Ko ka ćhinavi o mariba?

O DEVEL KA CIDEL SA O MANUŠIKANE VLASTIJA

I Biblija mothovi so o Devel ka uništini sa o manušikane vlastija ko maribe kova vićini pe Armagedona (Otkrivenje 16:16). Tegani, o „kraljija ando celo sveto“ ka ćeden pe „aso maribe kova ka ovel ko baro dive ando Svemoćno Devel“ (Otkrivenje 16:14). Palo Armagedon više na ka ovel nijekh aver maribe.

Umesto e manušenge vlastija, ka vladini e Devleso Kraljevstvo kova niked na ka ovel uništimo (Danilo 2:44). O Devel ćhivđa pe Ćhave, e Isuse, te ovel Kralj ko odova Kraljevstvo (Isaija 9:6, 7; Matej 28:18). O Isus sikavđa pe učenikonen te molinen pe aso odova Kraljevstvob (Matej 6:9, 10). Ked ka vladini odova Kraljevstvo sa o manuša ka živinen ko mir hem ko jekhipe.

O Isus ka ovel averćhane ando manušikane vladarija sose ov pi moć na ka koristini ki pi korist. Sebepi soj tano pravedno hem na ćerela razlika maškaro manuša, niko na ka doživini i nepravda sebepi odova koj tano hem kotar avela (Isaija 11:3, 4). Tegani o manuša na ka borinen pe asi pravda. Sose? Odolese so o Isus ka brinini pe svakonese. „Ov ka izbavini e ćororen kola rodena lestar pomoć, e ponizno manušen hem sa okolen kola nane len nikas te pomožini len. [. . .] Ka izbavini len ando manuša kola mangena te povredinen len hem kola mučinena len“ (Psalam 72:12-14).

E Devleso Kraljevstvo ka cidel sa o oružje andi phuv (Mihej 4:3). Isto ađahar, tegani ka oven uništime sa o manuša kola povredinena averen hem kola ćerena nemirija (Psalam 37:9, 10). Svako manuš ka osetini pe sigurno kuri god te đal (Jezekilj 34:28).

Ked e Devleso Kraljevstvo ka vladini upri phuv, sa o manuša ka živinen šukar. Odova Kraljevstvo ka rešini o problemija kola akana ćhivena e manušen te đan ko mariba, sar soj tane o ćororipe hem o bokhalipe. Svako ka ovel le kaj te živini hem but buća hajbase (Psalam 72:16; Isaija 65:21-23).

E Devleso Kraljevstvo ka cidel sa i šteta koja ulji sebepi o mariba. O Devel na samo so ka saćari amare rane, već ov ka cidel i dukh koja akharaja ko amaro vilo sebepi o buća kola doživinđam ko maribe. Čak hem okola so mulje ka oven irime ko životi (Isaija 25:8; 26:19; 35:5, 6). Tegani o porodice palem ka oven zajedno hem nijekhe manuše na ka mučinen o buća kola angleder doživinđa ja dikhlja ko maribe (Otkrivenje 21:4).

O DEVEL KA CIDEL O GREH

Ked ka vladini e Devleso Kraljevstvo sa o manuša ka služinen e jedino ćaćutne Devlese, e Jehovase,c kova tano „Devel ando mangipe hem ando mir“ (2. Korinćanima 13:11). Tegani o manuša ka sikljon sar te živinen zajedno ko mir (Isaija 2:3, 4; 11:9). Sar đala o vreme, sa okola so šunena e Devle više na ka grešinen, već ka aven đi o savršenstvo (Rimljanima 8:20, 21).

O DEVEL KA UNIŠTINI E SATANA HEM OLESE DEMONEN

E Devleso Kraljevstvo ka uništini okolen so ćhivena e manušen te đan ko mariba, e Satana hem olese demonen (Otkrivenje 20:1-3, 10). Bizo lende „ki celo phuv ka vladini o mir“ (Psalam 72:7).

Šaj te ove sigurno so o Devel ka ispunini po obećanje te ćhinavi o mariba. Ov na samo so šaj te ćerel odova, nego hem mangela.

• O Devel isi le mudrost hem moć te ćhinavi o mariba hem o nasilje (Jov 9:4). Niko hem ništa našti te ćhinavi le te ćerel odova (Jov 42:2).

• E Devlese tano pharo ked dikhela so o manuša patinena (Isaija 63:9). Isto ađahar „ov mrzini okole kova mangela o nasilje“ (Psalam 11:5).

• O Devel uvek ićeri pe ko po lafi hem našti te hovavi (Isaija 55:10, 11; Titu 1:2).