7. ČLANKO PROUČIBASE
De sa tutar te haljove odova so čitineja ki Biblija
So pisini ko Zakon? So uduri čitinđan? (LUKA 10:26)
ĐILI 97 E Devleso Lafi dela životi
SOSTAR KA VAĆERAa
1. So mothovi amenđe so e Isusese hine but važno e Devleso Lafi?
ZAMISLIN so šuneja e Isuse sar sikavi. Ov često citirinđa o stihija ando Sveta spisija. U stvari, olese prva lafija palo krštenje hem olese zadnja lafija angleder te merel hine disave citirime stihija ando Devleso Lafib (Pon. zak. 8:3; Ps. 31:5; Luka 4:4; 23:46). Đi hine ki phuv, ov često citirinđa hem čitinđa disave stihija kotar Devleso Lafi hem objasninđa so on značinena (Mat. 5:17, 18, 21, 22, 27, 28; Luka 4:16-20).
Đi hine ki phuv, o Isus mothovđa kobor mangela o spisija hem mukhlja odova so pisini odothe te utičini upro leste (Dikh o 2. odlomko)
2. So pomožinđa e Isusese te haljol e Devleso Lafi đi barilo? (Dikh i slika ki naslovno strana.)
2 But berš angleder o Isus te počmini pi služba, ov često čitinđa e Devleso Lafi hem šunđa sar avera čitinena le. O Josif hem i Marija ko pe svakodnevna razgovorija sigurno često citirinđe e Devleso Lafic (Pon. zak. 6:6, 7). O Isus pe porodicaja sigurno svako sabat đelo ki sinagoga (Luka 4:16). Uduri ov but pažljivo šunđa đi čitinđa pe e Devleso Lafi. Sar nakhlja o vreme, o Isus sikljilo kokri te čitini e Devleso Lafi. Ov na samo so haljilo so pisini odothe, nego manglja odova so čitini hem mukhlja odova te utičini upro leste. Na primer, setinaja amen so hine ko hram ked o Isus hine le 12 berš. O učiteljija kola šukar đanđe e Mojsijeso zakon „hine oduševime odoleja sar [o Isus] odgovorini hem kobor buća haljola“ (Luka 2:46, 47, 52).
3. Sostar ka vaćera ko akava članko?
3 Ako redovno čitinaja e Devleso Lafi, amen šaj te đana so pisini odothe hem ka manga le. Sar šaj te pomožini amenđe odova so čitinaja e Devleso Lafi? But šaj te sikljova kotar odova so o Isus phenđa okolenđe kola šukar penđarđe o Zakon, e farisejenđe hem e sadukejenđe. On često čitinđe e Devleso Lafi, ama na hine len nisavi korist odolestar. O Isus phenđa so valjanđe te ćeren trin buća te šaj e Devleso Lafi te pomožini len. Odova so o Isus vaćerđa olenđe, šaj te pomožini hem amenđe (1) pana pošukar te haljova odova so čitinaja, (2) te arakha biserija ko e Devleso Lafi hem (3) te mukha e Devleso Lafi te utičini upro amende.
DE SA TUTAR TE HALJOVE ODOVA SO ČITINEJA
4. So ando Luka 10:25-29 sikljovaja so valjani te ćera đi čitinaja e Devleso Lafi?
4 Amen mangaja te čitina e Devleso Lafi, ama ako na haljovaja le amen nane amen nisavi korist odolestar. Hajde te dikha so o Isus phenđa jekhe manušese kova šukar penđarđa o Zakon. (Čitin Luka 10:25-29.) Ked ov pućlja le so valjani te ćerel te šaj te dobini o večno životi, o Isus pomožinđa lese te arakhi o odgovor ki Biblija. Ov pučlja le: „So pisini ko Zakon? So uduri čitinđan?“ O manuš đanđa o tačno odgovor. Ov phenđa so valjani te manga e Devle hem amare pašutnen (Lev. 19:18; Pon. zak. 6:5). Ama, palo odova pućlja: „A koj tano mo pašutno?“ Znači, akava manuš na haljilo odova so čitinđa. Odolese našti hine te primenini odova so čitini ando Devleso Lafi.
