsije dobinđa o Zakon ki gora Sinaj, but Izraelcija klaninđe pe anglo telco. Ama, o Levitija na manglje te ćeren odova. Umesto odova, on hine ki Mojsijesi strana hem pomožinđe le te uništini okolen so klaninđe pe anglo telco (Izl. 32:26-29). O Jehova birinđa e manušen ando Levijeso pleme te oven sveštenikija (Izl. 40:12-15; Br. 3:11, 12). Kasnije, đi osvojinđe i Obećimi phuv, e Simeoneso pleme pomožinđa e Judase plemese te borini pe protiv o Hanancija (Sud. 1:3, 17).

12. So šaj te sikljova ando Simeon hem Levije?

¹² So sikljovaja? Niked ma mukh i holi te utičini upro te odluke hem te postupkija. Ako neko lošno postupini premalo tute ja premalo nekaste kas mangeja, normalno tano te ove uznemirimo (Ps. 4:4). Ama, na valjani te bistre so ako pheneja ja ćereja diso ki holi, o Jehova na ka ovel zadovoljno tuvaja (Jak. 1:20). Ako nekastar doživinaja nepravda, bilo odija osoba te služini e Jehovase ja na, amen valjani te postupina premalo biblijake načelija. Odova ka pomožini amen te na phena ja te na ćera diso so ka povredini averen (Rimlj. 12:17, 19; 1. Petr. 3:9). Pana jekh buti koja šaj te sikljova tani so čak ako te roditeljija ćerena diso so nane ugodno e Jehovase, tu na hijan obavezno te sledine olengo primer. Ma mislin so tu hijan našaldo slučaj hem so našti te dobine e Jehovaso blagoslov. O Jehova ka pomožini tuće te ćere odova soj tano ispravno hem ka nagradini tut sebepi odova so ćereja.

JUDA

13. Sose šaj o Juda brininđa pe ked alo ko redo o Jakov te vaćeri oleja?

¹³ Akana alo o redo ko Juda. Palo odova so šunđa so o Jakov phenđa olese phralenđe, ov šaj počminđa te brinini pe. Sose? Odolese so hem ov ćerđa disave ozbiljna greške. Palo odova so o Simeon hem o Levije mudarđe e manušen ando Sihem, o Juda zajedno pe phralencar đelo ki odija diz hem lelja sa odole manušenge buća (Post. 34:27). Isto ađahar, ov pe phralencar bikinđa e Josife sar robo hem hovavđa pe dade ando odova (Post. 37:31-33). Kasnije, ked leso ćhavo mulo, ov suća pe borjaja, e Tamaraja, sose mislinđa soj tani prostitutka (Post. 38:15-18).

14. Kola šukar buća o Juda ćerđa? (Postanak 49:8, 9)

¹⁴ Ama, o Jakov samo hvalinđa e Juda hem phenđa lese so ađićerena le bare blagoslovija. (Čitin Postanak 49:8, 9.) O Juda mothovđa so ćaće brininđa pe ando po phuro dad. Isto ađahar, odobor manglja pe tiknedere phrale, e Venijamine, so hine spremno te ovel robo ko oleso than (Post. 44:18, 30-34).

15. Sar o Juda hine blagoslovimo?

¹⁵ O Jakov prorekninđa so o Juda ka vodini pe phralen. Ama, nakhlje oko 200 berš angleder so počminđa te ispunini pe akava proročanstvo. Palo odova so o Izraelcija ikljilje ando Egipat hem đelje ki pustinja premali Obećimi phuv, e Judaso pleme đelo prvo, a avera plemenija pratinđe le (Br. 10:14). Beršencar palo odova, o Jehova ćhivđa e Judaso pleme prvo te đal te borini pe protiv o Hanancija hem te osvojini i Obećimi phuv (Sud. 1:1, 2). O David hine prvo kralj kova alo ando oleso pleme, a palo leste hine pana kraljija kola hine ando odova pleme. Ama, o proročanstvo ando Juda ispuninđa pe hem ko avera načinija.

16. Sar ispuninđa pe o proročanstvo ando Postanak 49:10? (Dikh o okvir „O proročanstvo kova o Jakov phenđa angleder te merel“.)

¹⁶ O Jakov phenđa so o vladari kova zauvek ka vladini upro sa o manuša ka avel ando Judaso pleme. (Čitin Postanak 49:10 hem i fusnota.) Odova vladari tano o Isus Hrist kole o Jakov vićinđa Šilo. Jekh anđeo ando Isus Hirst phenđa so „o Jehova, o Devel, ka del le olese dadeso presto, e Davideso“ (Luka 1:32, 33). Isto ađahar, ki Biblija aso Isus phenela pe soj tano „Lav ando Judaso pleme“ (Otkr. 5:5).

17. Sar šaj te oponašina e Jehova ko odova sar dikhaja upro avera?

¹⁷ So sikljovaja? O Jehova blagoslovinđa e Juda, iako ov ćerđa disave ozbiljna greške. Ama, olese phralja šaj pućlje pe so o Jehova dikhlja koro leste. Amen na đanaja so on mislinđe, ama đanaja so o Jehova koro leste dikhlja o šukar buća hem blagoslovinđa le sebepi odova. Sar šaj te oponašina e Jehova? Ked neko dobini disavo važno zadatko, ki početka šaj na ka haljova sose dobinđa odova sose šaj đanaja olese mane. Ama, šukar tano te na bistra so o Jehova mangela odola osoba sebepi olake šukar osobine. Ov dikhela o šukar buća ko pe sluge. Odolese, hem amen valjani te trudina amen te ćera odova.

18. Sose valjani te ova strpljiva?

¹⁸ Pana jekh buti koja šaj te sikljova ando Judaso primer tani so valjani te ova strpljiva. O Jehova uvek ispunini pe obećanja. Ama, odova na ćerela uvek ko način hem ko vreme kova amen očekujinaja. E Judase potomkija na počminđe te predvodinen odmah maškaro Jehovaso narodo. Ama, on podržinđe okolen kolen o Jehova birinđa te ćeren odova, sar soj tano o Mojsije ando Levijeso pleme, o Isus Navin ando Jefremeso pleme ili o kralj Saul ando Venijamineso pleme. Avdije, hem amen šaj te podržina okolen kolen o Jehova birinđa te predvodinen maškaro amende (Jevr. 6:12).

19. So šaj te sikljova ando Jehova kotar Jakovese lafija kola phenđa angleder te merel?

¹⁹ So đi akana sikljiljam ko akava članko? Jasno tano so „o manuš dikhela odova so šaj jaćhencar te dikhel pe, a o Jehova dikhela odova soj tano ko vilo“ (1. Sam. 16:7). O Jehova tano but strpljivo hem spremno oprostini amenđe. Iako olese nane drago ked grešinaja, ov na očekujini te ova savršena. Ov čak šaj te blagoslovini nekas ko angleder ćerđa ozbiljna greške ako iskreno kajini pe hem počmini te ćerel okova soj tano ispravno. Ko aver članko ka dikha so o Jakov phenđa pe pana ofto ćhavenđe.