Amen šaj te sikljova te haljova odova so čitinaja
5. Sar šaj i molitva hem odova so ka čitina pohari te pomožini amenđe pošukar te haljova odova so čitinaja?
5 Ako mangaja pošukar te haljova e Devleso Lafi, amen mora te ćera diso đi čitinaja le. So valjani te ćera? Angleder te čitina, amen valjani te molina amen. Sose? Odolese so valjani amenđe e Jehovasi pomoć te šaj te haljova odova so čitinaja hem valjani te molina le te del amen po sveti duh te ovel amen koncentracija đi čitinaja. Palo odova, amen valjani te čitina pohari, te na siđara sose tegani šaj najšukar te haljova odova so čitinaja. Šaj te pomožini amenđe hem ako čitinaja ko glaso ili ako šunaja o audio-snimak andi Biblija. Đi šunaja o audio-snimak andi Biblija, šukar tano hem te pratina ko lil sose tegani pošukar ka haljova odova so čitinaja, ka pamtina hem ka sikljova pobuter (Is. Nav. 1:8). Ked završinaja o čitibe, valjani palem te molina amen e Jehovase. Tegani, šaj te phena lese kobor hijam zahvalna so dinđa amen i Biblija hem te molina le te pomožini amenđe te primenina odova so sikljiljam.
Sar šaj o kratka beleške te pomožinen tut pošukar te haljove hem te setine tut ko odova so čitinđan? (Dikh o 6. odlomko)
6. Sar šaj te pomožinen amen o pućiba hem o kratka beleške? (Dikh i slika.)
6 Isi pana duj buća kola šaj te ćera te šaj pošukar te haljova i Biblija. Đi čitinaja i Biblija, valjani te puća amen disave pućiba. Na primer: „Kastar vaćeri pe akate? Ko vaćeri? Kase vaćeri hem sose? Kaj hem ked ulo akava događaj?“ Asavke pućiba ka pomožinen amen te razmislina odolestar so čitinđam. Isto ađahar, đi čitinaja šaj te pisina kratka beleške. Ked pisinaja beleške, tegani pobuter razmislinaja ando odova so čitinđam hem odova pomožini amenđe te haljova hem te pamtina. So šaj te pisina? Šaj te pisina disave pućiba, so sikljiljam đi istražinđam, sar šaj te primenina odova so čitinđam ili so mislinaja odolestar so čitinđam. Ked pisinaja asavke beleške, odova šaj te pomožini amen te dikha sar o Jehova obratini pe direktno amenđe prekali Biblija.
7. Koja osobina valjani amenđe đi čitinaja i Biblija hem sose? (Matej 24:15)
7 O Isus phenđa so valjani te ovel amen jekh osobina te šaj pošukar te haljova odova so čitinaja ki Biblija. Odija osobina tani i razboritost. (Čitin Matej 24:15.) Soj tani i razboritost? I razboritost tani sposobnost te haljova sar tani jekh buti povezimi avera bućaja, sar tani jekh buti averćhane andi aver buti hem te dikha o buća kola na dićhona odmah. Isto ađahar, o Isus phenđa so valjani amenđe razboritost te šaj te haljova kola događaja ispuninena e biblijake proročanstvija. Ako mangaja i Biblija potpuno te koristini amenđe, valjani te ovel amen razboritost.
8. Sose tano šukar te ovel amen razboritost đi čitinaja i Biblija?
8 O Jehova dela razboritost pe slugenđe. Odolese, valjani te molina le te pomožini amen te ovel amen odija osobina (Posl. 2:6). Sar šaj te postupina u skladu amare molitvaja? Ađahar so hor ka razmislina kotar odova so čitinđam hem ka dikha sar tano odova povezimo odoleja so već đanaja. Isto ađahar, šaj te pomožinen amenđe amare publikacije. Na primer, šaj te koristina o Vodič kotar publikacije ando Jehovase Svedokija. Odova šaj te pomožini amenđe te haljova so značini odova so čitinaja hem te dikha sar šaj te primenina odova ko amaro životi (Jevr. 5:14). Ako isi amen razboritost, amen sa pošukar ka haljova odova so čitinaja.
ARAKH BISERIJA KO DEVLESO LAFI
9. So o sadukeja na manglje te prihvatinen ando Devleso Lafi?
9 O sadukeja but šukar đanđe so pisini ko prva panđ knjige ando Devleso Lafi, ama na manglje te prihvatinen odova. Na primer, zapazin sar o Isus odgovorinđa e sadukejenđe ked pućlje le diso ando uskrsenje. Ov pućlja len: „Na čitinđen li ki Mojsijesi knjiga ko izveštaj ando grm, sar o Devel phenđa lese: ’Me hijum e Avrahameso Devel, e Isakeso Devel hem e Jakoveso Devel‘?“ (Mar. 12:18, 26). Iako o sadukeja but putija čitinđe akava izveštaj, e Isuseso pućibe mothovi so on na prihvatinđe odova so e Devleso Lafi sikavi ando uskrsenje (Mar. 12:27; Luka 20:38).d
10. Ko so valjani te obratina pažnja đi čitinaja e Devleso Lafi?
10 So sikljovaja akalestar? Ked čitinaja, amen mangaja te đana so odova stih ja izveštaj mangela te sikavi amen. Amen na mangaja te haljova samo o osnovna buća, već hem o hor buća hem o načelija. On tane garavde sar soj tano garavdo o biser. Odolese nane lokho te arakha len.
11. Premali 2. Timoteju 3:16, 17, sar šaj te arakha biserija ko Devleso Lafi?
11 Sar šaj te arakha biserija ko Devleso Lafi? Razmislin so pisini ki 2. Timoteju 3:16, 17. (Čitin.) Othe pisini: „Celo Lil avela ando Devel hem korisno tano“ (1) te sikavi e manušen, (2) te mothovi soj tano pogrešno, (3) te ispravini sa o buća hem (4) te sikavi amen sar te živina. Čak hem e biblijake knjige kola na koristineja odobor često šaj te pomožinen tuće ki svako andi akija buti. Đi čitineja disavo izveštaj andi Biblija, razmislin so ov sikavi tut ando Jehova, andi olesi namera hem ando biblijake načelija. Razmislin hem sar odova izveštaj mothovi tuće odova soj tano pogrešno. Dikh sar odova so čitinđan šaj te pomožini tut te aćhove verno e Jehovase hem te haljove da li tano disavo stav pogrešno. Isto ađahar, trudin tut te koristine odova so čitinđan te šaj te ispravine disave pogrešna stavija. Na primer, diso pogrešno so šunđan ando manuša ki služba. Dikh hem so šaj te sikljove te šaj ko buća te dikhe sar so o Jehova dikhela. Ked ko asavko način čitineja i Biblija, tegani šaj te arakhe biserija.
MUKH E DEVLESO LAFI TE UTIČINI UPRO TUTE
12. Sose o Isus pućlja e farisejen: „Na čitinđen li odova?“
12 O Isus pućlja e farisejen: „Na čitinđen li odova?“ Ađahar manglja te mothovi so hine len pogrešno stav ando Devleso Lafi (Mat. 12:1-7).e Tegani, o fariseja phenđe so e Isusese učenikija na ićerena pe ko Zakon ando sabat. Ama, o Isus koristinđa duj primerija ando Devleso Lafi hem citirinđa jekh stih kotar Osija te šaj te mothovi lenđe so on na haljilje sose hine dindo o Zakon ando sabat hem so na mothovđe milosrđe. Ama, sose upro akala manuša na utičinđa odova so čitinđe ko Devleso Lafi? On hine ponosna hem čitinđe e Devleso Lafi samo te šaj te arakhen greške ko avera. Sebepi so hine len asavko stav, on na haljilje odova so čitinđe (Mat. 23:23; Jov. 5:39, 40).
13. Savo stav valjani te ovel amen đi čitinaja i Biblija hem sose?
13 Kotar Isusese lafija dikhaja so đi čitinaja e Devleso Lafi, amen valjani te ovel amen ispravno stav. Đi akana dikhljam so o fariseja hine ponosna. Ama, amen na mangaja te ova sar olende, već mangaja te ova ponizna hem spremna te sikljova. Amen valjani te ova blaga hem te prihvatina ano amende „te sadini pe e Devleso lafi“ (Jak. 1:21). Ako hijam blaga, tegani ka mukha e Devleso Lafi te mukhel koreno ko amaro vilo. Samo ako hijam ponizna amen ka mukha e Devleso milosrđe, saosećajnost hem mangipe te oblikujinen amen te šaj te ova pana pošukar manuša.
Sar šaj te đana da li mukhaja e Devleso Lafi te utičini upro amende? (Dikh o 14. odlomko)f
14. Sar šaj te đana kobor mukhljam e Devleso Lafi te utičini upro amende? (Dikh i slika.)
14 Sar ponašinaja amen premalo avera mothovi kobor mukhljam e Devleso Lafi te utičini upro amende. Sebepi so o fariseja na mukhlje e Devleso Lafi te resel đi olengo vilo, on osudinđe averen kola na hine kriva (Mat. 12:7). Isto ađahar, odova so amen mislinaja averendar ja sar ponašinaja amen premalo avera, mothovi kobor mukhljam e Devleso Lafi te oblikujini amen. Na primer, da li uvek dikhava odova soj tano šukar ko avera ja često vaćerava ando olenge mane? Ked neko povredini man, da li hijum spremno te oprostinav ili ićerava i holi ano mande? O odgovorija ko akala pućiba šaj te mothoven amenđe kobor mukhaja e Devleso Lafi te utičini ko amaro način sar razmislinaja, so osetinaja hem ko odova so ćeraja (1. Tim. 4:12, 15; Jevr. 4:12).
AMEN KA OVA BAHTALE AKO ČITINAJA E DEVLESO LAFI
15. So o Isus mislinđa ando Devleso Lafi?
15 O Isus manglja e Devleso Lafi. O lafija ando Psalam 40:8 mothovđe so ov ka mislini ando Devleso Lafi. Odothe pisini: „Devla, but hijum bahtalo te ćerav ti volja, hem toklo zakon tano hor ano mande.“ Sebepi so manglja e Devleso Lafi, ov hine bahtalo hem verno služinđa e Jehovase. Amen šaj te ova bahtale hem verno te služina e Jehovase, ako redovno čitinaja oleso Lafi hem mukhaja odova te utičini ko amaro vilo (Ps. 1:1-3).
16. So šaj te ćera ako mangaja pana pobuter te koristini amenđe odova so čitinđam? (Dikh o okvir „E Isusese lafija ka pomožinen amen te haljova odova so čitinaja“.)
16 E Isuseso primer hem olese lafija mothovena sar šaj pana pošukar te haljova odova so čitinaja ko Devleso Lafi. Amen valjani te molina amen angleder so čitinaja e Devleso Lafi, te na siđara, te postavina pućiba hem te ćera kratka beleške. Valjani te koristina amari razboritost ađahar so hor ka razmislina odolestar so čitinđam, a ko odova šaj te pomožinen amen amare publikacije. Isto ađahar, šaj pana pošukar te sikljova te koristina e Devleso Lafi, čak hem o stihija kola na penđaraja odobor but, ađahar so ka arakha biserija. Uzo odova, valjani te mukha odova so čitinaja te utičini upro amende. Ako daja sa amendar te primenina akava, pana pošukar ka haljova odova so čitinaja hem ka ova pana popaše e Jehovaja (Ps. 119:17, 18; Jak. 4:8).
ĐILI 95 I svetlost ovela sa pobari
a Amen sar e Jehovase sluge čitinaja e Devleso Lafi svako dive. Odova isto ćerena hem but manuša ko sveto. Ama, on na haljona odova so čitinena. Akana ka dikha sar šaj odova so o Isus phenđa okolenđe kola čitinena e Devleso Lafi te pomožini hem amenđe pana pošukar te haljova odova so pisini ki Biblija.
b Ked o Isus krstinđa pe hem hine pomazimo e sveto duhoja, ov setinđa pe sa so ćerđa pe Dadeja đi hine ko nebo (Mat. 3:16).
c I Marija često citirinđa e Devleso Lafi hem but šukar đanđa le (Luka 1:46-55). O Josif hem oj verovatno na hine len dovoljno pare te ovel len po lično primerak ando Sveta spisija. Odolese, on valjanđe pažljivo te šunen ki sinagoga ked čitinđa pe e Devleso Lafi te šaj palo odova te ponovinen odova so hine čitimo.
d Dikh o članko „On je Bog živih“ ki Stražarsko kula kotar 1. februar 2013. berš.
e Ko Matej 19:4-6 o Isus pućlja isto pućibe e farisejen: „Na čitinđen li odova?“ On čitinđe so o Jehova stvorinđa e prvo manuše hem e đuvlja, ama ipak na manglje te prihvatinen so o Jehova mislini ando brak.
f SO DIKHAJA KI SLIKA: Đi trajini o sastanak, jekh phral kova pomožini ko audio-video ćerela nekobor greške. Ama, palo sastanko o phralja, umesto te vaćeren ando olese greške, on pohvalinena le so dinđa sa pestar te ćerel po zadatko.